Read Northern Rengma Naga 2 KHENICÜKI 8 Bible Online

2 KHENICÜKI 8 - Northern Rengma Naga bible

2 KHENICÜKI 8

¹Solomon na Kekinyijjen nu ma kadijjen kesa amapi ngwe ya.

²Ma Kadimi Hiram na anyunutithu pi ma kecü tsü la sapfü neng nu Israel nyithu kesun pi tsüthu wi ben wa thsüa.

³Ma Hamath nu Zoba yyi

⁴nu ayyikeshü wi Palmira nyunutiwa khwetiya. Ma Hamath wi kedsakejjü tsanqai pi kethengpen aghuti nyunutithu tsüdila sapfü neng.

⁵Solomon na anyunuti hathu la sapfü neng: Beth Horon mmiwa nu Beth Horon ssanwa (khwetivü nu kaghapeng-jenkathu khenya kemehai nyunutithu),

⁶Baalath nyunutiwa, kedsakejjü pi ketheng nyunutithu tsüdi, nu ma goru nu gorugarithu pi ketheng nyunutithu. Ma Jerusalem, Lebanon, nu ma kekhang sen keben yyi tsüdi wi ma kiden kebenthu tsüdi saya.

⁷Israel nyithu na kheni ayyi nka pi mathu ji sakeya wi npathila kesa Kanaan nyi shicübvüghathu tsü Solomon na meten pi kekuli sa. Hathu na Hitti, Amor, Periz, Hivi, nu Jebus nyithu, mathu shicübvüghathu na nssümaghathu sagho nansü kecu saben.

⁹Israel nyithu pi nssümaghathu nsa thsü, isala mathu na süpahithu, kedithu, gorugari, nu goru kessi benchüthu sa.

¹⁰Ciwi kedithu 250 na ajjen kepapa sa keben, meten pi kekulithu miwi kedithu sa.

¹¹Solomon na ma wubvü Ejipt kadimiwa nga tsü David Nyunutiwa wina ssi wa ma nzawa ghena ajjen sa ketheng witsü chia. Ma khi, “Ma khiela Israel Kadimi David kadijjen wi hang yishü, kepaghenanye kahe wi lela Cenkethenjüh Khitson pi chi ketheng pen tsüna kemetha.”

¹²Solomon na ma Kekinyijjen tuwi kekinyipen sa ketheng miwi tsü ahhanshathu sapi Apvüwa cü.

¹³ Ma Mosa Yenwa wi zhü ketheng kenie wina kemetha tsathang kaghapenla mecang pi kekinyi sa; Sabbath, Asha Ketheü kho, nu amapi kesü wi akho kecheng— azimi pi nkechi Mesa pi kemishu Kho, Matheükedhi Kho, nu Kelishu Kho.

¹⁴Ma ba David na ayen sapi theng kecü tsü kenie wina ma keqhaikedithu, nu Levi nyithu, akhwikesa wi nu mathu kekuli wi keqhaikedi kekiqathu ghena atsathang kekulithu kecükepeng chi. Ma Anyiza nyiwa David yenkhukechi kenie wina Kekinyijjen ghikehiethu la kaghapeng-jenka kesüsü wi mathu atsathang kekuli sa thsü.

¹⁵David na kecükegwe khukechithu tsüna keqhaikedithu nu Levi nyithu na keben ketheng-jjenthu nu ajjügi kepathu ghena tsüdila sa.

¹⁶Ha tsüwi ha Solomon na kekuli kepapa sa kebenthu tsüdila sacen yadha. Apvüwa Kekinyijjenwa tsü gi kedegü keshhugho na wa kesacen kecu kekuli tsüdila mehaitsü sacenya.

¹⁷Tsaseng wi Solomon na Edom yyiwi Aqaba Tssükebvü ghüsa wi Eziongeber nu Elath wi wa.

¹⁸Kadimi Hiram na ma cakhu kedithu nu atssükedone wi kewachüthu kesun pi ahunjjenthu sen nu Solomon wi wa thsü. Mathu na Solomon kedithu gweghe Ofir yyiwi wa nu suna kilogram hazar taghamanga miwi pvügho Solomon cüa.