Read Northern Rengma Naga 2 KHENICÜKI 5 Bible Online

2 KHENICÜKI 5 - Northern Rengma Naga bible

2 KHENICÜKI 5

¹ Khathansha wi Kadimi Solomon na Kekinyijjen wi kekuli tsüdi sacenya khe, ma ma ba David na satemetha pi Apvüwa cü kesa tsanqaithu rükatssü, suna, nu atsanqai kepathu tsüdila pi Kekinyijjen keben ketheng-jjen wi chia.

²Tsaseng wi Kadimi Solomon na Israel mizzathu nu ageithu tsüdi wi accülikesathu na Jerusalem wi ma wi gho David Nyunutiwa, Zion wina Apvüwa Cenkethenjüh Khitsonwa tsü pie nu Kekinyijjen wi wale kesa cichi.

³Mathu tsüdila gho Kelishu Kho tsüwi saghuya.

⁴Khathansha wi accülikesathu na gho saghuya khe, Levi nyithu na Cenkethenjüh Khitsonwa tsü pieki

⁵nu tsü pie nu Kekinyijjen wi wa. Keqhaikedithu nu Levi nyithu la Apvüwa ketenpen Nithsüjjen nu tsü tsanqaithu tsüdi pie ketsen sen nu Kekinyijjen wi wa.

⁶Kadimi Solomon nu Israel nyithu tsüdila Cenkethenjüh Khitson tuwi saghu nu khaghaneni nu amesüsithu ji ntsa si nkeyakhi pi ahhansha sa.

⁷Tsaseng wi keqhaikedithu na Apvüwa Cenkethenjüh Khitson tsü piedu Kekinyijjen wi Kemetha ntsawa Pen wi cherubim chakhu witsü chia.

⁸Mathu gisha zanshigü pi akhitson nu kepiechan tsü whengbhonya.

⁹Anyi kesü le kesü lela Kemetha ntsawa Pen tuwi tsü ketan ben nu kepiechan pangthu tsü muya kemehai khe apen kepa wi nye. (Kepiechanthu tsüna nansü lela ciwi ben.)

¹⁰ Cenkethenjüh Khitson non witsü Israel nyithu na Ejipt wina shhugho keten wi Apvüwa na mathu ssinu cenkethenjüh kesü kesa wi Mosa na Sinai Yikha wi pi kechi alonpha keni tsü ketan khe mangla nmi.

¹¹Ciwi keben keqhaikedithu tsüdila mathu na akhang kepapa wi saben lela mathu ketanla mathu satemethaya. Nu Levi nyi akhwi kechüthu, Asaf, Heman, nu Jeduthun, nu mathu mizza wi anyithu tsüdi linen thsümeni mphi. Levi nyithu na simbal nu harpthu sen nu kekinyipen kete na nishuwa ngan, nu keqhaikedithu meza nu ngwe na tutuwa khoula mathu gweghe ben. Akhwi kesathu na tutuwa, simbal, nu akhwi kesa tsanqai kepathu sen nu gweghe ahhai meceqe sala akhwi sapi Apvüwa seng; “Apvüwa senglo, kepaghenanye ma mehai ntsawa, Nu ma kaghali tsüna anuphanla benden.” Keqhaikedithu na Kekinyijjen teshi nu bvü keten wi akulukeshü na zuli gho, Apvüwa keten kewegü na wegü thsü sa, nu mathu na kekinyi kekuliwa tsü sa meyala.