Read Northern Rengma Naga NEHEMIYA 13 Bible Online

NEHEMIYA 13 - Northern Rengma Naga bible

NEHEMIYA 13

¹ Khathansha wi Mosa Yenwa tsüpi anyithu wi misikhhali sichi khe mathu na, Ammon nyi nyelela Moab nyi kesüla pi Anyiza nyithu ngweghe thsü zhüketheng muya.

² Hawa ha Ammon nyelela Moab nyithu na Israel nyithu na Ejipt wina shhugho keten wi kedsakejjü pi mathu ncüla kesa ghena. Tsüti kesawa nyela, mathu na apisa pi Balam cü nu kishencü pi Israel miwi chi, isala ithu Nyiza na kishenkecüwa tsüpi kesawegü sa cüa.

³Israel nyithu na ayenwa ha kesi zakeya wi azitenti jawi asangthu tsüdi khushi pia.

⁴Kekinyijjen keben ketheng-jjen kehiewa, keqhaikediwa Eliashib na matsü kesie Tobiya manyi jüwi kemehai saghodha.

⁵Ma Tobiya yala keshondhi kedi kesü asu nu hankedemvu pi kekinyithu, Kekinyijjen wi kesenji, keqhaikedithu ghena kekinyi, asu gishü tagha wi kesü, kisengtssü, nu oliv deli pi Levi nyithu, Kekinyijjen wi akhwi kesachüthu, nu Kekinyijjen ghikehiethu kecü tsüpi kethengpen sale kesawa tsü sen thsüa.

⁶Hati sa keben wi tsü hi Jerusalem wi nmi, kepaghenanye Artaxerxes [9] na Babilon kadimi kesa changha nu keni mapi wi hi kheneng wa tsü cüki pi ma kiza. Matsü pahan sengwi hi ma wi khie ya,

⁷nu Jerusalem wi gho neng. Ciwi hi Eliashib na Tobiya yala Kekinyijjen wi keshondhi kesü sen thsü keben tsü mupi imansa.

⁸Hi aghepvü ntsa sa nu Tobiya tsanqai tsüdi pi khala.

⁹Hi keccüna sa nu keshondhithu tsü satemetha pia nu Kekinyijjen ghena atsanqai, kekinyi ghena asu, nu hankedemvu tsüpi ciwi chi nenglo ahza khuchia.

¹⁰ Hi Kekinyijjen wi akhwi kesachüthu nu Levi nyi kepathu la Jerusalem teshi theng nu mathu llithu wi wa neng kesa chüya, kepaghenanye anyithu na mathu kedsa qo pi mathu ncüla kesalina.

¹¹Hi kedithu na Kekinyijjen n-ghangchila kesa ghena hi mathu kha. Hi Levi nyithu nu akhwi kesachüthu ssi neng sengho Kekinyijjen wi chi nu mathu pi kekuli sa neng wa thsüa.

¹² Tsaseng wi Israel nyithu na kheneng mathu ji asu, kisengtssü, nu oliv deli gishü tagha wi kesü sengho Kekinyijjen keben ketheng jjenthu wi chi shhua.

¹³Hi anyi hathu pi keben ketheng jjenthu ghang thsüa: keqhaikedi kesü Shelemiya; Ayenwa kechü ntsa kesü Zadok; nu Levi nyi kesü Petaiya, Mattaniya tsa Zakkur tsawa Hanan, na manyi kekiqawa. Hi anyi hathu na kedsakejjü pi ma nyi kekulithu kegishü wi atsentsa saben kesa chü nu mathu nondi.

¹⁴INyiza, hi no Kekinyijjen nu kekinyi ghena hathu tsüdi sa kechi ha meshenchilo.

¹⁵ Tsü tsüwi hi Judah wi anyithu na Sabbath ghanan kemeshentsse bi tssü misügü keben muya. Kepathu na asu, kisengtssü, kemeshentsse bi, khhaghabvü, nu pala kepathu pi mathu gadathu khhi sa pvü nu Jerusalem wi wa. Hi Sabbath ghanan wi mangla pi njeü lalo mathu kitsanchia.

¹⁶Tur nyunuti wina anyi pahan gho Jerusalem wi hang, nu mathu na Sabbath ghanan wi anga nu atsanqai kepapa kesa sengho ithu nyithu wi jeü.

¹⁷Hi Judah ccülikesathu kha nu mathu kiza, “Ghangchilo, nthu na nkemehai sa benle! Nthu na Sabbath tsü nakhi ben.

¹⁸Ha ghena Anyiza na nthu bamyithu meten nu kededi sengho anyuti ha miwi chile. Isalela, nthu na tsü miwi Sabbath nakhi nu Anyiza leben ketsuwa tsü sengho Israel miwi chiki saben.”

¹⁹Tsalina hi Sabbath sa wa keten kaghapenla minulen [10] dugho meyi anyunutiwa kaghapeng-jenkathu tsü khenya, nu Sabbath npi kecen chu tsü nsha lalo kesa ahza khuchia. Hi inyithu pahan pi kaghapeng-jenkathu witsü ben thsüa nu Sabbath ghanan wi mangla sen nu anyunutiwa wi ndu thsüle kesalina.

²⁰Kuti nyelela keni tughu asenlikedi kesathu atsanqai kepapa pi jeü ketenthu na Manga ghaja anyunutiwa khwetithu na ameiwa jen wa.

²¹Hi hati mathu kitsan chi, “Nthu ciwi ben nu ghanenwa kehie jjügi mangla nmi. Keujüla nthu na hati sa neng lethu hi nthu kiccü cüben.” Tsü nten na mathu Sabbath ghanan ciwi ngho nengla.

²²Hi, Levi nyithu na wa mathu ketanla mathu satemethaya nu Sabbath tsü sen methayalo ahza khuchia. O Anyiza, no kaghali di ntsa kesalina ha ghena la hi meshenchi nu hi heisha cülo.

²³ Tsü tsüwi hi Judah nyi npvüza kejon na nza Ashdod, Ammon, nu Moab wina keghothu yakeben la chüya.

²⁴Mathu tsangathu gishü pahan na Ashdod jühjja nyelela ajühjja kepa wi khi wa nu ithu jühjja nchüla.

²⁵Hi anyithu kha, mathu kishencü, mathu kiccü nu mathu lissen pfü cü. Tsaseng wi hi mathu yala mathu nyelela mathu tsangathu na khiela asangthu ssinu keyali nbendha kesa Anyiza nyan wina kishen thsüa.

²⁶ Hi mathu kiza, “asang nzathu na Kadimi Solomon sapi sami thsüle. Ma mizzatenti kepathu kadimi tsüdi miwi diki. Anyiza na ma tizen nu ma pi Israel tsüdi miwi kadimiwa sa thsü isala ma kesami hawi dule.

²⁷Isalethu ithu na nthu tsütsonca tsü nie nu Anyiza jüh nkinala asang nzathu yaya kwe?”

²⁸ Eliashib tsa Joiada na Keqhaikedi ntsawa, isala ma tsa kesü na Beth Horon nyuti wina keghowa Sanballat nga yaya. Tsalina hi Joiada pi Jerusalem wina bvü thsüa.

²⁹Anyiza, anyi hathu na khatila keqhaikediwa pen nu no keqhaikedithu nu Levi nyithu ssinu cenkethenjüh tsü nakhi ben khe meshenchilo.

³⁰Hi asangthu wina anyi tsüdila satemetha; hi keqhaikedithu nu Levi nyithu ghena ayenthu cühchi nu mathu tsüdila mathu kekuli chüya thsüle kesalina:

³¹hi kekinyithu tsü mecang thsüle kesalina matsü wina achan pvügho thsü, nu anyithu yala mathu asu wwi nu kedsau nyün tegü tsüpi kekinyi ghena sengho thsüa. O Anyiza, ha tsüdi meshenchi nu ighena kemehaiwa sa cülo.