Read Northern Rengma Naga 2 KHENICÜKI 34 Bible Online

2 KHENICÜKI 34 - Northern Rengma Naga bible

2 KHENICÜKI 34

¹ Josiya na ma kahang mapi tazen wi Judah kadimi saya nu ma amapi changha nu kesü Jerusalem wi kekhang sen.

²Ma Apvüwa kenenwa tsü sa; ma ma baqhaiwa Kadimi David tsütsonca tsü nie nu Anyiza yenthu tsüdila mehai tsü nie ya.

³Josiya na kadimi sa keya mapi tazen, ma ghanyi ntsa sa keben tsüwi na ma baqhai Kadimi David Nyiza tsü kinyi shagha. Amapi mejü sengwi ma Anyiza nkechü kekinyipenthu, acenpvü nzawa Asherah tsikezhüthu, nu atsikezhü kepathu tsüdila yasa shagha.

⁴ Ma nyithu na ma jüh kina nu Baal kekinyipenthu nu tsüthu kete wi hankedemvu pi kekinyipenthu tsü pacha. Mathu na Asherah tsikezhüthu nu atsikezhü kepathu tsüdi pi toncha nu tsaseng wi ketoncha qan tsüpi anyi tsüthu kekinyithu shüjjen miwi vvü zighe.

⁵ Ma Anyiza nkechü keqhaikedithu güthu tsüpi mathu na kinyi keten kekinyipenthu miwi mecang. Ma hathu ha tsüdi kesa wina Judah nu Jerusalem sapi keccüna wi metha neng thsüa.

⁶Ma tsü makesü anyunutithu nu Manasseh, Efraim, nu Simeon, nu aghawa Naftali yyithu kecu yasa ketheng wi la sa.

⁷Ma aghawa kadiyyi tsüdi wi kekinyipenthu nu Asherah tsikezhüthu tsü toncha pia, nu hankedemvu pi kekinyipenthu tsüdi pacha zighe. Ma tsaseng wi Jerusalem wi kheneng ghoa.

⁸Ma kadikesa mapi tagha nu tazen wi ayyiwa nu Kekinyijjenwa wi Anyiza nkechü kekinyi satemetha kesa sengwi Kadimi Josiya na meshu kecheng kesun pi Apvüwa Anyiza Kekinyijjenwa tsü sapfü wa thsü: Azaliya tsa Shafan, Jerusalem wi ahngwa Maaseiya, nu Joahaz tsa Joah kedi nyi kesü.

⁹Kekinyijjen wi Levi nyi aghikehiethu na saghu keya apisa tsüpi Keqhaikedi ntsawa Hilkiya kwen wi chia. (Tsüna Efraim, Manasseh nu aghawa kadiyyi nyithu, nu Judah, Benjamin, nu Jerusalem nyithu wi saghu keya.)

¹⁰Apisa hapi Kekinyijjen kesapfü wi kedi meshu kecheng kwen wi chia, nu mathu na tsüpi

¹¹achan kecühthu nu ajjen kesathu cü nu pi alon nu kaha chanthu shü pi Judah kadimithu na pi mme thsü kesa ajjenthu kesapfü wi sen thsü.

¹²Anyi kekuli tsüwa kesathu na tsatan ntsa. Levi nyi meshu mejü: Merari gei wi Jahath nu Obadiya manyi, nu Kohath gei wi Zekhariya nu Meshullam manyi na mathu kekuli ghang. (Lev nyithu tsüdila akhwi kechü ntsa.)

¹³Levi nyi kepathu na atsanqaithu pvü kemili nu kekuli nyithu na kekuli kepapa kesathu tsü ghang, nu kepathu na zhü kethengthu tsüpi tsanqai nyelela aghikehie kekuli sa.

¹⁴Atsanqai ketheng jjen wi apisa khushi keben wi Hilkiya na Apvüwa Yenwa lesüshen kheni Anyiza na pi Mosa kecü Yenwa tsü muya.

¹⁵Ma Shafan wi khi, “Hi hewi Kekinyijjen wi Ayenwa lesüshen tsü muyadha.” Ma lesüshenwa tsüpi Shafan cü,

¹⁶nu Shafan na tsü khusen wa kadimiwa cü nu khi, “No kekiza tsü ithu na tsüdila sadha.

¹⁷Ithu na Kekinyijjen wi apisa tsü khushi sen wa kekulithu nu mathu kessithu kwen wi chi cüdha.”

¹⁸Tsaseng wi ma khi, “Hi Hilkiya na lesüshen kesü pi hi kecü ben le.” Nu ma tsü misikhhali si pi kadimiwa kiza.

¹⁹Kadimiwa na lesüshen tsü si keben zakeya wi ma hathakina wina ma thsümeni mezüqhe

²⁰nu ahza ha pi Hilkiya, Shafan tsa Ahikam, Mikaiya tsa Abdon, ajüh kekaghatenpen wi kezhüwa Shafan, nu kadimi tsikekinawa Asaiya hathu cü:

²¹“Wala ighena nu anyi khilila Judah nu Israel wi kebenthu ghena Apvüwa ccüneng nanlo. Lesüshen hawi kesansijühthu bhashiya. Apvüwa na ithu miwi lebentsu ben, kepaghenanye ithu bamyithu na Apvüwa jüh nkina nu lesüshen hawi salo kekhithu tsü nsa.”

²²Kadimiwa na ahza khukechi kenie wina Hilkiya nu kepathu na nza atusenjüh-kechü kesü ma nyan Hulda, Jerusalem wi apen ketheü wi hang ketenwa wi wa kecenkinali. (Ma wuba na Harha tsa Tikva tsawa Shallum, Kekinyijjen wi athsümeni kaghangwa.) Mathu na khati sa khe khipi ma kiza,

²³nu nzawa na mathu wi kadimiwa wi whaneng nu

²⁴Apvüwa wi ketsijüh ha pi ma cülo mathu kiza: “Hi lesüshen zhü ketheng pi kadimiwa wi si kechi kishen-keshithu tsüpi Jerusalem nu ciwi kahangthu tsüdi meten cüden.

²⁵Mathu na hi meya mvula ahhanshathu sapi acenpvü kepathu kinyi nu mathu kekuli tsüdila ilebenketsu cüssidha. Jerusalem miwi ilebentsu ntsa sadha, nu tsüna gha nbendha.

²⁶Kadimiwa ghena, hi Apvüwa, Israel Nyizawa na ha khiben: No lesüshen hawi zhü kethengthu kina,

²⁷nu nleben khapeghe nu ituwi no satemeni, nthsümeni mezüqhe nu qai, no hi khati Jerusalem nu ma nyithu meten cüle pateqhe kechi tsü za keya wi, hi no kekhie zayadha.

²⁸nu hi kemeten pi Jerusalem miwi chile kesa tsüna no npi keshü tsü sengho nben, hi no ya cca shü thsüaben.” Anyithu na ketsijüh ha sen nu Kadimi Josiya wi gho neng.

²⁹Kadimi Josiya na Judah nu Jerusalem wi ccülikesathu tsüdi cighu chi,

³⁰nu mathu saghula keqhaikedithu, Levi nyithu, nu anyi kepathu tsüdi, keban nu ketha-uthu gweghe Kekinyijjen wi wa. Mathu tsüdi tuwi kadimiwa na Kekinyijjen wi mukeya cenkethenjüh lesüshenwa tsü maben misikhhali sichi.

³¹Ma kadi ketonbvü kete wi ngan nu Apvüwa jühkina, ma leben nu kahang tsüdi pi ma yenthu nu ayenkhukechithu tsüdi nie, nu lesüshenwa wi zhü ketheng cenkethenjüh wi kekhithu tsüpi kekuli sale kesa ghena ma ssinu cenkethenjüh kesü sa.

³²Ma Benjamin nyithu nu Jerusalem wi anyi ciwi kebenthu tsüdila cenkethenjühwa tsü niele kesa khishi thsüa. Tsalina Jerusalem nyithu na mathu bamyithu Nyiza ssinu cenkethenjüh kesa wi kekhithu tsü nie.

³³Kadimi Josiya na ayyi ciwi Israel nyithu ji nankiqanan atsikezhüthu tsüdila yasa, nu ma hang keben chu ma anyithu yala Apvüwa, mathu bamyithu Nyizawa kekuli sa thsü.