Read Northern Rengma Naga 2 KHENICÜKI 25 Bible Online

2 KHENICÜKI 25 - Northern Rengma Naga bible

2 KHENICÜKI 25

¹Amaziya na ma kahang mapi ngwe nu manga wi kadimi saya, nu ma amapi ngwe nu tugu Jerusalem wi kekhang sen. Ma jja na Jerusalem wina kegho Jehoaddin.

²Ma Apvüwa kenenwa tsü sa, isala leben nchila sa.

³Ma kekhang wi zükeqhe saya meyi kedithu ma ba pathi kesathu tsü pi shü thsüa.

⁴ Isala ma mathu tsangathu tsü npathi, isani Apvüwa na Mosa Yenwa wi khuchi ketheng tsü nie: “Atsangathu kesazzi ghena mathu bajjathu pi shü thsü nben, nu abajjathu kesazzi ghena mathu tsangathu pi shü thsü nben; anyi kesü le kesü lela ma kesazzi ghena ma pi shü thsüaben.”

⁵Kadimi Amaziya na Judah nu Benjamin mizzathu anyi tsüdi pi mathu gei kenie wina süpahizi khang khang sa kecükepeng chi, nu kedithu pi anyi hazar kesü nu meza kesü miwi benchü sa thsüa. Ha anyi tsüdi kahang mapi ngwe nu tsü miwi keqhai kesaghu na anyi 300,000. Mathu na süpahithu aghisaya kemehai, apie nu atsonhithu senchü ntsa kesathu kessiya.

⁶Tsü miwi, ma rükatssü kilogram 3,400 men pi Israel süpahithu 100,000 melli.

⁷Isala atusenjüh-kechü kesü na kadimiwa wi wa nu ma wi khi, “No Israel nyi süpahi hathu ha pi no ngweghe lalo. Apvüwa na anyi aghawa kadiyyi wina keghothu ha ssi nten.

⁸No mathu na aghi wi no sapi züpfü thsüya mehaile meshen ben, isala khangkeya nyela nchala kesa khu kechiwa tsüna Anyiza, nu ma nghinyithu ya no chaya thsüaben.”

⁹Amaziya na atusenjüh-kechüwa wi keü “Isala hi rükatssü pi mathu ghena cükesa tsü khati sa nu?” Atusenjüh-kechüwa na luneng, “Apvüwa na tsü miwi kejiki pi no cüya mehai le!”

¹⁰Tsalina Amaziya na süpahi melli sen ketenthu tsü mathu jjen wi whalo kesun pi bvü thsüa. Ha ghena mathu na ajjen wi wha nu Judah nyithu miwi aghepvü ntsa sa.

¹¹Amaziya na kempvüza saya nu ma süpahizi ssinu Amcü Yyiketijü wi wa. Ciwi mathu na Edom nyi süpahithu ssikesali nu mathu hazar tagha pathia

¹²nu kepa wi hazar tagha ghanya. Mathu na atssüzüthu ssinu Sela nyunutiwa wi alonshi shoni wi ki ciwi na mathu pi cüchi nu mathu ya alon miwi kecenthi thsüa.

¹³Tsü tsüwi Israel süpahithu Amaziya na ma gweghe aghi wi nwa thsüla kesathu na wa Samaria nu Beth Horon jüwi Judah nyi nyunutithu ssikaghashen nu anyi hazar kecheng pathia nu atsanqai kejon shuya.

¹⁴Amaziya na Edom nyithu chaya nu kheneng kegho wi ma mathu tsikezhüthu tsü sengho tsüthu kinyi nu hankedemvu mecang pi tsüthu cü.

¹⁵Hawa ha Apvüwa sapi ma lebentsu thsüa, tsalina ma atusenjüh-kechü kesü kesun pi Amaziya wi chi. Atusenjüh-kechüwa na khi, “Mangkesa na no asang cenpvüthu mathu ketanla no kekhang wina mathu hangsha nkeyathu tsü kinyiten nu?”

¹⁶Amaziya na khi, “Ithu na kusi no pi kadimiwa kesansiwa sa thsü nu? Ajüh nkhila, nyelethu no pathi cü benle!” Atusenjüh-kechüwa na hati khi nu ngan wa, “Hi khili Anyiza na no yasale südheyadha kesa chüben, kepaghenanye no ha tsüdi sadha nu hi kesansijüh tsü koghobvüdha.”

¹⁷Judah kadimi Amaziya nu ma kesansithu na acho sapi Israel shun. Isanu ma ketsijüh kesü kesun pi Jehu tsawa Jehoahaz tsa Israel Kadimi Jehoaz cü nu ma ssikesalile nniben.

¹⁸Jehoash na keluneng hapi Amaziya wi kesunchi: “Kuti tsüwi Lebanon Yikhathu wi aghazüton kesü na ketsijüh kesü kesun pi sedar chan kesü wi chi: ‘N-nga pi itsa wi n-nugha thsülo.’ Aghangsa kesü na wa aghazü tonwa tsü cüten.

¹⁹Amaziya, no khili Edom nyi chayadha le kapvü ben, isala hi no ceen ajjen wi benlo no kizaben. Mangsale kekivvü pfüsi chi nu ketizenkesa sengho nmiwi nu n-nyithu miwi chikeya ketan sa nu?”

²⁰Isala Amaziya na tsü nkina mvula. Amaziya na nyu nchala kesa tsüna Anyiza kemeshen, kepaghenanye ma Edom nyi tsikezhüthu tsü kinyi wa.

²¹Tsalina Israel Kadimi Jehoash na aghi wi Judah Kadimi Amaziya ssikaghashen. Mathu na wa Judah yyi wi Beth Shemesh wi kemetuli.

²²Judah nyi süpahizi na nyu nchala, nu süpahithu na bvü zighe sen nu mathu jjen wi wha.

²³Jehoash na Amaziya ghanya nu ma ssisen Jerusalem wi wha. Ciwi ma anyunutiwa khweti tsü Efraim Kaghapeng-jenka tsüna wa Accügwen Kaghapeng-jenka kecu ma kesie meter meza keni-u tsü pasha.

²⁴Ma Kekinyijjen wi suna nu rükatssü, Obed Edom shicübvüghathu na hie keben Kekinyijjen tsanqaithu, nu kadijjen wi keben tsüdi shu bvü nu Samaria wi wa. Ma anyithu la pi atssüzü sala ssi bvüa.

²⁵Judah Kadimi Amaziya na Israel Kadimi Jehoash keshü sengwi amapi taghamanga hang.

²⁶Amaziya na kadikesa tsüwi ma kekuli cükithu aghatsan na wa asakhen kecu pi Judah nu Israel Kadimithu cükikezhü wi zhütheng.

²⁷Ma khathansha wi Apvüwa matang shun shagha khe tsü nten na Jerusalem wi acho sapi ma shun shagha. Ma asakhen wi bvü sen nu Lakhish nyunutiwa wi wa lela ciwi la ma ghinyithu na ma nie wa ma pathia.

²⁸Goru kesü miwi na ma kamang pvü nu Jerusalem wi gho, nu ma pi David Nyunutiwa wi kadi shüjjenthu wi vhüa.