Read Northern Rengma Naga 2 KHENICÜKI 24 Bible Online

2 KHENICÜKI 24 - Northern Rengma Naga bible

2 KHENICÜKI 24

¹Joash na ma kahang mapi tagü wi Judah kadimi saya, nu ma amapi jügha Jerusalem wi kekhang sen. Ma jja na Beersheba nyunutiwa wina kegho Zibia.

²Ma keqhaikediwa Jehoiada na hang keben chu Apvüwa kenenwa tsü sa.

³Jehoiada na Kadimi Joash ghena awubvü keni yapi cü, nu manyi na atsangathu pvügha pi ma cü.

⁴Joash na ma kadimi sakeya matsü keu sengwi Kekinyijjenwa tsü sapfüle südheya.

⁵Ma keqhaikedithu nu Levi nyithu na Judah nyunutithu wi wa anyi tsüdi wi amapi kaghapen Kekinyijjen kesapfü ghena kesen qo apisa saghu yalo ahza khuchia. Ma mathu ya wan salo kiza, isala Levi nyithu na sa minu wa,

⁶ tsalina ma mathu ccülikesawa Jehoiada ci chi nu khi, “No Levi nyithu na Judah nu Jerusalem nyithu wi Apvüwa ketenpen Nithsüjjen kenoncca ghena anyithu na khajana khuchiben kesa Apvüwa maghawa Mosa na kekhi tsü kesaghu nmu kwe?”

⁷(Athaliya nza meghangmeghewa [3] senkeniethu na Kekinyijjen tsü yasa nu ciwi kemetha tsanqaithu sen wa Baal kekinyijjen wi sen.)

⁸Kadimiwa na Levi nyithu ya khukechi ghena akhitson kesü saya nu sen wa Kekinyijjen kaghapeng-jenka wi chilo kesa ahza khuchia.

⁹Anyi tsüdila kheni Anyiza maghawa Mosa na atuwa sa aghansha wi saghu kesa ti khajana tsü sen nu Apvüwa wi gho thsüle kesalina mathu na ketsijüh kesun pi Jerusalem nu Judah yyi tsüdi wi chia.

¹⁰Anyithu nu mathu ccülikesathu na ha nen, nu mathu na mathu khajana tsü sengho akhitsonwa tsü pong.

¹¹Levi nyithu na atsathangla akhitsonwa tsü pie nu kenoncca kadi kediwa wi wha. Khathansha wi akhitsonwa tsüna pongya khe, kadi kezhüwa nu Keqhaikedi ntsawa na kesun kechi manyi na apisa tsü khushiya nu akhitson tsüpi ma pen wi chi neng cüden. Isanu mathu apisa ji ntsa saghuya.

¹²Kadimiwa nu Jehoiada manyi na apisa pi Kekinyijjenwa kesapfü keghangthu cü, nu mathu na tsüpi alon kaha, achan kecüh, nu amighe kecühthu melli pi tsü sapfü.

¹³Ciwi kekulithu tsüdila apiketsü sa kuli, nu Kekinyijjenwa tsü sapfü pi kheni ti zükeqhe saya.

¹⁴Ajjenwa tsü kesapfü cen sengwi kesentu suna nu rükatssü keben tsüpi kadimiwa nu Jehoiada manyi cüa, manyi na tsüpi Kekinyijjen wi kesenji akhu zza nu ahyikhu kepathu cühya. Jehoiada na hang keben chu Kekinyijjen wi ahhanshathu saju sa.

¹⁵Ma kahang mapi meza nu changha kecu sengwi shü.

¹⁶Mathu na ma Israel nyithu ghena, Anyiza ghena, nu Kekinyijjen ghena kekuli sa kechi ghena ma pi David Nyunutiwa wi kadi shüjjenthu wi vhüa.

¹⁷Isala Jehoiada keshü sengwi Judah ccülikesathu na ghola Kadimiwa Joash juya nu ma mathu jühkinawa.

¹⁸Tsalina anyithu na Kekinyijjen wi mathu bamyithu Nyiza Apvüwa nkinyila, nu atsikezhüthu nu acenpvü nzawa Asherah tsiketonthu tsü kinyi wa. Mathu na kesami hathu kesa ghena Apvüwa lebenketsu sengho Judah nu Jerusalem miwi chia.

¹⁹Apvüwa na atusenjüh-kechüthu kesun pi mathu kitsan thsü nu ma wi kheneng gholo sa lela anyithu na nkina mvula.

²⁰Tsaseng wi Anyiza ghamu na keqhaikediwa Jehoiada tsa Zekhariya miwi gho. Ma wa anyithu na ma kemu pen wi ngan nu maghala khi, “Apvüwa Anyiza na nthu mangkesa na ma yenkhukechithu tsü n-niela nu nthu ketanla ketizenkesa sengho nthu miwi chiya ben nu keüben! Nthu na ma teshi kesalina ma la nthu teshidha le!”

²¹Kadimi Joash la mathu gweghe acho sapi Zekhariya shun, nu kadimiwa na ahza khukechi wina anyithu na Kekinyijjen ccühha wi alon pi Zekhariya kecen.

²²Kadimiwa na Zekhariya ba Jehoiada na ma jühkeya kekuli kesa tsü mali nu ma Zekhariya pathia. Zekhariya na shü wa keten wi ma magha nu khi, “Apvüwa na no mangwa saben khe muya nu no meten kecüwa salo!”

²³Tsü mapi vvüthimeyi wi Siriya nyi süpahizi na gho Judah nu Jerusalem ssikaghashen, accülikesathu tsüdi pathi nu atsanqai kejon shu pvü nu Damaska wi wa neng.

²⁴Siriya nyi süpahizi na keu ketan lela Apvüwa na mathu yala Judah nyi süpahizi ji ntsawa tsü chaya thsüa, kepaghenanye anyithu na mathu bamyithu Nyiza Apvüwa tsü teshia. Hatinu Kadimi Joash metenmesha cü.

²⁵Ma mesa-mena ntsa sa nu aghinyithu na whaneng kesa sengwi ma kekhu wi kedi keni na acho sapi ma shun nu keqhaikediwa Jehoiada tsa pathi kesa jukhi keya wina ma we wi ma pathia. Ma kamang pi David Nyunutiwa wi vhü, isala pi kadi shüjjenthu wi nvhüla.

²⁶(Acho sapi ma shun kesathu na Ammon nyi nza kesü nyan Shimeath tsawa Zabad, nu Moab nyi nza kesü nyan Shimrith tsawa Jehozaba.)

²⁷Kadimithu Lesüshenwa wi tsü Joash tsathu, atusenjüh-khi pi ma keshun, nu ma khatinu Kekinyijjenwa tsü sapfü khe tsü cükikezhüthu na ben. Ma tsa Amaziya na ma shiwa sa kadimi saya.