Read Northern Rengma Naga EZRA 5 Bible Online

EZRA 5 - Northern Rengma Naga bible

EZRA 5

¹ Tsü tsüwi atusenjüh-kechü keni Haggai nu Iddo tsa Zekhariya manyi na Israel Nyizawa nyan wina Judah nyithu na Judah nu Jerusalem wi kahangthu wi ajühkhi.

² Khathansha wi Shealtiel tsa Zerubbabel nu Jehozadak tsa Joshua manyi na katsü keni ketsijüh zaya khe manyi na Jerusalem wi Kekinyijjenwa tsü saneng shhu, nu atusenjüh-kechü keni la mathu kiqa.

³Tsü tsüwi Eufrat Niduwa wi ahng Tattenai, Shothai Bozenai, nu manyi pvüshang kedithu na Jerusalem wi gho nu khi: “Thowa na ahza pi nthu cü nu Kekinyijjenwa ha saneng nu tsü ghena kiden-kesha ben nu?”

⁴Mathu na anyi thothu na Kekinyijjenwa tsü kesa ghena kiqaben khe tsüdi nyan la keü.

⁵Isala Anyiza na Judah nyi ccülikesathu hieben, nu Persia nyi kedithu na zhükechi jüh pi Kadimi Dariya cü nu keluneng npi kemu chu mathu na mangla sa nten kesa südheya.

⁶Hawa ha mathu na tsü cüki zhüpi kadimiwa wi kesun kechi:

⁷“Pila Kadimi Dariya kecü, no kecca wi kekhang kesenwa salo.

⁸“Njenkebenwa na ha kechü-u, ikhang na Judah diyyi wi wa nu alon ketiti nu achan kedhithu pi wikeshon wi chi nu Anyiza kedi Kekinyijjenwa sa keben tsü muyale. Kidenkisha nu kekuliwa tsü saben nu tsüna mehaitsü sa waden.

⁹“Isanu ikhang na anyi ccülikesathu wi thowa na ahza pi mathu cü nu Kekinyijjenwa ha saneng nu tsü ghena kiden-kesha thsüben khe ikhang kizalo kesa keü.

¹⁰Thothu na kekuli ha wi alithu saben khe pi no kizale kesalina ikhang na mathu wi tsüthu nyan la keü.

¹¹“Mathu na luneng, Ithu na atssan nu ayyi miwi Anyiza maghathu, nu ithu na kheni Israel kadimi kekhang ntsa kesü na Kekinyijjenwa ha sa nu kiden-kesha kechi gi wi tsü saneng ben.

¹² Isala ithu bamyithu na Tangwi kebenwa Anyiza lebenkeminu cüssi kesalina ma Babilon Kadimi Nebukhadnezzar, Khaldean kadishi kadimi kesü, yala mathu miwi khangya thsüa. Kekinyijjenwa tsü yasa nu anyithu ssinu Babylonia wi kushinyi sa wa.

¹³ Isanu Kadimi Sira na Babylonia kadimi kesa mapi atuwa wi ma Kekinyijjenwa tsü kesaneng ghena ahza khushia.

¹⁴Ma Nebukhadnezzar na Jerusalem wi Kekinyijjen wi suna nu rükatssü hyikhuthu sen wa Babilon wi kekinyijjen wi chi ketheng tsüpi cü neng. Kadimi Sira na ahyikhu hathu pi ma anyi kesü pila Judah wi ahng sa thsü kethengwa Sheshbazzar kwen wi chi cüa.

¹⁵Kadimiwa na tsüthu sen wa Jerusalem wi Kekinyijjen wi chi neng, nu kheni gi wi Kekinyijjenwa tsü sa nenglo ma kiza.

¹⁶Tsalina Sheshbazzar na ghola magi ketegü chi cü; tsü tsüwi na gho nansü kecu tsü saben, isala tsü npi sacenya!

¹⁷“Keujüla ha Njenkebenwa kenen lethu, Babilon kadi zhü kethengthu wi Kadimi Sira na Jerusalem wi Kekinyijjewa tsü kesa neng ghena ahza khuchila nye khe bha nan, nu ha ghena no khati sa ten khe ithu kiza neng chilo.”