Read Northern Rengma Naga 2 KHENICÜKI 32 Bible Online

2 KHENICÜKI 32 - Northern Rengma Naga bible

2 KHENICÜKI 32

¹Kadimi Hezekiya na jühtsentsa sa nu Apvüwa kekuli kesa sengwi Assiriya Kadimi Sennakherib na Judah nkagho. Ma gho anyunuti khwetivü kethengthu tsü vüya nu ma süpahizi na akhwetithu tsü shunsha sen nu dulo ahza khuchia.

²Khathansha wi Hezekiya na Sennakherib na gho Jerusalem la ssikaghashen le keben muya khe,

³ma nu ma kekhu wi kedithu na Assiriya nyithu na Jerusalem tetsaki kegho wi atssü mu meya thsüla le kesalina anyunuti na ameiwa wi atssülen tsü padhiale südheya. Kedithu na anyi kejon ssishhula atssükebvüpen tsüdila khen, isanu tsüthu wi atssü nlle shhugho thsüla.

⁵Kadimiwa na akhweti, tsü miwi aducükezhü kemisithu, nu akhweti ameiwa sapfüya nu anyunutiwa ghikehie penthu tsü satezüya. Tsü miwi ma Jerusalem kaghawenwa nishuwa ayyi pvüchi nu ghikehiepen sa ketheng tsü sapfüya. Ma apie nu atsonhithu la kejon saya.

⁶Ma anyunuti wi anyi tsüdi pi süpahizi kedithu kekhu wi chi nu mathu ya anyunuti kaghapeng-jenka kete wi saghu thsü. Ma mathu wi khi,

⁷“Lebenzü nu kempvüza sayalo, nu Assiriya nyi kadimiwa nyelela ma ssiketen süpahizi tsü nmessi lalo. Ma kekhang keben miwi ithuwa kekhang jikayi ben.

⁸Ma anyi kekhang ben, isala ithu tsü Apvüwa ithu Nyiza na ithu kiqa ben nu ithu ghena aghisa ben.” Anyithu na mathu kadimiwa jüh hathu ghena mathu satezü ntsa saya.

⁹Matsü pahan sengwi Sennakherib nu ma süpahizi na Lakhish wi keben wi ma ketsijüh ha kesun pi Hezekiya nu Judah nyithu Jerusalem wi ma gweghe kebenthu wi chi:

¹⁰“Hi, Sennakherib, Assiriya Kadimiwa, mangwa na kempvüza pi nthu cü nu Jerusalem vükeya sengwi ciwi benya ben nu keüben.

¹¹Hezekiya na Apvüwa nthu Nyiza na ithu kekhang wina nthu hangshaya benle kizaben. Isala Hezekiya na nthu mechu ben nu nthu ya kaghama nu kedighe wi shü thsüale saben.

¹²Ma Apvüwa kemethapen nu kekinyipenthu yasa nu Judah nu Jerusalem nyithu ya kekinyipen kesütan wi kinyi nu hankedemvu mecanglo kekizawa tsü le.

¹³Nthu na ibamyithu nu hi anyi mizzatenti kepathu miwi khati sachi khe nchü kwe? Mizzatenti kepathu cenpvüthu na Assiriya Kadimi kekhang wina mathu nyithu hangshaya kwe?

¹⁴Kusi diyyi hathu cenpvüthu kesüla ithu kwen wi mathu diyyiwa hangshaya nu? Isalethu, mangwa na nthu sapi nthu cenpvü na nthu hangshaya benle meshen thsü ben nu?

¹⁵Tsalina khili Hezekiya yala tsüti nthu mechu nyelela lentsütson zzi nsa thsüla yilo. Ma n-nondila! Mizzatenti kesü cenpvü la Assiriya kadimithu kwen wina ma nyithu npi hangshaya. Tsalina nthu cenpvü ha la nthu hangshaya nben kesa chüti benle!”

¹⁶Assiriya nyi kedithu na ha miwi la nkemehaiki Apvüwa Anyiza nu Apvüwa maghawa Hezekiya cüki khi.

¹⁷Kadimiwa na lesüzhü kechi tsüna Apvüwa Israel Nyizawa matang. Tsüna hati khi, “Mizzatentithu cenpvüthu na hi kekhang wina mathu nyithu hangsha meya, nu Hezekiya cenpvü lela ikwen wi ma nyithu hangshaya nben.”

¹⁸Kedithu na Ibri jüh wina hati magha nu Jerusalem nyithu anyunutiwa khweti miwi kebenthu yala messi nu accükwenshü thsüale kesalina, isanu mathu lekete anyunutiwa tsü nkayale kesalina.

¹⁹Mathu na anyi kepa wi cenpvüthu, anyi kwen pi kesa atsikezhüthu cüki kekhi tsü makesü Jerusalem Nyizawa cüki la khi.

²⁰Tsaseng wi Kadimi Hezekiya nu Amoz tsa Isa atusenjüh- kechüwa manyi Anyiza wi kekhie sa nu maghala ma wi kekiqa khie.

²¹Apvüwa na tangnyilo kesü kesun pi Assiriya nyi süpahizi kedithu nu süpahithu pathi thsüa. Tsalina kadimiwa na ma ccükwenshüla Assiriya wi wha neng. Ghanan kesü ma ma cenpvü kekinyijjen wi keben ma tsathu pahan na mathu njünnu pi ma süthia.

²²Hatinu Apvüwa na Assiriya kadimiwa Sennakherib kekhang nu mathu ghinyithu kepa kwen wina la Kadimi Hezekiya nu Jerusalem nyithu kekashaya. Ma anyithu ya mathu kete wi diyyithu ssinu kecca wi hangya thsüa.

²³Anyi kejon na mathu kekinyithu sen nu Apvüwa wi Jerusalem wi gho nu ajuthu sengho Hezekiya cü, isanu tsü nten na mizzatentithu tsüdila Hezekiya nyuwakü wa.

²⁴Ha tsüwi ha Kadimi Hezekiya na naa pi shü keten ti sa wa. Ma kekhie sa, nu Apvüwa na ma mehaiya ben kesa zensu kesü pi ma cü.

²⁵Isala Hezekiya na Apvüwa na ma ghena mangwa sachi cü khe tsüghena awisa wa nu keseng pi ncüla, nu Judah nu Jerusalem na tsüghena ketizensa.

²⁶Asakhen wi Hezekiya nu Jerusalem nyithu na mathu satemeni chi, nu Apvüwa na Hezekiya npi keshü chu mathu nmetenla.

²⁷Kadimi Hezekiya na ben ntsa sa shagha, nu anyi tsüdila ma kinyikü. Ma suna, rükatssü, alon menkedhu, cüdemvu, atsonhi, nu atsanqai menkedhuthu ghena keben ketheng-jjen saya.

²⁸Tsü miwi ma asu, kisengtssü, nu oliv deli ghena keben ketheng-jjen saya; ma mesüsi nu khaghanenithu ghena ajjen la saya.

²⁹Ha tsüdi miwi Anyiza na amesüsi, khaghaneni, nu keben-keyeng kepa wi sha ntsawa pi ma cü nu ma anyunuti kejon saya,

³⁰Kadimi Hezekiya na Gihon Tssükebvüpen llekewa len tsü khen nu atssü hhisen wa Jerusalem khweti non wi chia. Hezekiya na kekuli tsüdi wi haicenya,

³¹nu Babilon nyi mithonthu na ayyi ciwi kekuli makepa sa kesathu cüki keü kegho wi lela Anyiza na Hezekiya ya ma kemeshen sa thsüa, ma yencüki ghan-nan le kesalina.

³²Kadimi Hezekiya kekuli cüki nu ma Apvüwa wi lebenkechi tsüdila Amoz tsa Isa atusenjüh-kechüwa na kemanthi cüki wi nu Judah nu Israel Kadimithu cükikezhü wi zhütheng.

³³Hezekiya na shü nu pi kadi shüjjenthu meiwa wi vhüa. Ma keshü wi Judah nu Jerusalem nyithu tsüdila ma kinyikü ntsa sa. Ma tsa Manasseh na ma shiwa sa kadimi saya.