Read Northern Rengma Naga 2 KHENICÜKI 7 Bible Online

2 KHENICÜKI 7 - Northern Rengma Naga bible

2 KHENICÜKI 7

¹ Khathansha wi Kadimi Solomon na kekhie sa shagha khe, tangwi anni na dugho ahhansha sapi kinyi kechi tsü mecang, nu Apvüwa keten kewegüwa na Kekinyijjenwa tsü pongya.

²Kewegüwa tsüna Kekinyijjen pong kesalina keqhaikedithu na ciwi du meyala.

³ Khathansha wi Israel nyithu na tangwi anni na dugho nu kewegü na Kekinyijjen pong kesa muya khe akhime kedha miwi mathu mmi zan nccüggü sen nu Anyiza kinyi wa, nu ma seng, kepaghenanye ma kemehai nu kaghali na anuphanla benden.

⁴Tsaseng wi Solomon nu anyi tsüdila ahhanshathu sapi Apvüwa cü.

⁵Ma amesüsi 22,000, nu khaghaneni 120,000, pi kecca ghena kekinyi hhansha sa. Isanu ma nu anyi tsüdila Kekinyijjenwa tsü satemetha.

⁶Keqhaikedithu na apen pi mathu cü ketheng witsü ngan nu Levi nyithu na mathu wiwa peghe nu Kadimi David na khukechi akhwi kesa tsanqaithu tsü sen nu akhwisa nu Apvüwa seng; “Ma kaghali na anuphanla benten le!” Keqhaikedithu na tutuwa khou kechi wi anyi tsüdila ngan shagha.

⁷Solomon na accühha nonwa, Kekinyijjen tuwa apen tsü satemetha, nu tsaseng wi ciwi mecang pi kekinyi, asu pi kekinyi, nu kecca ghena kekinyi wi asa kethu pi kekinyi sachi. Ma ha sachi, kepaghenanye lezza pi kesa kekinyipenwa tsüna kekinyi hathu tsüdi kesa ghena apen zza mtsüa.

⁸Solomon nu Israel nyithu tsüdila Kelishu Kho tsü ghanan tagü kemini sa. Ciwi anyithu na aghawa Hamath Pass wina nu acülawa Ejipt nyi ggü kecu wina anyitenti keti ntsa kesü gho.

⁹Mathu na kekinyipenwa satemetha ghena ghanan tagü sa nu kheneng akho ghena la ghanan tagü sa. Atsathang sakhenwa wi mathu na kemini sakhen kesü sa,

¹⁰nu tsasengwa ghanan wi, asha tagüwa ngwe nu kecheng ghanan wi Solomon na anyithu kesun pi ajjen wi wha thsüa. Apvüwa na sawegü pi ma nyithu Israel, David, nu Solomon kecü tsüdi ghena mathu na anonghe ntsasa.

¹¹Kadimi Solomon na Kekinyijjen nu kadijjen, nu tsüthu ghena saya mvu keben tsüdi sacen keya sengwi

¹²Apvüwa na aghaja wi ma tuwi gho. Apvüwa na ma wi khi, “Hi no kekhie tsü zayadha, nu ahhanshathu sapi hi cü keten pen Kekinyijjenwa ha hi yayadha.

¹³Kusi wi hi atsan ya ngho thsüla nyelela ashiqathu kesun pi yangdsaketenthu dsa thsü nyelela adhagha kesü kesun pi inyithu jawi chi khe,

¹⁴keujüla mathu na hi wi khie nu leben khapegheya nu mathu na sa keten nkemehai wina kheneng gho lethu, hi tangwi ben nu mathu hhai kina cü, mathu kesamithu teshi pi cü, nu mathu yyi sapi mehai pfü neng yathsüaben.

¹⁵Hi matsü tsüdi wila Kekinyijjenwa ha hie nu hewi kekhie kesa tsüdila kina cüben,

¹⁶kepaghenanye hi apen kessiya nu tsü satemetha pi anuphanla hi kekinyipen sa thsüdha. Hi matsü tsüdi wila tsü hie nu tsü khwe benden.

¹⁷Keujüla no nba David kesa ti nleben tsentsa pi hi kekuli sa, iyenthu tsü nie, nu hi no kekiza tsüdila sa lethu,

¹⁸ hi nba David wi ma shicübvüghathu na keshüthangla Israel wi kekhang senben le kesa khishi kechi tsü sa ben.

¹⁹Isala keujüla no nu n-nyithu na iyenthu nu hi ayenkhukechithu tsü n-nie, nu acenpvü kepathu kinyi wa lethu,

²⁰hi ayyi pi no kecü witsü no khushi pia, nu hi kekinyi yen sa thsüle satemetha ketheng Kekinyijjenwa ha teshiaben. Apen tsüdi wi anyithu na tsü nankeqhe nu tsüna nyu pangbi saaben.

²¹“Khili Kekinyijjenwa ha kinyikü ntsa saben, isala haseng wi anyi ha pvüdhi kewathu tsüdila qhethiketen nu amansala hati keüben, ‘Mangkesa na Apvüwa na ayyi ha miwi nu Kekinyijjen ha miwi hati sadha nu?’

²²Anyithu na luneng ben, ‘Hawa ha mathu na Apvüwa mathu Nyiza Ejipt wina mathu bamyithu ssi keshhughowa tsü teshi kesa ghena le. Mathu na acenpvü kepathu ssinu ashusa nu tsüthu kinyi wale. Tsalina Apvüwa na kededi ha sengho mathu miwi chidha.’ ”