Read Northern Rengma Naga 2 KHENICÜKI 29 Bible Online

2 KHENICÜKI 29 - Northern Rengma Naga bible

2 KHENICÜKI 29

¹Hezekiya na ma kahang mapi ngwe nu manga wi Judah kadimi saya, nu ma amapi ngwe nu tugu Jerusalem wi kekhang sen. Ma jja na Zekhariya ngawa Abijah.

²Ma ma baqhaiwa Kadimi David tsütsonca nie nu ma Apvüwa kenenwa tsü sa.

³Hezekiya na kadimi sakeya mapi wi asha atuwa wi ma Kekinyijjen kaghapeng-jenkathu tsü sha nu tsüthu sapfüya.

⁴Ma keqhaikedithu nu Levi nyithu akhang kesü cipi Kekinyijjen ccühha nishuwa saghuya,

⁵nu ma ciwi mathu wi khi, “No Levi nyithu, nthu ketanla nthu satemetha nu Apvüwa nthu bamyithu Nyiza Kekinyijjenwa tsü sametha yalo. Kekinyijjen nakhi keten tsanqai tsüdila khupia.

⁶Ithu bamyithu na Apvüwa ithu Nyiza wi jüh tsentsa tsü nsa nu ma nkenenwa tsü sa. Mathu na ma teshia nu ma keben pen wina khapeghe bvüa.

⁷Mathu na Kekinyijjenwa tsü khen, ahulathu kecangki ya nyün thsüa, nu hankedemvu nyelela Kekinyijjen wi mecang pi kekinyi sapi Israel Nyiza ncüla.

⁸Ha ghena Apvüwa na Judah nu Jerusalem miwi lebentsu, nu ma mathu miwi mangwa sachi khe tsüna tsüdi pateqhe nu qhethiketen sa. Nthu na ha mehaitsü chüben.

⁹Aghi wi ithu bathu pathia, nu ithu wubvüthu nu atsangathu ssisen atssüzü sa bvüa.

¹⁰“Hi khili Apvüwa Israel Nyizawa ssinu cenkethenjüh kesü sale südhe yadha, isanu ma ithu miwi leben ntsu thsülale kesalina.

¹¹Isalethu, matsü pi ndedi layilo. Nthu na hankedemvu mecang nu anyithu ssinu ma kinyi thsüle kesalina Apvüwa na nthu kessiyadha.”

¹²Levi nyi hathu na ciwi ben: Kor hath gei wi Amasai tsa Mahath nu Azariya tsa Joel Merari gei wi Abdi tsa Kish nu Jehallel tsa Azariya Gershon gei wi Zimmah tsa Joab nu Joah tsa Eden Elizafan gei wi Shimri nu Jeuel manyi Asaf gei wi Zekhariya nu Mattaniya manyi Heman gei wi Jehuel nu Shimei manyi Jeduthun gei wi Shemaiya nu Uzziel manyi

¹⁵Anyi hathu na ma Levi nyithu saghuya nu mathu ketanla keccüna wi mathu satemethaya. Tsaseng wi kadimiwa na mathu na salo kiza ketheng ti mathu na Apvüwa Yenwa [4] kenie wina keccüna wi Kekinyijjewa tsü satemetha shhu.

¹⁶Keqhaikedithu na Kekinyijjen wi du tsü satemetha, nu mathu na keccüna wi nkemetha tsanqaithu tsüdi sen nu Kekinyijjen ccühha witsü shhu. Ciwi Levi nyithu na tsüthu tsüdi sen nu anyunuti na ameiwa Kidron Yyiketijü wi wa.

¹⁷Asha atuwa wi atsathang atuwa wi kekuli tsü sashhu, nu tazen ghanan wi mathu na Kekinyijjen wi kedulen keshondhiwa tsüpi wwala kekuli tsüdila sa cenya. Tsaseng wi mathu na kepa wila ghanan tazen ghena kuli nu asha tsüwa tagha nu tugho npi kecu chu mathu na Kekinyijjen wi kekinyi ghena kiden-kesha.

¹⁸Levi nyithu na wa hati khipi Kadimi Hezekiya kiza: “Ikhang na keccüna wi Kekinyijjen maben, mecang pi kekinyi ghena kekinyipen, kemetha mesa kechipen miz, nu atsanqai kepathu tsüdi saghula satemethatha sadha.

¹⁹Ikhang na Kadimi Ahaz na Anyiza wi jüh tsentsa nkesa mapi jüwi sen bvü kesa tsanqaithu tsüdila sengho neng, nu ikhang na tsüthu satemetha nengdha le. Tsüthu tsüdila Apvüwa kekinyipen tuwi ben,”

²⁰Nminula Kadimi Hezekiya na anyunuti wi accülikesathu saghuya nu mathu gweghe Kekinyijjen wi wa.

²¹Kekinyi kesü sa nu kadimi theghi nu Judah nyithu kesamithu sen bvü nu Kekinyijjenwa tsü satemetha le kesalina mathu na amesü süpon tagü, khaghaneni tagü, khaghaneni zza tagü, nu aneni tagü tsüti khuya, Kadimiwa na Aaron shicübvügha keqhaikedithu na asahangthu tsüpi kekinyipen miwi ahhanshathu salo kiza.

²²Keqhaikedithu na atuwa amesü süponthu, tsashi khaghaneni, nu tsashi khaghaneni zzathu pathi, nu ahhansha kesa kesüsü jjü pi kekinyipen miwi keghü.

²³Mathu na asakhenwa anenithu tsü ssinu Kadimiwa nu kinyikepen kepathu wi wa nu mathu kwen chang pi tsüthu miwi chi thsü.

²⁴Tsaseng wi keqhaikedithu na anenithu pathi nu anyi tsüdi kesami sen bvü thsüa le kesalina ahhansha sa nu mathu jjü pi kekinyipen miwi keshuchi, kepaghenanye kadimiwa na Israel nyi tsüdi ghena mecang pi kekinyi nu kesami ghena kekinyi salo ahza khuchi theng.

²⁵Apvüwa na kecükegwethu pi kadimi tusenjüh-kechüwa Gad, nu atusenjüh-kechüwa Nathan wina pi Kadimi David kecüthu tsü kadimiwa na nie; ma Levi nyithu ya harp nu simbalthu sen nu Kekinyijjen wi ben thsü,

²⁶Kadimi David na senkegho chünongthu tsüti kesa. Keqhaikedithu na tutuwathu sen nu ciwi ngan.

²⁷Hezekiya na mecang pi kekinyi tsü sachilo ahza khuchi; kekinyiwa tsü sa keshhu wi anyithu na akhwisa pi Apvüwa seng, nu akhwi kechüthu na tutuwa nu achünong kepathu khou.

²⁸Anyi ciwi kebenthu tsüdila kekinyi witsü gweghe, nu akhwisatu keben nu akhwi kepathu sa wa ahhanshathu tsüdi npi kemecangkhi chu sa.

²⁹Isanu Kadimi Hezekiya nu anyithu tsüdi akhhutsüdu Anyiza kinyi.

³⁰Kadimi nu mizzatenti ccülikesathu na Levi nyithu kizala David nu Asaf atusenjüh-kechüwa manyi na keseng khwi zhü kethengthu tsü sapi Apvüwa wi chilo khi. Tsalina anyi tsüdila akhhutsüdu Anyiza kinyi keben wi anonghe ntsa nu akhwi tsü sa.

³¹Hezekiya na anyithu wi khi, “Nthu na khili keccüna wi methadha ghena nkesengcha kekinyi sapi Apvüwa kecü hhanshathu tsü sen gholo.” Mathu na tsü kina, nu mathu pahan na ma kenen wina mecang pi kekinyi sale asahangthu la sengho.

³²Mathu na amesü süpon 70, khaghaneni 100, nu khaghaneni zza 200, mecang pi Apvüwa kekinyi ghena sengho;

³³mathu na amesü süpon 600, nu khaghaneni 3,000 la sengho ahhansha sa nu anyithu ya dsa thsü.

³⁴Ciwi keqhaikedithu na asahangthu tsüdi pathi yakhi nkeben ghena Levi nyithu na kekuli tsü npi sacen keya chu mathu kiqa. Tsaseng wi keqhaikedithu kejon na keccüna wi mathu satemethaya. (Lev nyithu na keccüna wi kemetha ghena keqhaikedithu miwi tsatanki.)

³⁵Ahhansha kesathu maben pi mecang kesa tsü miwi keqhaikedithu na ahhansha sa anyithu na dsa ketenwa wi ma kethu pi kemecang, nu mecang pi kekinyi wi kisengtssü pi keshuchi kesa tsüna mathu dulu. Isanu Kekinyijjen wi kekinyiwa tsü sa neng shhu.

³⁶Kadimi Hezekiya nu anyithu na anonghe ntsa sa, kepaghenanye Anyiza na mathu kiqa pi hathu tsüdi wan saya thsüa.