Read Northern Rengma Naga EZRA 6 Bible Online

EZRA 6 - Northern Rengma Naga bible

EZRA 6

¹Tsalina Kadimi Dariya na kadi zhü kethengthu pi Babilon wi chi ketheng witsü bha nanlo ahza khuchia.

²Isala tsüna Media diyyi wi Ekbatana nyunutiwa wi kezhüllu kesü hati zhü ketheng muya:

³“Kadimi Sira na kadikesa mapi atuwa wi Jerusalem wi ahhanshathu sa nu kekinyithu pi mecang keten penwa Kekinyijjenwa sanenglo ahza khuchi. Kekinyijjenwa tsüna kemisi meter ngwe nu tagü nu kemeza meter ngwe nu tagü sa ben.

⁴Ma wikeshonthu tsüna alon asha kecheng kechi sengwi achan asha kesüsü chi nu sa ben. Tsü ghena kededi tsüdila kadi pisa pi cüben.

⁵Kadimi Nebukhadnezzar na Jerusalem wi Kekinyijjen wi sen nu Babilon wi kegho suna nu rükatssü hyikhuthu tsü la kheneng sen wha Jerusalem Kekinyijjen wi mathu pen wi mehaitsü chiaben.”

⁶Tsaseng wi Dariya na keluneng hati kesunchi: “Pila Tattenai, Eufrat Niduwa ahng, Shethar Bezanai, nu Eufrat Niduwa wi nshinyi pvüshangthu kecü. “Kekinyijjenwa kete wi nwala,

⁷nu tsü sa keben tsü nkivvü lalo, Judah wi ahngwa nu Judah nyi ccülikesathu yala kheni gi wi Anyiza Kekinyijjenwa tsü saneng thsülo.

⁸Hi, nthu na mathu kiqa pi tsü sanengya thsülo khiben. Kekuliwa tsü nkhen thsüle kesalina Eufrat Niduwa wi khajanathu mukeya kadi keben wi tsü wan pi mathu kededi tsüdi sa cülo.

⁹Atsathangla Jerusalem wi keqhaikedithu na mathu mangwa nsenthu yishü benle nthu kiza khe pi nkecü nsala nu khuchilo: amesü zza süponthu, khaghaneni, nyelela khaghaneni zzathu pi mecang pi Tang wi kebenwa Anyiza kinyile kesa, nyelela awhengsu, amcü, kisengtssü, nyelela oliv deli.

¹⁰Hawa ha sa nu mathu na Tang wi kebenwa Anyiza na keya qo ahhanshathu sapi kinyi nu kesawegü khie pi imiwi nu itsathu miwi chiya kemehai sa thsüle kesalina.

¹¹Hi tsü miwi la khiben, keujüla anyi kesüle kesü lela ahza ha nkina lethu, ma jjen chhan kukhi kesü pashü, pahanwa dhizenya, nu pi ma gwo kecun khamighelo. Nu ma jjen tsüpi bhanieku sa ben.

¹²Jerusalem kessi pi ma kekinyi pen kesawa Anyiza na kadimi nyelela mizzatenti kesüle kesü lela ayenkhukechi ha nyankekinyen sa nu ciwi Kekinyijjenwa yasale kesawa tsü pasha kesawa salo. Hi Dariya, ahza ha khuchidha, Hi ahza khukechi ha tsüdila nieben.”

¹³Isanu ahngwa Tattenai, Shethar Bozenai, nu manyi pvüshang kedithu na kadimiwa na ahza khukechi tsüti sa.

¹⁴ Atusenjüh-kechü Haggai nu Zekhariya manyi na kechü-kenong chi nu Judah nyi ccülikesathu na Kekinyijjenwa tsü sapi wan mehai shagha. Israel Nyizawa nu Persia kadimithu Sira, Dariya, nu Artaxerxes hathu na khikechi ti mathu na Kekinyijjenwa tsü sa cenya.

¹⁵Mathu na Kadimi Dariya na kadikesa mapi tughowa Adar sha kecheng ghanan wi Kekinyijjenwa tsü sa cenya.

¹⁶Isanu Israel nyithu — keqhaikedithu, Levi nyithu, nu kushiyyi wina kheneng keghothu tsüdila anonghe ntsa nu Kekinyijjenwa tsü sametha-kesha sa.

¹⁷Sametha-kesha ghena mathu amesü süpon 100, khaghaneni 200, nu khaghaneni zza 400, pi ahhanshathu sa, nu aneni 12, kesü pi Israel mizza kesüsü kesami hhansha sa.

¹⁸Mathu na Mosa lesüshen wi keben kecükegwethu kenie wina Jerusalem wi Kekinyijjen wi kekuli ghena keqhaikedithu nu Levi nyithu la kiden-keshaya.

¹⁹ Anyi kushiyyi wina kheneng keghothu na tsü mapi vvüthiwa wi asha atuwa taghamejü ghanan wi Shhukeya Kho kemini sa.

²⁰Keqhaikedithu nu Levi nyithu tsüdila mathu ketanla mathu sametha nu keccüna wi methaya. Levi nyithu na anyi kheneng keghothu tsüdi, keqhaikedithu, nu mathu ketanla mathu ghena Shhukeya Kho ahhanshathu ghena asahangthu pathi.

²¹Israel nyi kushiyyi wina kheneng keghothu tsüdi nu anyi ayyi ciwi hang keben Anyiza nkechüyen teshi nu Apvüwa, Israel Nyizawa kinyile keghothu tsüdi ahhanshathu tsü dsa.

²²Mathu na anonghe ntsa nu ghanan tagü Azimi nkechi Mesa Khowa tsü kemini sa. Mathu na anonghe ntsa sa, kepaghenanye Apvüwa na Assiriya Kadimiwa [7] sapi mathu nen thsü nu mathu Israel Nyizawa Kekinyijjen tsü kesaneng wi ma mathu kiqa thsü kesalina.