Read Northern Rengma Naga NEHEMIYA 1 Bible Online

NEHEMIYA 1 - Northern Rengma Naga bible

NEHEMIYA 1

¹Hawa ha Hakaliya tsa Nehemiya na kekuli sacenkeya cüki kezhü. Artaxerxes na Persia kadimi kesa ngwewa mapi wi Kislev sha wi hi, Nehemiya na ghazen nyunutiwa Susa wi ben.

²Icünyuthu kesü Hanani na anyi akhang kesü gweghe Judah wina gho cuya, nu hi Jerusalem nu ithu Judah nyi Babylonia kushiyyi wina kegho nengthu cüki mathu wi keü.

³Mathu na hi wi anyi hang keyathu nu ithu yyi wi kheneng ghoya kesathu na agüccü ntsa saben nu mathu kete wi hang keben asangthu na mathu nkhichi saben le kesa kiza. Mathu na hi wi la Jerusalem khwetithu nu kaghapeng-jenkathu na mecang kesa tsü wina gho nansü kecu lela qanca ben nu nsa nengle kiza.

⁴Hi khathansha wi ha tsüdi zaya khe, hi donkidu nu qai wa. Hi ghanan kecheng mejü inongü nu ndsa njjü. Hi Anyiza wi khie,

⁵“Apvüwa, Tang wi kebenwa Anyiza! No di ntsa nu ithu na messila nganben. No no tizen nu no mangwa khi khe sa ketenthu tuwi jühtsentsa sala no cenkethenjüh tsü saden.

⁶Apvüwa, hi ghangchi nu hi kekhie kina cülo, hi ghaja ghanan nmagha Israel nyithu ghena kekhie saben. Hi hi Israel nyithu na samidha le kesami khishiben. Ibamyithu nu hi la samidha.

⁷Ithu na gheshighena ntsa nu no shun nu no mangwa khi khe tsü nsala. No Mosa, nmaghawa wina ayenthu pi ithu kecü tsü ithu na n-niela.

⁸ No khili Mosa kekiza tsü meshen chilo. ‘Keujüla no Israel nyithu na hi wi jühtsentsa nsa lethu, hi nthu pi mizzatenti kepathu jawi bvü thsüaben.

⁹ Isala tsaseng wi nthu na hi wi kheneng gho nu hi mangwa khi khe sa lethu, hi nthu na ayyi ccügwenthu wi bvüzighe lela hi nthu ssi neng gho hi kinyile kessikeya pen witsü chiaben.’

¹⁰‘Apvüwa, hathu hana n-nyithu, nu nmaghathu le. No no kekhang nu kezü wina mathu kekashaya.

¹¹Khili hi nu kepa wi nmaghathu no kinyikü mvu ketenthu tsüdi kekhie kina cülo. Nansü haicenkeya pi hi cü nu kadimiwa sapi hi nantizen chi cülo.’ ” Tsü tsüwi hi kadimiwa hyi kepiewa saden.