Read Northern Rengma Naga EZRA 1 Bible Online

EZRA 1 - Northern Rengma Naga bible

EZRA 1

¹ Sira na Persia kadimiwa[1] sakeya mapi atuwa wi Apvüwa na ma Jeremiya atusenjüh-kechüwa wina khi ketheng tsü sacenya. Ma Sira kechüchi pi ahza hati ha sa thsü nu tsü zhü nu sen wa ma kadiyyi apen tsüdi wi misikhhali si chilo sa thsüa:

²Hawa ha Persia Kadimi Sira ahza khukechi: “Apvüwa, Atssan wi Anyiza na hi sapi ayyi maben wi kekhang kesenwa sa thsüdha nu Judah wi Jerusalem wi ma ghena kekinyijjen kesü salo kesa khhiwa tsüpi hi cüdha.

³Nthu ma nyithu, Anyiza na nthu tsüdi ssiketenwa salo. Nthu na Jerusalem wi wha nu Israel Nyizawa, Jerusalem wi ma kinyi ketenwa, Apvüwa Kekinyijjenwa tsü sa nengden.

⁴Keujüla ma nyi kushinyi sa keben kesü le kesü lela kewhaneng ghena kekiqa nsenthu yishü lethu, mathu jenphonthu na kekiqa ha pi mathu cüben. Mathu na rükatssü nu suna, kedsakejjüthu nu asahangthu, nu Jerusalem wi Anyiza Kekinyijjen wi kekinyithu kesa ghena la aju pi mathu cüben.”

⁵Tsaseng wi Judah nu Benjamin mizzathu wi ageithu wi accülikesathu, keqhaikedithu nu Levi nyithu, nu Anyiza na ma leben kidhen kechithu tsüdila wa Jerusalem wi Apvüwa Kekinyijjenwa tsü saneng le kidenya.

⁶Mathu jenphonthu tsüdila pala kejon pi mathu kiqa cü: rükatssü hyikhuthu, suna, kedsakejjüthu, asahangthu, kepa wi pala menkedhu, nu Kekinyijjenwa wi kekinyithu ghena.

⁷Kadimi Sira na hatu wi Kadimi Nebukhadnezzar na Jerusalem wi Kekinyijjen wi khusen wa ma cenpvüthu kekinyijjen wi chi kesathu akhuzza nu ahyithu tsüpi mathu cü neng.

⁸Ma tsüthu pi kadijjen wi keben kesen jawi kediwa Mithredath kwen wi chi nu tsüthu sipi Sheshbazzar, Judah wi ahngwa cüa,

⁹hathu ha: kekinyi ghena suna khuzza — 30 kekinyi ghena rükatssü khuzza — 1,000 akhuzza kepathu — 29 suna khuzza kizzakeuthu — 30 rükatssü khuzza kizzakeuthu — 410 ahyikhu kepathu — 1,000

¹¹Ciwi suna nu rükatssü khuzzathu nu atsanqai kepathu tsüdi saghu 5,400 tsü Sheshbazzar nu kushinyi kepathu na Babilon wina sen nu Jerusalem wi wha.