Read Northern Rengma Naga 2 KHENICÜKI 31 Bible Online

2 KHENICÜKI 31 - Northern Rengma Naga bible

2 KHENICÜKI 31

¹Akho kesa cen sengwi Israel nyi tsüdi Judah nyunuti tsüdi wi wala alon kishengthu tsü pakhhi, acenpvü nzawa Asherah tsikezhüthu kihhecha, nu kekinyipenthu nu Anyiza nkechü kekinyipenthu tsü yasa. Mathu na Judah yyi kepathu, Benjamin, Efraim, nu Manasseh tsüdi wi tsü makesü sa; tsaseng wi mathu tsüdi ajjen wi wha neng.

²Kadimi Hezekiya na Keqhaikedithu nu Levi nyithu pi mehaitsü azizi sa nu mathu pi papa kekuli wi kecükepeng chia. Tsüthu tsüna mecang pi kekinyi, kecca ghena kekinyi, Kekinyijjen wi kekinyi kesa, nu Kekinyijjen wi nkesengcha nu keseng pi Apvüwa kekuli kesathu saghu.

³ Ma ketanla ma ji jawi asahangthu khupi aghanen nu minulen kaghapen mecang pi kekinyithu, nu Sabbath tsathang, Asha Ketheü Kho, nu Apvüwa Yenwa, nsathu keyishü akho kepathu wi kesen tsüdi khuchi.

⁴ Tsü miwi, kadimiwa na Jerusalem nyithu kizala mathu ya pi Levi nyithu nu keqhaikedithu na keyau kebenthu khukechi tsü sengholo, isanu mathu ya Ayenwa kenie wina matsü tsüdi pi Apvüwa cü thsüle kesalina.

⁵Ahza tsü khuchi meyi Israel nyithu na mathu ju kemehai ntsa asu, kisengtssü, oliv deli, anikholi, nu mathu lli wi mukeya kepathu khuchi, nu mathu na mukeya pala tsüdi wi gishü tagha [5] wi kesü la sen nu gho.

⁶Judah nyunutithu wi hang kebenthu anyi tsüdila mathu mesüsi nu khaghanenithu gishü tagha wi kesü, nu mathu na aju kejon satemetha pi Apvüwa mathu Nyiza cü kesathu la sengho.

⁷Asha kechengwa nten na ajuthu tsü khuchi wa tsü senwa asha mejü kecu tsü saghu.

⁸Kadimi Hezekiya nu ma kekhu wi kedithu na khaju khuchidha khe mukeya wi mathu na Apvüwa seng nu mathu Israel nyithu seng.

⁹Kadimiwa na aju khukechi ha ghena khipi keqhaikedithu nu Levi nyithu kiza,

¹⁰nu Zadok shicübvügha kesü keqhaikedi ntsawa Azariya na ma wi khi, “Anyithu na mathu juthu sengho Kekinyijjen wi chi keshagha wi kedsa qo kejon ben, nu gilli kejonla bendha. Apvüwa na sawegü pi ma nyithu kecü ghena ithu na ha tsüdi bendha.”

¹¹Kadimiwa na ahza khukechi kenie wina mathu na Kekinyijjen kete wi keben ketheng jjenthu saya,

¹²nu ajuthu nu gishü tagha wi kesü tsüdi pi ciwi mehaitsü thengya. Mathu Levi nyi kesü ma nyan Konania pi tsü kaghangwa sa nu ma cünyuwa Shimei pi ma kekiqawa sa thsüa.

¹³Manyi kekhu wi Levi nyi tagha pi kekuli sa thsü: Jehiel, Azariya, Nahath, Ashel, Jerimoth, Jozabad, Eliel, Ismakhiya, Mahath, nu Benaniya. Ha tsüdila Kadimi Hezekiya nu Keqhaikedi ntsawa Azariya kekhang kekhu wi sa.

¹⁴Imna tsa Kore, Levi nyi kesü Kekinyijjen kaghapeng-jenka nishuwa kehie kediwa na ajuthu pi Apvüwa wi khukechi tsü khuya nu pi mathu kegishü wi kaghangwa sa.

¹⁵Keqhaikedithu na hang keben nyunuti kepathu wi Levi nyithu: Eden, Miniamin. Jeshua, Shemaiya, Amariya, nu Shekaniya hathu na jühtsentsa sa ma kiqa. Mathu na kedsa-kejjü meceqe pi Levi nyithu mathu kekuli kenie wina gishü cü,

¹⁶tsüna mathu gei kenie wina nye. Mathu na npvüzathu kahang mapi changha nu tsüna ameiwa mabenla Kekinyijjen wi mathu pen kenie wina atsathangla kekuli ghena ashei kesüsü pi cü.

¹⁷Kekuli pi Keqhaikedithu mathu gei kenie wina dhen chi, nu Levi nyithu kahang mapi ngwe nu tsüna ameiwa pi mathu kekuli khang kepapa kesa wi mathu kekuli pi dhen chi cüa.

¹⁸Mathu tsüdi pi mathu wubvüthu, tsangathu, nu mathu maghaki ketenthu saghula anyanzhüya, kepaghenanye mathu na matsü katsüha lela mathu kekuli kemethawa tsü sale kiden nbenthu yishü.

¹⁹Aaron shicübvügha keqhaikedithu anyunutithu wi hang nyelela anyunuti hathu ji amou wi kahangthu kekuli pi dhen chitheng, ciwi anyi pahan na kedsakejjü pi keqhaikedi theghi wi npvüza tsüdi nu Levi nyi geithu wi kebenthu tsüdi kegishü tsüna mathu khhi.

²⁰Kadimi Hezekiya na Judah yyi tsüdi wi kemeshonwa nu Apvüwa ma Nyiza kenenwa tsü sa.

²¹Ma alentagha wi haicen, kepaghenanye ma Kekinyijjen ghena nyelela ayenwa kenie kekuli wi ma leben tsüdi sen nu ma Nyiza jühkeya wina sa.