Read Northern Rengma Naga 2 KHENICÜKI 30 Bible Online

2 KHENICÜKI 30 - Northern Rengma Naga bible

2 KHENICÜKI 30

¹ Anyithu na asha atuwa witsü matsü wina Shhukeya Kho tsü kemini sa meyala ghodha, kepaghenanye keqhaikedithu kejon na keccüna wi nmetha nu anyi kejon na Jerusalem witsü saghu meyala. Tsalina Kadimi Hezekiya na ma kekhu wi kedithu, Jerusalem wi anyithu na asha keniwa wi kemini tsü sale cenya, nu kadimiwa na ajüh kesun pi Israel nu Judah nyi tsüdi wi chia. Ma tsü miwi lesüzhü pi Efraim nu Manasseh mizzathu ya ghola Jerusalem wi Kekinyijjen wi Apvüwa Israel Nyizawa tsü kekinyikü wina Shhukeya Kho kemini tsü salo cichi.

⁴Kadimiwa nu anyithu na mathu kiden kebenwa tsü nen,

⁵tsalina mathu na aghawa Dan wina wa acülawa Beersheba kecu wi Israel nyi tsüdi cishi pi ghola anyi kheni miwi jikayila Ayenwa kenie wina Shhukeya Kho tsü kemini sale sa.

⁶Nyilothu na kadimiwa ahza khukechi wina wa, nu ma kekhu wi kedithu na cikechi jüh ha sen nu Judah nu Israel yyi tsüdi wi wa: “Israel nyithu, Assiriya nyi ayyi ha nka kegho wi nthu hang yadha. Tsalina khili Abraham, Isak, nu Jakob, Nyiza Apvüwa wi kheneng gholo; isathu ma la nthu wi gho neng ben.

⁷Nthu bamyithu nu nthu pvüshang Israel nyithu na Apvüwa mathu Nyiza wi jüh tsentsa nkesa tsüti sa nbenla. Ma mathu meten ntsa kesa tsü nthu na muyaben.

⁸Mathu ti leben-dhu nbenla isala Apvüwa jüh kinalo. Apvüwa nthu Nyiza na anuphan ghena sapi metha kethengwa Jerusalem wi Kekinyijjen witsü gho ma kinyilo, isathu ma nthu miwi ma lebentsu nbendha.

⁹Keujüla nthu na Apvüwa wi kheneng gho lethu, nthu shilithu ssinu atssüzüthu sa bvü kesathu na mathu nantizen chi nu mathu yala ajjen wi gho neng thsüaben. Apvüwa nthu Nyiza na nantizen nu ccatssüden, tsalina keujüla nthu na ma wi kheneng gho lethu ma nthu ssiyaben.”

¹⁰Nyilothu na Efraim nu Manasseh mizzathu yyiwi anyunuti tsüdi wi nu aghawa Zebulum mizza kecu wi wa, isala anyithu na mathu nankeqhe nu mathu khipi keponsa sa.

¹¹Isalela Asher, Manasseh, nu Zebulum mizzathu wi anyi pahan na Jerusalem wi gho mvu ben.

¹²Anyiza la Judah wi kulichi nu kadimiwa nu ma kekhu wi kedithu na ahza khukechi tsü kenie wina anyithu na mathu kemeshen keyali nu Apvüwa jüh kinale saya.

¹³Asha keniwa wi anyitenti na Jerusalem wi Azimi nkechi Mesa pi Kemishu Kho kemini tsü sale kesa ghena saghuya.

¹⁴Mathu na Jerusalem wi ahhanshathu sapi kinyi nu hankedemvu kemecang wi kesen kekinyipenthu tsüdi pieya nu tsüthu sen wa Kidron Yyiketijü wi khala.

¹⁵Nu tsü sha taghamejü ghanan wi mathu na Shhukeya Kho hhansha ghena khaghaneni zzathu pathi. Keqhaikedithu nu Levi nyi keccüna wi nkemethathu kejügheya ntsa sa isanu Apvüwa wi mathu satemetha chi, nu mathu na khilitsü Kekinyijjen wi ahhansha mecang pi kekinyithu saya mehai.

¹⁶Mathu na Anyiza nyiwa Mosa Yenwa wi kecükegwethu kenie wina Kekinyijjen wi mathu ben saya. Levi nyithu na ahhanshathu jjü tsüpi keqhaikedithu cü nu mathu na tsüpi kekinyipenwa tsü keghü.

¹⁷Kepaghenanye anyi kejon na keccüna wi nmetha nu mathu na Shhukeya kho khaghaneni zzathu tsü pathi meya, tsalina Levi nyithu na mathu ghena tsü sa cü nu khaghaneni zzathu satemetha pi Apvüwa wi chi.

¹⁸Tsü miwi, Efraim, Manasseh, Issakhar, nu Zebulum mizzathu wina kegho anyi kejon na keccüna wi satemetha kekuli tsü nsa, tsalina mathu na mehaitsü Shhukeya Kho tsü nsa. Kadimi Hezekiya na mathu ghena kekhie ha sa;

¹⁹“No Apvüwa, ithu bamyithu Nyiza, anyithu na keccüna wi nmetha lela mathu leben tsentsa sa nu no kinyi kebenthu ha no kemehai wina mathu kesami teshi cülo.”

²⁰Apvüwa na Hezekiya kekhie luneng cü; ma anyithu kesami teshi cü nu mathu npatenala.

²¹Ghanan tagü anyithu na Jerusalem wi saghu nu mathu nonghe ntsa sala Azimi nkechi Mesa pi Kemishu Kho tsü mini, nu ghanan kaghapenla Levi nyithu nu keqhaikedithu na mathu kezü tsüdi sen nu Apvüwa seng.

²²Levi nyithu na Apvüwa kekinyi wi sapichü ntsa kesa ghena Hezekiya na mathu seng. Ghanan tagü mathu ahhanshathu sapi Apvüwa, mathu bamyithu Nyizawa tsü keseng kekinyi kesa sengwi,

²³mathu tsüdi hela ghanan tagü kemini sale südheya. Tsalina mathu anonkeghe sa nu tsü mini.

²⁴Kadimi Hezekiya na amesü süpon 1,000 nu khaghaneni 7,000 khuchi, nu kedithu na amesü süpon 1,000 nu khaghaneni 10,000 khuchi, anyithu na tsü pathi nu dsa. Keqhaikedithu kejon na satekemetha keccüna tsü sa.

²⁵Tsalina Judah nyithu, keqhaikedithu, Levi nyithu, ayyi aghawa wina kegho nyithu, nu asangthu Israel nu Judah jawi anuphan hangwa kesathu, anyi tsüdila anonkeghe sa.

²⁶Jerusalem nyunutiwa wi anonkeghe na pong, kepaghenanye David tsawa Kadimi Solomon sengwi mangla hati npi sa.

²⁷Keqhaikedithu nu Levi nyithu na Apvüwa kesawegü khie pi anyithu miwi chi. Anyiza na tangwi ma jjen wi ben nu mathu kekhie kina cü nu mathu yaya.