Read Northern Rengma Naga 2 KHENICÜKI 36 Bible Online

2 KHENICÜKI 36 - Northern Rengma Naga bible

2 KHENICÜKI 36

¹Judah nyithu na Josiya tsa Joahaz kessiya nu adeli pi ma nyen pi Jerusalem wi kadimiwa sa thsüa.

²Joahaz na ma kahang mapi ngwe nu kecheng wi Judah kadimiwa saya nu ma asha kecheng Jerusalem wi kekhang sen.

³Ejipt Kadimi Neko na ma ghan pi atssüzü saya nu Judah yala keküju rükatssü kilogram 3,400 nu suna kilogram 34 pi cü thsü,

⁴ Neko na Joahaz cünyuwa Eliakim pi Judah kadimiwa sa thsüa, nu ma nyan kemili pi Jehoiakim sa, Neko na Joahaz ssinu Ejipt wi wa.

⁵ Jehoiakim na ma kahang mapi ngwe nu manga wi Judah kadimi saya, nu ma amapi taghakhen Jerusalem wi kekhang sen. Ma sami pi Apvüwa ma Nyiza shun.

⁶ Babylonia Kadimi Nebukhadnezzar na gho Judah nka nu Jehoiakim ghanya, nu amighe ssüle pi ma bhen sen Babilon wi wa.

⁷Nebukhadnezzar na Kekinyijjen wi keben-keyeng pahan pvü wa Babilon wi ma kadijjen wi chia.

⁸Jehoiakim na kekuli cüki tsüdi, ma nankiqanan kekulithu nu nkemehai kesathu na Israel nu Judah Kadimithu cükikezhü wi zhütheng. Ma tsa Jehoiakhin na ma shiwa sa kadimi saya.

⁹Jehoiakhin na ma kahang mapi tagha nu tazen wi Judah kadimi saya, nu ma asha kecheng nu ghanan tagha Jerusalem wi kekhang sen. Ma la sami pi Apvüwa shun.

¹⁰ Khathansha wi leghe tsüna gho khe Kadimi Nebukhadnezzar na Jehoiakhin ghan pi atssüzü kesü sa nu Kekinyijjen wi keben-keyeng pvü nu Babilon wi wa. Tsaseng wi Nebukhadnezzar na Jehoiakhin biza Zedekiya pi Judah nu Jerusalem kadimi sa thsüa.

¹¹ Zedekiya na ma kahang mapi ngwe nu kesü wi Judah kadimi saya, nu ma amapi taghakhen Jerusalem wi kekhang sen.

¹²Ma sami pi Apvüwa shun nu satemeni pi atusenjüh-kechüwa Jeremiya na Apvüwa jüh kekhi tsü nkina mvu.

¹³Zedekiya na Kadimi Nebukhadnezzar matang shun, Nebukhadnezzar na ma meten pi jühkeya wi ben thsüle Anyiza nyan wina kishen thsü theng. Ma ma leben-dhu mtsü nu khapeghe sen Apvüwa, Israel Nyiza wi kheneng ngho mvula.

¹⁴Tsü miwi, Judah ccülikesathu, keqhaikedithu, nu anyithu na mathu kevü wi mizzatentithu kesami tsütsonca nie sen nu atsikezhüthu kinyi, isanu Apvüwa na satemetha ketheng Kekinyijjenwa tsü nakhia.

¹⁵Apvüwa, mathu bamyithu Nyiza na atusenjüh- kechüthu kesun pi ma nyithu kitsan kinie sa, kepaghenanye ma mathu nu Kekinyijjenwa tsü heishaya mvu sa.

¹⁶Isala mathu na Anyiza nyilothu pi keponsa sa, ma jühthu pi koghobvü nu atusenjüh-kechüthu nankeqhe, tsüti Apvüwa lebenketsu na ma nyithu shun ntsa sa nu shukeya nmila.

¹⁷ Tsalina Apvüwa na Babilon Kadimi ssigho mathu ssisa. Kadimiwa na Kekinyijjen wi lela Judah kepvünyithu pathi. Ma anyi ghanyi nu keqhai, nza nu npvüza, kinaa le kemehai lela, thola nanketizen nmi. Anyiza na mathu tsüdi pi ma kwen wi chi cüdha.

¹⁸Babylonia Kadimiwa na Kekinyijjenwa, Kekinyijjen wi keben-keyeng, nu kadimi nu ma kekhu wi kedithu keben-keyeng shuya, nu tsüdi pvü nu Babilon wi wa neng.

¹⁹Ma Kekinyijjen nu anyunutiwa pi kadijjenthu nu keben-keyeng saghula mecang, nu anyunutiwa khweti pasha.

²⁰Ma anyi hangkeyathu tsüdi ssinu Babylonia wi wa, ciwi mathu na Persia nyi Kadimi npi sa keshagha chu ma nu ma shicübvüghathu nssümaghathu sa.

²¹ Tsalina Apvüwa na atusenjüh-kechüwa Jeremiya wina kekhi tsü sacen. “Sabbath kemnan nsala kesa tsü sacen thsüle kesalina amapi achentagü ayyiwa tsü yisha pi theng ben.”

²²Sira na Persia kadimi sa keya mapi atuwa wi Apvüwa na ma atusenjüh-kechüwa Jeremiya wina khi ketheng tsü ntsakhiwa sa thsüa. Apvüwa na Sira kechüchi nu ahza ha khushi thsü nu tsü zhüpi ma kadiyyi tsüdi wi tsü misikhhali sichilo kesun chi.

²³“Hawa ha Persia Kadimi Sira ahza khukechi. Atssan wi Anyiza, Apvüwa na hi sapi ayyi maben miwi kekhang kesenwa nu Judah yyiwi Jerusalem wi ma ghena Kekinyijjen kesü kesa akhhiwa tsüpi hi cüdha. Khili nthu Anyiza nyithu tsüdila ciwi whalo, nu Apvüwa nthu Nyiza yala nthu ssiben ketenwa salo.”