Read Northern Rengma Naga EZRA 8 Bible Online

EZRA 8 - Northern Rengma Naga bible

EZRA 8

¹Hawa ha ageithu wi alikesathu sa nu kushiyyi Babylonia wi ben nu Artaxerxes na kadimi sa keben wi Ezra gweghe Jerusalem wi keghonengthu nyankezhü:

²Fineha gei wi Gershon, Ithamar gei wi Daniel, David gei wi Shekaniya tsa Hattush, Paresh gei wi Zekhariya pi ma gei wi anyi 150 saghu (ciwi mathu theghi cüki zhü kethengthu na ben) Pahath Moab gei wi Zerahaiya tsa Eliehoenai pi anyi 200 saghu, Zattu gei wi Jahaziel tsa Shekaniya pi anyi 300 saghu, Adin gei wi Jonathan tsa Ebed pi anyi 50 saghu, Elam gei wi Athaliya tsa Jeshai pi anyi 70 saghu, Shefatiya gei wi Mikhael tsa Zebadiya pi anyi 80 saghu, Joab gei wi Jehiel tsa Obadiya pi anyi 218 saghu, Bani gei wi Josifiya tsa Shelomith pi anyi 160 saghu, Bebai gei wi Bebai tsa Zekhariya pi anyi 28 saghu, Azgad gei wi Hakkatan tsa Jehanan pi anyi 110 saghu, Adonikam gei wi Elifelet, Jeuel, nu Shemaiya pi anyi 60 saghu, (mathu na asakhen wi kheneng gho). Bigvai gei wi Uthai nu Zakkur pi anyi 70 saghu.

¹⁵Hi anyi khang tsüdi pi Ahava nyuti wi wa keben atssülen kehhi witsü saghuya nu ithu na ciwi ghanan kecheng ben. Hi ciwi akhang jawi keqhaikedithu pahan mu isala Levi nyithu tsü nbenla.

¹⁶Hi accülikesa meshu tugu cichilo kesunchi: Eliezer, Ariel, Shemaiya, Elnathan, Jarib, Elnathan, Nathan, Zekhariya, nu Meshullam, nu kesansi ghena meshu keni— Joiarib, nu Elnathan.

¹⁷Hi mathu kesun pi Kasifiya wi azitenti ccülikesawa Iddo wi chi, ma nu Kekinyijjen wi kekulinyi ma pvüshangthu wi Anyiza Kekinyijjen wi kekuli ghena anyithu kesun pi ithu cülo kesa khie.

¹⁸Anyiza nanketizen wina mathu na sayakemehai nyi kesü, Mali gei wi Levi nyi kesü Sherebiya kesun pi ithu cü; nu ma tsathu nu ma cünyuthu meshu tagha nu tazen na ma gweghe gho.

¹⁹Mathu na Merari gei wi la Hashabiya nu Jeshaiya pi mathu shilithu meshu ngwe gweghe kesun chicü.

²⁰Tsümiwi anyi 220 na Kekinyijjen wi kekuli nyi saden, Kadimi David nu ma kekhu wi kedithu na mathu bamyithu pi Levi nyithu kiqa thsü kesathu. Mathu tsüdila anyan zhüya.

²¹Ciwi Ahava Tssülen kehhi wi hi ithu tsüdila Anyiza tuwi ithu satemeni nu ma ithu kijünyi kewa hawi ithu ssi nu ma ithu, ithu tsangathu, nu ithu keben tsüdi khwe cülo kesa khie nu kezi sa na kesa ahza khuchia.

²²Hi kadimiwa wi alenketsen süpahi akhang kesü ya ithu kijünyi wa keten wi aghinyithu kemessi ghena ithu ghihie thsülo khie jüghea, kepaghenanye hi ma wi ithu Nyiza na sawegü pi ma nondi ketenthu tsüdila cüden, isala ma ma wina khapeghe bvü kesawa nen nten nu meten cüten kesa kizadha.

²³Tsalina ithu na Anyiza na ithu khwe cülo kesa ghena zi nu kekhie sa, nu ma ithu kekhie tsü luneng cüa.

²⁴Keqhaikedithu kemechan jawi hi Sherebiya, Hashabiya, nu kepa wi meshu tagha kessi shiya.

²⁵Tsaseng wi hi kadimiwa, ma sansichüthu, kekhu wi kedithu, nu Israel nyithu na Kekinyijjen wi senlo khukechi rükatssü, suna, nu ahyikhuthu tsüpi whu nu pi keqhaikedithu cüa.

²⁶Hi hati pi mathu cüa: rükatssü — metric ton 22 rükatssü hyikhuthu 100—kilogram 70 suna khuzza 20—kilogram 8.4 lleza kemetha khuzza 2, tsüna suna khuzzathu ma men makesü.

²⁸Hi mathu wi khi, “Nthu na Apvüwa nthu bamyithu Nyiza tuwi metha, nu tsüti nthu kenen wi khuchi pi ma kinyi keben suna nu rükatssü ahyikhuthu tsüdila metha.

²⁹Nthu na wa Kekinyijjen npi kecu chu mehaitsü tsüthu noncca yalo. Ciwi keqhaikedithu jjenkeshondhi non wina tsüthu whu pi keqhaikedi nu Levi nyi ccülikesathu, nu Jerusalem wi Israel nyi ccülikesathu cülo.”

³⁰Tsalina keqhaikedithu nu Levi nyithu na suna, rükatssü, nu ahyikhuthu tsü sen nu Jerusalem wi Kekinyijjen wi kewa ghena kiden-keshaya.

³¹Asha atuwa taghakeni ghanan wi tsü ithu na Ahava Tssülen kehhi tsü teshi theng nu Jerusalem wi wa. Ithu na kijünyi kewa wi ithu Nyiza na ithu ssi nu ithu ghinyithu ssikaghashen nu ghikecwen wi ithu khwe cüa.

³²Ithu na gho Jerusalem cukeya wi ghanan kecheng mnanya.

³³isanu mejü ghanan wi ithu na Kekinyijjen wi wa, suna, rükatssü, nu ahyikhuthu tsü whu pi Uriya tsa Meremoth, keqhaikediwa tsü cüa. Fineha tsa Eleazar nu Levi nyi meshu keni, Jeshua tsa Jezabad nu Bihnui tsa Noahdiya na ma gweghe ben.

³⁴Pala tsüdila whu nu si, nu mehaitsü zhü ketheng saya.

³⁵Kushiyyi wina keghonengthu tsüdi ahhanshathu mecang pi Israel Nyizawa kekinyi sengho. Mathu na Israel nyi tsüdi ghena amesü süpon 12, khaghaneni süpon 96, nu khaghanenizza 77, khuchi; mathu na aneni 12 pi mathu kesami wi satekemetha ghena la khuchi. Asahang hathu tsüdi pi Apvüwa wi ahhanshathu sala mecang.

³⁶Mathu na kadimiwa na alesü pi mathu kecü tsü la khupi Eufrat Niduwa diyyi wi ahngthu nu kedithu cüa, isanu mathu kekiqa pi anyithu nu Anyiza Kekinyijjenwa tsü ghena khuchi.