Read Northern Rengma Naga 2 KHENICÜKI 26 Bible Online

2 KHENICÜKI 26 - Northern Rengma Naga bible

2 KHENICÜKI 26

¹Judah nyi tsüdila Amaziya tsa amapi tagha nu tugho sa keben Uzziya tsü kessi pi ma ba shiwa sa kadimi saya.

²(Amaziya keshü sengwi Uzziya na Elath tsü nka neng pi anyunuti saya.)

³Uzziya na ma kahang mapi tagha nu tugho wi kadimi saya nu ma amapi deni nu keni Jerusalem wi kekhang sen. Ma jja na Jerusalem wina kegho Jekolia,

⁴Ma ma ba tsütsonca tsü nie nu Apvüwa kenenwa tsü sa.

⁵Keccüna wi kesansiwa Zekhariya na hang keben chu ma ma leben tsentsa wi Apvüwa kekuli sa nu Anyiza na sawegü pi ma cü.

⁶Uzziya na wa Filistinthu ssinu aghisa. Ma Gath, Jamnia, nu Ashdod nyunutithu khwetithu tsü pasha, nu Filitia yyi kepa wi nu Ashdod kete wi khwetivü ketheng nyunutithu yaya.

⁷Anyiza na ma kiqa pi Filistinthu, Gurbaal wi hang kebenthu Arab nu Meun nyithu chaya thsüa.

⁸Ammon nyithu na keküju pi Uzziya cü, nu ma khang ntsawa sa shagha nu ma nyankethang na Ejipt kecu la wa.

⁹Uzziya na Accügwen Kaghapeng-jenka, Yyiketijü Kaghapeng-jenka, nu khweti sheng wa keten penthu witsü aducü kemisithu zhüpi khwetivü ketheng Jerusalem tsü satezüya.

¹⁰Ma aghansha wi la aducü kemisithu zhü nu atssükhangthu sa, kepaghenanye ma niduwa yyishiphon ccü wi deshentijü witsü asahangthu akhang kejon na ben. Ma allikeca ma nen kesalina ma anyithu kechü-kenong pi yyishiphon wi kemeshentsse tonthu pi sheng nu ayyi kinyan witsü allica thsü.

¹¹Ma aghikesa süpahizi kejon kidentheng. Kadimi kekhu wi anyi kesü Hananiya na ghang nu ma kekhu wi kezhüthu: Jeiel nu Maaseiya manyi yala tsü cüki kezhü tsüpi theng thsü.

¹²Kedithu 2,600 na süpahizi benchü sa.

¹³Mathu kekhu wi süpahithu 307,500 na kadimi ghena ma ghinyithu ssikesaliya kemehai na ben.

¹⁴Uzziya na apie, atsonhi, aliwen, aghighe, gwomejuwa, alamugho, alakusüthu, nu alonthu pi alila wi kega ghena pi mathu cü.

¹⁵Jerusalem wi ma nyi sapichüthu na kegaji alakusü sa, anyunutiwa khweti ccügwen wi nu aducükezhü kemisi wi na alon ketiti pi kecüchi penthu sa. Ma nyankemechan na apen tsüdi wi wa, nu ma khang ntsawa sa shagha kepaghenanye ma Anyiza wi kekiqa muya.

¹⁶Isala Kadimi Uzziya na zükeya wi ma kapvü shagha, nu tsüna ma ssi wa qanca thsüa. Ma Kekinyijjen wi dula kekinyipen miwi hankedemvu mecang nu Apvüwa ma Nyiza matang wa.

¹⁷Keqhaikediwa Azariya nu keqhaikedithu kepa wi kezü nu kempvüzathu achentazen na ma gweghe kadimi nie wala

¹⁸ ma khen. Mathu khi, “Uzziya! No hankedemvu mecang pi Apvüwa kecüu nmile. Aaron shicübvügha keqhaikedithu ketan ha kekuli ghena satemethatheng. Kemetha pen ha teshilo. No Apvüwa Anyiza nkenen sadha, nu no ma kesawegü muya nbendha.”

¹⁹Uzziya na Kekinyijjen wi hankedemvu pi kekinyipen kete wi hankedemvu pi kemecangji khusen nu nganben. Ma keqhaikedithu miwi lebentsu, nu agükedsakenaa na wan ma tie wi shhughoa.

²⁰Azariya nu keqhaikedi kepathu na qhethiketen kadimiwa tie ghangchi nu ma kesun pi Kekinyijjen teshi thsüa. Ma kaghajila akhemi wi shhua, kepaghenanye Apvüwa na ma meten cüdha.

²¹Kadimi Uzziya na ma khuma-khujü tsüghena tsü nten na ma kahang chuli keccüna wi nmethala. Ma Kekinyijjen wi du neng meyala, ma kekulithu nsala ma jjen wi hang, nu ma tsa Jotham na diyyiwa miwi kekhang sen.

²²Amoz tsa Isa atusenjüh-kechüwa na Kadimi Uzziya na ma kadikesa tsü wi kekuli cüki tsüdi zhütheng.

²³ Uzziya na shü nu pi kadi kevhü yyiwi vhüa, isala ma khuma-khujü ghena pi kadi shüjjenthu wi nvhü. Ma tsa Jotham na ma shiwa kadimi saya.