Read Northern Rengma Naga 2 KHENICÜKI 28 Bible Online

2 KHENICÜKI 28 - Northern Rengma Naga bible

2 KHENICÜKI 28

¹Ahaz na ma kahang mapi ngwe wi kadimi saya, nu ma amapi tagha nu tugho Jerusalem wi kekhang sen. Ma ma baqhai David tsütsonca kemehaiwa tsü n-nie; tsüti kesawa nye ma Apvüwa nkenenwa tsü sa

²nu Israel kadimithu tsütsonca tsü nie wa. Ma amighe pi Baal tsithu ton,

³Hinnom Yyiketijü wi hankedemvu mecang, nu Israel nyithu na atujügüwathu Apvüwa na ayyi ciwi kahang nyi jügüshi kesathu na nankiqanan kekuli sa keten ti ma tsathu lela pi ahhanshathu sapi atsikezhüthu tsü kinyi.

⁴Yyishiphon thu miwi nu achanton cakhu tsüdi wi Anyiza nkechü kekinyipenthu wi Ahaz na ahhanshathu sa nu hankedemvu mecang pi kinyi.

⁵ Kadimi Ahaz kesami ghena Apvüwa ma Nyiza na Siriya kadimi ya ma chaya thsüa nu Judah nyi kejon ssinu Damaska wi atssüzü sa wa neng thsüa. Apvüwa na Israel kadimi Remalia tsa Peka ya Ahaz chaya thsüa nu ghanan kesü wi Judah nyi süpahi aghi kekhangthu 120,000 pathia. Apvüwa mathu bamyithu Nyiza na hati sa thsüa kepaghenanye Judah nyithu na ma teshia.

⁷Israel nyi süpahi kesü ma nyan Zikhri na Maaseiya tsa Kadimi Ahaz kadijjen wi ayen kesenwa Azrikam, nu kadimi ghena benchü keniwa Elkana pathia.

⁸Judah nyithu tsüna mathu diyyi nyi makesü lela Israel nyi süpahizi na nzathu nu ghanyithu 200,000 ghanya nu atsanqai kejon shuya, nu mathu ssisen Samaria wi wa.

⁹Anyi nyan kesü Oded, Apvüwa tusenjüh-kechü kesü na Samaria nyunuti wi hang. Ma Israel nyi süpahithu na Judah nyi atssüzüthu ssisen gho anyunutiwa wi du keten pang wi mathu metuya nu khi, “Apvüwa nthu bamyithu Nyiza na Judah miwi lebentsu nu nthu ya mathu chaya thsüa, isala ma khili nthu na aghepvü nu mathu kepathi hhai tsü zayadha.

¹⁰Nu nthu na khili Judah nu Jerusalem wi nza nu npvüzathu pi nthu nssümaghathu sa thsüle saben. Nthu la sami pi Apvüwa nthu Nyiza shundha kesa nthu na nchü kwe?

¹¹Ijühkina chilo! Atssüzüthu hana nthu cünyuthu nu nthu tssüggüthu le. Mathu ya bvü thsülo, nyelethu Apvüwa ma ghekepvü wina nthu meten cüben.”

¹²Aghawa Kadiyyi wi anyi kemechan mejü, Jehohanan tsa Azariya, Meshillemoth tsa Berekhiya, Shallum tsa Jehizkiya, nu Hadlai tsa Amasa, mathu la süpahizi kekulithu tsü matang.

¹³Mathu khi, “Atssüzüthu tsü ssinu hewi ngho lalo! Ithu na sami pi Apvüwa shun nu ma lebentsu pi ithu kemeten qo sadha. Nthu na khili pala pahan kuli pi ithu kesami jikayi thsüle saben.”

¹⁴Tsalina süpahizi na atssüzüthu nu atsanqai shukeyathu tsüpi anyithu nu mathu ccülikesathu kwen wi chia,

¹⁵nu anyi meshu mejü pi shukeya tsanqaithu witsü athsümeni pi atssüzüthu cü thsüa. Mathu na athsümeni nu accüguwenthu pi mathu pvü thsü, kedsa-kejjü qo pi cü, nu oliv deli pi mathu yisüthu wi chicü. Len ntsen chala kesathu pi gadathu miwi chi, nu atssüzüthu tsüdi ssisen nu Judah nyi yyiwi palm chanton nyunutiwa, Jerikho wi wa neng. Tsaseng wi Israel nyithu na mathu jjen Samaria wi wa neng.

¹⁶Edom nyithu na kheneng Judah yilashu wa nu atssüzüthu kejon ghanya, tsalina Kadimi Ahaz na Assiriya Kadimi Tiglath Pileser wi kekiqa kesun chilo khie chi.

¹⁸Ha tsüwi ha Filistinthu na Judah yyi niduwa yyishiphon ccü wi nu acülawa wi anyutithu yilashu den. Mathu na Beth Shemesh, Aijalon nu Gederoth nyunutithu, nu Soko, Timnah, nu Gimzo nyunutithu pi mathu nyuthu saghu nkaya, nu anuphan ghena ciwi ben wa.

¹⁹Judah Kadimi Ahaz na ma nyithu kemeshenwa tsü bheghe nu Apvüwa matang kesalina Apvüwa na agükeccü sengho Judah miwi chia.

²⁰Assiriya Kadimiwa na Ahaz kekiqawa nyela ma matang nu ma ya agükeccü muya thsüa.

²¹Tsalina Ahaz na Kekinyijjen, kadijjen, nu anyi ccülikesathu jjen wi suna khuya nu sen wa kadimiwa cüa, isala ha ghena lela kiqa meyala.

²²Ahaz na khathansha wi agüccü ntsa sa khe ma kheni mila sami pfü pi Apvüwa shun wa.

²³Ma ahhanshathu sapi ma chaya kesawa Siriya nyi cenpvüthu tsü cü. Ma khi, “Siriya nyi cenpvüthu na Siriya kadimithu kiqa cü, tsalina keujüla hi ahhansha sapi mathu cüthu mathu na hi la kiqa cüben.” Ha ghena kededi sengho ma nu ma mizzatenti miwi chia.

²⁴Tsü miwila ma Kekinyijjen wi atsanqai tsüdi khupi pacha zighe. Ma Kekinyijjen tsü khen nu Jerusalem wi apen tsüdi wi kekinyipenthu sa.

²⁵Ma Judah yyiwi anyunuti nu anyu tsüdi wi Anyiza nkechü kekinyipenthu sa, nu ciwi hankedemvu mecang pi asang cenpvüthu cü. Hatinu ma ketanla Apvüwa mathu bamyithu Nyiza lebenketsu tsü sengho ma miwi chiya.

²⁶Ma kadikesa tsüwi kekuli kepa kesathu aghatsan na wa asakhen kecu tsüdi Judah nu Israel Kadimithu cükikezhü wi zhütheng.

²⁷ Kadimi Ahaz na shü nu pi Jerusalem wi vhüa, isala pi kadi shüjjenthu wi nvhü. Ma tsa Hezekiya na ma shiwa sa kadimi saya.