Read Northern Rengma Naga 2 KHENICÜKI 9 Bible Online

2 KHENICÜKI 9 - Northern Rengma Naga bible

2 KHENICÜKI 9

¹ Sheba wi kadijjawa na Solomon nyankemechan zaya, nu ma Jerusalem wi wa kekeü kedhu pi ma ghan nanle sa. Ma ketsikinathu akhang keti kesü ssisen, cüdemvuthu, alon menkedhu, nu suna kejon pi sunsiesathu khhi sapvü ma gweghe gho. Khathansha wi ma gho Solomon metuya khe ma meshen keben kekeü tsüdi pi ma wi keü.

²Solomon na tsüthu tsüdila luneng; ciwi ma khimetha chile kesa ma ghena kedhu mangla nmi.

³Sheba wi kadijjawa na Solomon kemetsa zaya nu kadijjenthu kesa tsü mu.

⁴Nzawa na Solomon miz wi ma kedsakejjü pi cü keten, ma kedithu kahang jjen, ma kadijjen wi kekulithu kecükepeng kechi nu mathu tsikesüthsü pvü keten, kemishu wi ma hieben keten amaghathu thsümeni, nu ma Kekinyijjen wi ahhansha sapi kinyi ketenthu mu. Ma tsü mu pi amansa nu qhethiketen sa.

⁵Nzawa na kadimiwa wi khi, “Hi hi diyyiwa wina no nu no kemetsa cüki zakeya tsü ntsakhiwa le!

⁶Hi ketanla gho tsü npi mukeya chu hi mathu na hi kekiza tsü n-nondi. Hi no kemetsa tsü gishü pahan ketanla za meya nale! No anyithu na ncüki kekhi miwi metsakile.

⁷Anyi no kekuli kesathu na keshüthangla ntuwi ben nu no kemetsa kekhithu zakeya na khatila acenpvü bendha nu!

⁸Apvüwa n-Nyiza sengle! Ma no sapi kadimiwa sa thsü nu ma nyan wina kekhang kesen thsü wina ma no kenen pi ccüca chidha. Kepaghenanye ma Israel nyithu tizen nu mathu ya anuphanla ben thsü mvuben, no ya ayenwa nu kemeshonwa tsü senya thsüle kesalina ma no pi mathu kadimiwa sa thsüdha.”

⁹Nzawa na aju sen keghothu tsüpi Kadimi Solomon cü: suna kilogram hazar mejü miwi nu cüdemvu nu alon menkedhu kejon. Sheba wi kadijja na cüdemvuthu pi Kadimi Solomon kecü tsüti kemehai khiela npi muya.

¹⁰(Kadimi Hiram nu Kadimi Solomon nyithu na Ofir wi suna, juniper chan nu alon menkedhuthu la pvügho.

¹¹Solomon na achan tsüpi Kekinyijjen nu ma kadijjen cükhapen, nu akhwi kechüthu ghena harp nu layerthu sa. Judah yyiwi tsüti kesa khiela npi mu.)

¹²Sheba wi kadijjawa na mangwa khie khe Kadimi Solomon na tsüdi pi ma cüa. Tsüna nzawa na ajuthu sengho ma kecü ketonli miwi Solomon na pi ma cü. Tsaseng wi kadijjawa na ma ketsikinathu ssisen Sheba yyiwi wa neng.

¹³Amapi kaghapenla Kadimi Solomon na suna kilogram hazar ngwe nu manga gilli muyaden;

¹⁴tsüna asenkesathu nu asenketi kesathu na khajana pi kecü miwi mukeya. Arab kadimithu nu Israel nyi elakha ahngthu la rükatssü nu suna sengho ma cü.

¹⁵Solomon na atsonhi ketiti meza keni saya, nu suna kilogram tagü kecen pi kesüsü miwi mejuya,

¹⁶nu atsonhi kizzazza la meza kecheng saya, nu suna kilogram kecheng cheng pi kesüsü miwi mejuya. Ma atsonhi hathu tsüdi pi Lebanon Yinong[1] le khi keten keshondhiwa witsü chia.

¹⁷Kadimi na kadipen keti kesü la saya. tsü pahan na asayha nu pahan na suna kemetha ntsa pi mejuya.

¹⁸Acükhapen tugho zhü senki kadipenwa witsü chi, nu accükennepen kesü zhüpi tsü saghu nu suna pi meju theng. Kadipen wi ahacü kilipen ghapeli witsü ssensitemi keton kesüsü na nganben.

¹⁹Acükha kesüsü katen wi ssensitemi keton kesüsü saghula taghakeni ben. Kadiyyi khiewila kadipen hati kesa npi sa.

²⁰Solomon na jjü keten hyithu tsüdi suna pi sa, nu Lebanon Yinong le khi keten keshondhiwa wi ahyikhu tsüdila suna kemetha pi sa. Solomon tsüwi rükatssü pi ma men keben nsa.

²¹Ma hunjjen akhang kesü na Kadimi Hiram hunjjenthu tsü gweghe atssükedone wi waden. Amapi kecheng kaghapenla ma hunjjenthu na suna, rükatssü, asayha, asiyeng nu asukithu pvü nu ghoden.

²²Kadimi Solomon na ayyiwi kadimi kepathu miwi benki nu metsaki.

²³Mathu tsüdila gho ma wi kecenkinali nu Anyiza na kemetsa pi ma kecü tsü jüh tsü kina.

²⁴Mathu kesüsü aju sengho Solomon cü — rükatssü nu suna pi kesa tsanqaithu, agwomejuwa kaghazu, aghighe, cüdemvu, goru, nu gadathu. Amapi kaghapenla mathu na hati sa.

²⁵ Kadimi Solomon na ma gorugari nu goru kessithu hazar mejü, nu anyi goru ssiketenthu hazar taghakeni na ben. Ma tsüthu pahan pi Jerusalem wi theng nu kepathu pi anyunuti kepapa wi chi.

²⁶ Ma ayyi Eufrat Ghaku wina wa Filistia nu Ejipt nyi kemeggü kecu kadimithu tsüdi miwi kekhang kesen kediwa sa.

²⁷Ma kadi kesa tsüwi Jerusalem wi rükatssü na alon jümu ti sa, nu sedar chan na Judah yyishiphon ccüwi amba chan ti sa.

²⁸ Solomon na Musri nu diyyi kepathu wi goruthu pvügho.

²⁹Solomon cüki kezhü kepathu aghatsan na wa asakhen kecu tsüna tusenjüh-kechüwa Nathan cüki kezhü, Shilo wi Ahijah na atusenjüh-kekhi, nu atusenjüh-kechüwa Iddo na kemanthi kemu hathu wi zhütheng, tsüna Israel Kadimi Jeroboam na kadikesa cüki la ben.

³⁰Solomon na Jerusalem wi Israel tsüdi miwi amapi jügha kadimi sa.

³¹Ma shü nu pi David Nyunutiwa wi vhüa, nu ma tsa Rehoboam na ma shiwa sa kadimi saya.