Read Northern Rengma Naga 2 KHENICÜKI 35 Bible Online

2 KHENICÜKI 35 - Northern Rengma Naga bible

2 KHENICÜKI 35

¹Kadimi Josiya na Apvüwa kinyikü wina Jerusalem wi Shhukeya Kho kemini sa; mathu na asha atuwa taghamejü ghanan wi akho ghena asahangthu pathi.

²Ma keqhaikedithu na Kekinyijjen wi mathu kekulithu tsü salo pi dhen chi, nu mathu na mehaitsü tsüthu salo mathu kechü-kenong chi.

³Ma kecükegwe hathu pi Levi nyithu, Israel kesansithu, mathu pi Apvüwa wi satemetha chi kesathu cü: “David tsawa Kadimi Solomon na kesa Cenkethenjüh Khitson kemethawa tsüpi Kekinyijjen wi chiya. Nthu na tsü pvü nu apen kesü wina kesü wi wa nbendha, isala nthu na Apvüwa nthu Nyiza nu ma nyi Israel kekuli sa ben.

⁴ Kekinyijjen wi nthu gei kenie wina nthu pen saya, tsüna Kadimi David nu Kadimi Solomon na akhhi pi nthu dhen kechi tsü kenie wina,

⁵nu nthu pahan na Israel nyi theghi kesüsü kiqayale kesalina kiden yalo.

⁶Nthu na Shhukeya Kho ghena khaghaneni zza nu anenithu pathi ben. Khili keccüna wina nthu satemetha nu ahhanshathu kidenya, tsüna no Israel nyithu na Apvüwa na Mosa wina pi kecü kecükegwethu tsü nie yale kesalina.”

⁷Anyithu na Shhukeya Kho wi kesen ghena Kadimi Josiya na ma sahangthu jawi khaghaneni, khaghaneni zza, nu aneni zza, 30,000 nu amesü süpon 3,000 khuchi.

⁸Ma kekhu wi kedithu la anyithu, keqhaikedithu, nu Levi nyithu kesen ghena khuchi. Nu Kekinyijjen wi kedithu — Keqhaikedi ntsawa Hilkiya, Zekhariya, nu Jehiel — khaghaneni zza nu aneni zza 2,600 nu amesü süpon 300 pi akho sa keben jüwi ahhanshathu ghena pi keqhaikedithu cü.

⁹Levi nyithu ccülikesathu — Kenaniya, Shemaiya nu ma cünyuwa Nethanel, Hashabiya, Jehiel, nu Jozabad —khaghaneni zza nu aneni zza 5,000 nu amesü süpon 500 pi ahhanshathu ghena pi Levi nyithu cü.

¹⁰Khathansha wi Shhukeya Kho ghena pala tsüdila kidenya khe, kadimiwa na kekhi ti keqhaikedithu nu Levi nyithu na mathu pen wi benya.

¹¹Khaghaneni zza nu anenithu kepathi sengwi Levi nyithu na tsüthu hyu shi, nu keqhaikedithu na ajjü pi kekinyipenwa tsü keghü.

¹²Tsaseng wi mathu na Mosa Yenwa wi kecükegwethu kenie wina tsüthu mecang pi kinyiya thsüle kesalina asahangthu tsüpi anyithu atheghi theghi sala akhang khang sa keben jawi gishü chi.

¹³ Levi nyithu na ayenthu kenie wina Shhukeya Kho hhanshathu tsüpi anni miwi gü, nu asa kemethathu tsüpi apfü, keteli, nu apfügi kebenwa wi wwen nu asa tsü wan pi anyithu wi gishü cü.

¹⁴Ha kesa sengwi Levi nyithu na mathu ghena nu Aaron shicübvügha keqhaikedithu ghena asa pi gishüya kepaghenanye keqhaikedithu na aghaja kecu asahangthu maben pi mecang nu ahhanshathu kethu pi mecangla dhamang.

¹⁵Levi nyi Asaf gei wi akhwi kechüthu na Kadimi David kecükegwe wi pi mathu dhen chi ketheng pen witsü benya: Asaf, Heman, nu kadimi ghena atusenjüh-kechüwa Jeduthun, Kekinyijjen kaghapeng-jenka ghikehiethu na mathu pen nteshila mehai, kepaghenanye Levi nyi kepathu ghena Shhukeya Kho wa tsü kiden cüben.

¹⁶Tsalina Kadimi Josiya na kekhi ti tsü ghanan wi Apvüwa kekinyi, Shhukeya Kho sa keten, nu kekinyipen miwi mecang pi kekinyi ghena pala tsüdila kuliya.

¹⁷ Israel nyi ciwi keben tsüdila ghanan tagü Shhukeya Kho nu Azimi nkechi Mesa pi Kemishu Kho tsü kemini sa.

¹⁸Atusenjüh-kechüwa Samuel tsüwi na gho nansü kecu wi Shhukeya Kho kemini hati nsa. Kadimi Josiya keqhaikedithu, Levi nyithu, nu Judah, Israel, nu Jerusalem nyithu na Shhukeya Kho kemini hati kesa kheni kadimithu thola npi sa,

¹⁹tsüna Josiya na kadikesa tagha nu tazen mapi wi sa.

²⁰Kadimi Josiya na Kekinyijjen ghena ha tsüdi kesa sengwi Ejipt Kadimi Neko na süpahizi kesü ssi wa Eufrat Ghaku miwi Karkhemish wi kesali, Josiya na ma khenle sa,

²¹isala Neko na ketsijüh ha pi Josiya wi kesunchi; “Judah Kadimiwa, hi aghisa kebenwa ha no ssisa nben, hi no ssisale ngho, isala ighinyithu ssisa ghoben, nu Anyiza na walo hi kizadha. Anyiza na hi wiwa ben, tsalina hi nmatangla, nyelethu ma no yasa cüben.”

²²Isala Josiya na ssisale kidenya. Ma Anyiza na Kadimi Neko wina khi kebenwa tsü hhaghe, tsalina ma tsisa kemiliya nu Megiddo deshentijü wi aghi wi wa.

²³Aghisa keben wi Ejipt nyi lakusü na Kadimi Josiya gaya. Ma ma maghawa wi kiza, “Hi ssi bvülo; hi mesa-mena ntsa sadha le!”

²⁴Mathu na ma gorugari wina ma pieshiya nu pi ciwi keben gorugari keniwa wi chiya, nu ma ssinu Jerusalem wi wha. Ma ciwi shü nu pi kadi shüjjenthu wi vhüa. Judah nu Jerusalem nyithu tsüdila ma keshü ghena anongü.

²⁵Atusenjüh-kechüwa Jeremiya na Kadimi Josiya kiqaiki khwi kesü sachi. Tsüna Israel wi akhwi kesathu nzale npvüza lela ma ghena anonkegü wi akhwi ha kesen tsüpi ayen kesü sadha. Akhwi ha kiqaikithu kesaghu wi muyaben.

²⁶Josiya na kekuli tsüdi kesa — ma Apvüwa wi lebenkechi, ma Ayenwa kenie,

²⁷nu ma cükikezhü aghatsan na wa asakhen kecu tsüdi Israel nu Judah Kadimithu cükikezhü wi zhütheng.