Read Northern Rengma Naga EZRA 10 Bible Online

EZRA 10 - Northern Rengma Naga bible

EZRA 10

¹Ezra na Kekinyijjenwa tuwi kesami hathu khishi pi qai nu kekhie sa keben wi Israel nyithu akhang kesü nza, npvüza, nu ghanyithu gho ma vüya nu qai ntsa sa.

²Tsaseng wi Elam gei wi Jehiel tsa Shekaniya na Ezra wi khi, “Ikhang na asang nzathu keya ghena Anyiza kenondi tsü pakhhidha, isaliela ciwila Israel ghena kaghangwa tsü benle.

³Ikhang khili ithu Nyiza tuwi ajühkhukechi kemetha kesü nsathu yishü, ikhang na kinyibvü hathu nu mathu tsangathu kesun pi bvü thsüaden. Ikhang khili no nu kepa wi Anyiza yenkhukechi kinyikü ketenthu na mangwa le khi nu salo khe saaden. Anyiza Yenwa na mangwa le khiben khe ikhang na tsü saaden.

⁴Ha kesa tsüna nkhhi. Ikhang na nsengwi nganben, wala tsü salo.”

⁵Tsalina Ezra na keqhaikedi nu Levi nyi ccülikesathu, nu anyi kepathu sapi mathu na Shekaniya khi kechi tsü sa ben le khila kishen thsü shhu.

⁶Tsaseng wi ma Kekinyijjen tu wina Eliashib tsa Jehohanan hang keten jjen wi du ciwi aghaja chuli kushinyithu jühtsentsa nkesa ghena leben güccü. Ma mangla ndsa nu njjü.

⁷Ketsijüh kesü pi Judah nu Jerusalem tsüdi wi anyi kushiyyi wina keghonengthu tsüdi gho Jerusalem wi kemetuli tenle kesa kesunchi,

⁸tsüna anyi ccülikesathu na ahza khukechi wina. Keujüla anyi kesüle kesü lela ghanan kecheng jü tsü nghola lethu, ma keben tsüdila khuya ben, nu ma azitenti jawi anyi kesü sakeya kemeshon nmila ben.

⁹Ghanan kecheng jü, asha tuguwa ngwe ghanan wi Judah nu Benjamin yyi wi kahang nyithu tsüdi Jerusalem wi ghola Kekinyijjen khemi wi saghuya. Tsü ghanan atsangho ntsa sa, atsanen nmehai nu ajjügi kemechan keccünengli keben ghena anyi tsüdila kedheggü.

¹⁰Ezra, keqhaikediwa na shagha nu mathu wi ajühkhi. Ma khi, “Nthu na kenondi nmi nu asang nzathu keya ghena kesazzi sen nu Israel miwi ghodha,

¹¹Isathu, khili nthu kesami khishi pi Apvüwa nthu bamyithu Nyizawa wi chi, nu ma kenenwa tsü salo. Ithu yyi wi hang keben asangthu wina nthu kepa saya nu nthu wubvü asangthu tsü teshilo.”

¹²Anyithu na jisha nu luneng, “Ikhang na no mangwa khi khe tsü saaben.”

¹³Isala mathu tsümiwi khi, “Anyitenti di ntsa, nu atsangho ntsa saben. Ikhang na akhemi wi hati ngan benya ntendha. Ikhang anyi kejon na kesami hawa sa kesalina hawa ha ghanan kesü keni jü ketan cenkeya ji nye.

¹⁴Ikhang kedithu yala Jerusalem wi ben nu ajjügi tsü südheya thsü. Isanu matsü ssan ketheng wi anyi thowa na asang pi ma wubvü sa keben muya khe ma nyunutiwa wi accülikesathu nu pendhethu gweghe gho thsü. Hatinu tsü ghena Anyiza leben ketsuwa tsü kemili thsülo.”

¹⁵Asahel tsa Jonathan nu Tikvah tsa Jahzeiya manyi ketan khe anyi thola sale kesa tsüwa nshun, nu Meshullam nu Levi nyi kesü Shabbethai na manyi kiqa.

¹⁶Kushiyyi wina kheneng keghothu na tsüwa tsü yaya, tsalina keqhaikediwa Ezra na anyithu jawi ageithu wi alikesathu kessiya nu mathu nyan zhüya. Asha taghawa atsathang atuwa wi mathu na tsüthu bha shhu,

¹⁷nu asha kecheng jü mathu na anyi asang pi ma wubvü sa kebenthu tsüdila bhaya.

¹⁸Hawa hana anyi asang pi ma wubvü sa kebenthu nyan kezhü: Joshua nu ma cünyuthu gei, Jehozada tsathu, Maaseiya, Eliezer, Jarib, nu Gedaliya,

¹⁹Mathu na mathu wubvüthu yishale ajüh khuchia, nu khaghaneni asüpon kesü pi mathu kesami ghena ahhansha sa kinyi.

²⁰Immer gei: Hanani nu Zebadiya

²¹Harim gei: Maaseiya, Elijah, Shemaiya, Jehiel, nu Uzziya

²²Pashhur gei: Elioenai, Maaseiya, Ishmael, Nethanel, Jezabad, nu Elasa

²³Levi nyithu: Jezabad, Shimei, Kelaiya (Kelita lela khiden), Pethahaiya, Judah, nu Eliezer

²⁴Akhwi kechüthu: Eliashib Kekinyijjen ghikehiethu: Shallum, Telem, nu Uri

²⁵Kepathu: Parosh gei: Rami, Izziya, Malkhijah, Mijamin, Eleazar, Malkhijah, nu Nenaiya

²⁶Elam gei: Mattaniya, Zekhariya, Jehiel, Abdi, Jeremoth, nu Elijah

²⁷Zattu gei: Elioenai, Eliashib, Mattaniya, Jeremoth, Zabad, nu Aziza

²⁸Bebai gei: Jehehanan, Hananiya, Zadbai, nu Athlai

²⁹Bani gei: Meshullam, Mallukh, Adaiya, Jashub, Sheal, nu Jeremoth

³⁰Pahath Moab gei: Adna, Khelal, Benaiya, Maaseiya, Mattaniya, Bezalel, Bihnui, nu Manasseh

³¹Harim gei: Eliezer, Isshija, Malkhijah, Shemaiya, Shimeon, Benjamin, Mallukh, nu Shemariya

³³Hashum gei: Kattenai, Mattatta, Zabad, Elifelet, Jeremai, Manasseh, nu Shimei

³⁴Bani gei: Maadai, Amram, Uel, Benaiya, Bedeiya, Kheluhi, Vaniya, Meremoth, Eliashib, Mattaniya, Mattenai, nu Jassu

³⁸Bihnui gei: Shimei, Shelemiya, Nathan, Adaiya, Makhnadebai, Shashai, Sharai, Azarel, Shelemiya, Shemariya, Shallum, Amariya, nu Josef

⁴³Nebo gei: Jeiel, Mattithiya, Zabad, Zebina, Jaddai, Joel, nu Benaiya

⁴⁴Anyi hathu ha tsüdila asang pi mathu wubvü sa. Mathu na tsüthu yisha nu mathu tsangathu kesun pi bvü thsüa.