Read Northern Rengma Naga 2 KHENICÜKI 6 Bible Online

2 KHENICÜKI 6 - Northern Rengma Naga bible

2 KHENICÜKI 6

¹Tsaseng wi Kadimi Solomon na kekhie sa, “Apvüwa, no akulukeshü nu kejang wi hangle kessiyadha.

²Hi khili nghena Kekinyijjen ajenkeben kesü sayadha, no ya anuphanla kahang pen kesü sathsüle kesa ghena.”

³Israel nyithu tsüdila ciwi ngan ben. Kadimiwa na mathu wiwa ghang nu Anyiza wi kesawegü khie pi mathu miwi chi.

⁴Ma khi, “Apvüwa Israel Nyiza senglo! Ma iba David wi ma jüh hati khishi kechi tsü sacendha.

⁵‘Hi Ejipt wina inyithu ssi keshhugho tsü wina hi kinyi thsüle kesa hi Israel yyi tsüdi wi anyunuti khiewila kekinyijjen kesü la sale kessi meya.

⁶Isala hi khili Jerusalem pi hi kekinyi penwa sa thsü nu David, no, pi inyithu miwi kekhang kesenwa sa thsüle kessiyadha.’ ”

⁷Nu Solomon na khineng, “Iba David na Apvüwa Israel Nyiza kinyile kesa ghena kekinyijjen kesü sale kiden,

⁸isala Apvüwa na ma wi khi, ‘No ighena kekinyijjen kesü sa mvu keben tsüna meshonle,

⁹isala no khiela tsü saya nben. Tsüna ntsawa, ntsa tsentsawa na hi kekinyijjen tsü sa ben.’ ”

¹⁰“Apvüwa na khili ma jüh khishi kechi tsü sacendha. Hi iba shiwa sa Israel kadimiwa sayadha, nu hi Apvüwa Israel Nyizawa kekinyi ghena la kekinyijjen kesü sayadha.

¹¹Hi Cenkethenjüh Khitson, kheni Apvüwa na Ejipt wina ithu Israel nyithu ssi shhugho keten wi mathu ssinu cenkethenjüh lonpha keni na kebenwa tsüpi Kekinyijjen wi chiyadha.”

¹²Tsaseng wi Solomon na anyithu keben na wa kekinyipenwa tuwi ngan nu ma kwen zanki nu kekhie sa,

¹³(Solomon na lezza pi kanganpen kesü ma ketikesie 2.2 meter meceqe nu kemisi 1.3 meter saya nu pi accühha non wi chiya. Ma tsü miwi anyi tsüdi ma kemu wina ma kwen keni zanki.)

¹⁴Ma khie, “Apvüwa Israel Nyiza, atssan nu ayyi tsüdi wi acenpvü kesüla no ti kesa nmi. N-nyithu na leben tsentsa wi njühya nu hang lethu, no n-nyithu ssinu cenkethenjüh tsü sa nu no kaghali pi mathu ccücaden.

¹⁵No iba David wi njüh khishi ketheng tsü nie, nu nansü ajüh tsüdila sacen cüdha.

¹⁶Apvüwa Israel Nyizawa, khili no iba wi ajüh khishi ketheng kepawa, nshicübvüghathu na ma ti kiden-kesha nu njühya lethu, keshüthangla nshicübvügha jawi anyi kesü na Israel kadimiwa sa nu kekhang senben kesa tsü la sacen cülo.

¹⁷Tsalina Apvüwa Israel Nyiza, khili no nmaghawa David wi khishi ketheng tsüdila sacenya thsülo.

¹⁸ O “Anyiza, isala no ntsakhiwa ayyiwi nza nu npvüzathu jawi hangya mehai kwe? Tangwi maben lela nghena zza mtsü, isalethu khatinu hi nghena sa ketheng Kekinyijjen ha no ben qoya mehai nu?

¹⁹Apvüwa iNyiza, hi nmaghawa le. Hi kekhie kina, nu hi no wi keshükene kebenwa ha sa cülo.

²⁰ Kekinyijjenwa ha aghaja ghanan hieyalo. Hawi ha no kinyi benle kesa no khishi chidha, tsalina hi Kekinyijjen wiwa peghe nu kekhie sa lethu kinachi cülo.

²¹Hi nu n-nyithu Israel na apen hawa wiwa peghe nu kekhie sa lethu kinachi cülo. Tangwi njen wi ben nu ithu kekhie kina nu ithu kesami teshi cülo.

²²“Keujüla anyi kesü na kepawa tuwi sazzile khi nu ssisen Kekinyijjen hawi kekinyipen wina nsazzile kesa ntuwi kishen le gho lethu,

²³O Apvüwa, no tangwi na kina nu nmaghathu jühkaghaten cülo. Kesazziwa tsü kumu-u wina meten cü, nu kesazzi nkemiwa tsü teshi cülo.

²⁴“Khathansha wi n-nyi Israel na ntuwi sami kesalina mathu ghinyithu nchala nu mathu na no wi kheneng gho Kekinyijjen hawi satemeni nu kesami teshi kecü khie khe,

²⁵tangwi ben nu mathu hhai kina cülo. N-nyithu kesami teshi pi cü nu mathu ssi neng gho no ayyi pi mathu nu mathu bamyithu cü ketheng witsü chicülo.

²⁶“N-nyithu na sami pi no shun kesa ghena no atsan ngho thsüla, nu mathu leben khapegheya nu Kekinyijjen hawa wi peghe nu no wi satemeni nu khie lethu,

²⁷O Apvüwa, tangwi ben nu mathu kekhie kinachi cü nu nmagha Israel nyithu kesami teshi cü, nu kemeshonwa pi n-nyithu ya anuphanla mathu ji saya thsüle pi kecü ayyiwa wi chi cülo.

²⁸“Khathansha wi ayyiwa wi azeng, adhagha nyelela ameghü nkemehai, ashiqathu na alli yasa, aghinyithu na n-nyithu ssikaghashen, khumakhujü nyelela kesakinaa na mathu jawi ben lethu,

²⁹mathu kekhie hhai kina cülo. Keujüla n-nyi Israel kesü le kesü lela ma hathakina wina Kekinyijjen hawa wiwa peghe nu ma kwen zankila kekhie sa lethu,

³⁰mathu kekhie kina cülo. Tangwi njjen wi ben nu mathu kekhie kina cü, nu mathu kesami teshi cülo. No ketan anyi leben kemeshen kechüwa. Anyi kesüsü kumu-u pi cü,

³¹isanu n-nyithu na no ayyi pi ithu bamyithu kecü witsü hang keben chu matsü tsüdi wi njüh yaya thsüle kesalina.

³²“Khathansha wi alen kesie wi kahang asangthu kesü na no kedi nu kekhang keben nu no keshüthangla kulile kiden sen keben cüki zaya, nu ma Kekinyijjen hawi gho kekhie sa khe,

³³ma kekhie kina cülo. Tangwi no kahang pen wi ben nu ma hhai kina cü nu ma kekhiewa tsü sa cülo, isalethu ayyiwi anyithu tsüdila n-nyithu Israel na sa keten ti no chüya nu njüh kina ben. Isalethu mathu na hi sa ketheng Kekinyijjen hawi no kekinyi-u le kesa chüyaben.

³⁴“No khathansha wi ahza pi n-nyithu cü nu mathu wa aghi wi mathu ghinyithu ssikaghashen thsü nu mathu na kahe wi ten lela no kessiya kesa anyunutiwa ha nu hi nghena sa ketheng Kekinyijjenwa ha wiwa peghe nu kekhie sa khe,

³⁵mathu kekhie kina cülo. Tangwi ben nu mathu hhai kina nu khangkeya pi mathu cülo.

³⁶“Khathansha wi n-nyithu na sami pi no shun—nu ciwi kesami nkesa kesüla nmila— nu no nlebenketsu wina mathu ghinyithu ya mathu chaya thsü nu mathu ghan pi atssüzüthu sala ssinu ayyi kepa wi alen kelensie wi wa lela

³⁷n-nyithu kekhie kinachi cülo. Keujüla mathu na ayyi ciwi mathu leben khapeghe nu no wi khie, mathu kesami nu gheshighena kekuli khishi lethu, O Apvüwa, mathu kekhie kinachi cülo.

³⁸Keujüla mathu na ayyi ciwi ntsakhiwa nu lebentsentsa sala leben khapegheya nu mathu na no ayyi pi ithu bamyithu kecü ha, no kessikeya anyunutiwa ha, nu hi nghena sa ketheng Kekinyijjenwa ha wiwa peghe nu no wi kekhie sa lethu,

³⁹mathu kekhie kinachi cülo. Tangwi njjen wi ben nu mathu kekhie kina cülo nu mathu nantizen chi cülo, nu n-nyithu kesami tsüdi teshi cülo.

⁴⁰“O iNyiza, ithu ghangchi nu apen hawi ithu kekhie kina cülo. Apvüwa Anyiza,

⁴¹ khili shaghalo, nu no kekhang zensu Cenkethenjüh Khitsonwa tsü sen nu Kekinyijjen wi dugho hewi anuphan ben walo. Sawegü pi no keqhaikedithu kekuli tsüdi wi chicü, nu no mathu tuwi kemehai ghena n-nyithu tsüdila anonghe keyawa salo.

⁴²Apvüwa Anyiza, no kessiya kesawa kadimiwa tsü meya mvu nsala. No nmaghawa David kaghali tsü meshen chilo.”