Read Northern Rengma Naga 2 KHENICÜKI 33 Bible Online

2 KHENICÜKI 33 - Northern Rengma Naga bible

2 KHENICÜKI 33

¹Manasseh na ma kahang mapi taghakeni wi Judah kadimi saya, nu ma amapi deni nu manga Jerusalem wi kekhang sen.

² Apvüwa na ma nyithu na atujügü kewa wi ayyi ciwi kahang mizzatenti kepathu jügüshi kesathu na nankiqanan kekuli yenthu tsü Manasseh na tsüthu sa nu sami pi Apvüwa shun.

³Ma ma ba Hezekiya na yasa kesa Anyiza nkechü kekinyipenthu tsü sapfü neng. Ma Baal kekinyipenthu, acenpvü nzawa Asherah tsikezhüthu sa, nu ghotsithu kinyi.

⁴ Ma khi ketheng pen, Apvüwa na anuphanla ciwi ma kinyi ben kesa Kekinyijjen witsü Anyiza nkechü kekinyipenthu sa.

⁵Kekinyijjen ccühha keni wi ma ghotsithu kekinyi ghena kekinyipenthu sa.

⁶Ma ma tsathu pi Hinnom Yyiketijü wi ahhansha sa nu mecang pi kekinyi sa. Ma chuchünyi, cenpvü ccüneng kekuli sa, nu atusenkekhithu nu keshü ghamu keccünengthu wi kecenkinali. Ma sami pi Apvüwa shun ntsa sa nu ma lebenketsu cüssi.

⁷ Ma atsikezhü kesü pi Kekinyijjenwa wi chi, apen tsüwa cüki Anyiza na pi David nu ma tsa Solomon manyi wi kekiza na hati: “Hewi Jerusalem wi Kekinyijjenwa ha hi Israel mizza taghakeni tsüdi yyi jawi kessishi pi hi kekinyipen sa keyawa tsü.

⁸Keujüla Israel nyithu na iyenkhukechi tsüdi nie nu imaghawa Mosa na Ayen pi mathu kecü tsü maben kina lethu, hi ayyi pi mathu bamyithu kecü witsü na nyu ya mathu jügüshi thsü nben,”

⁹Manasseh na Judah nyithu ssi wa Apvüwa na ma nyithu na atujügü kewa wi ayyi ciwi kahangthu jügüshi kesathu kesami miwi diki sami thsüa.

¹⁰Apvüwa na Manasseh nu ma nyithu kitsanchi lela mathu na nkina mvu.

¹¹Tsalina Apvüwa na Assiriya nyi süpahizi benchüthu yala Judah nkaya thsüa. Mathu na Manasseh ghanya, assüli pi ma bhen nu adhasü pi ma vüsen Babilon wi wa.

¹²Ma ketizenkesa wina ma satemeni sen Apvüwa ma Nyiza wi gho ma kekiqa khie wa.

¹³Anyiza na Manasseh kekhie yacü nu ma Jerusalem wi whala kekhang sen neng yathsü. Ha ghena Manasseh na Apvüwa tsüna Anyiza le kesa chüya.

¹⁴Ha sengwi Manasseh na David Nyunutiwa kaghapeng meiwa khweti nishuwa tsü kemisi sapi misi kayi, tsüna aghawa Gihon Tssükebvüpen kete yyiketijü wina wa Anga Kaghapeng-jenka nu Ofel nyunutiwa kecu. Ma süpahizi wi kedi kesü pi azi kesü wi benchüwa sala pi Judah nyunutithu khwetivü ketheng kesüsü wi la ben thsüa.

¹⁵Ma asang cenpvüthu nu atsikezhü pi Kekinyijjen wi chi ketheng tsü nu Kekinyijjen keben pen yikha miwi nu Jerusalem wi apen kepathu wi Anyiza nkechü kekinyipenthu tsü khupia; ma hathu ha tsüdi sen nu anyunuti na ameiwa shhu nu pi khala.

¹⁶Ma Apvüwa kinyi keten kekinyipenwa tsü la sapfü, nu ma kecca ghena kekinyi nu nkesengcha ghena kekinyithu pi tsü miwi ahhansha sa. Ma Judah nyi tsüdila Apvüwa, Israel Nyizawa tsü kinyilo kiza.

¹⁷Anyithu na apen kepa wi ahhanshathu sapi kinyiten lela mathu na tsüthu pi Apvüwa ketan kinyi wa.

¹⁸Manasseh na kekuli cüki tsüdi, ma Nyiza wi kekhie kesa, nu atusenjüh-kechüwa na Apvüwa, Israel Nyizawa nyan wina ketsijühthu pi ma kekiza, tsüdila Israel Kadimi cükikezhü wi zhütheng.

¹⁹Kadimiwa kekhie kesa nu Anyiza na tsü keluneng, nu ma leben npi khapeghekeya wi kesamithu —ma nkemehai kekuli, Anyiza nkechü kekinyipenthu nu ma kesa acenpvü nzawa Asherah tsikezhü nu ma atsikezhü kekinyi —tsüdila atusenjüh-kechüthu cükikezhü wi zhütheng.

²⁰Manasseh na shü nu pi kadijjen wi vhüa, nu ma tsa Amon na ma shiwa sa kadimi saya.

²¹Amon na ma kahang mapi ngwe nu keni wi Judah kadimi saya nu ma amapi keni Jerusalem wi kekhang sen.

²²Ma ba Manasseh ti ma sami pi Apvüwa shun, nu ma ba na kesa atsikezhüthu tsü kinyi.

²³Isala ma ma ba ti ma satemeni nu Apvüwa tuwi ngho; ma ma ba miwi kesami jikayi sa.

²⁴Amon kekhu wi kedithu na acho sapi ma shun nu kadijjen wi ma pathia.

²⁵Judah nyithu na Amon kepathithu pathi nu ma tsa Josiya pi kadimi sa thsüa.