Read Northern Rengma Naga NEHEMIYA 4 Bible Online

NEHEMIYA 4 - Northern Rengma Naga bible

NEHEMIYA 4

¹Khathansha wi Sanballat na hi Judah nyithu na akhwetiwa tsü sa neng shhudha le kesa zaya khe ma lebentsu ntsa sa nu ma ikhang nankeqhe.

²Ma pvüshangthu nu Samaria süpahithu tuwi ma khi, “Kethathau Judah nyithu ha mathu na mangwa saben le meshen ben nu? Mathu na anyunutiwa ha sa nengle kidenben kwe? Mathu na ahhanshathu sapi kinyithu ghanan kesü jü ketan na kekuli sacenya benle meshenben kwe? Mathu na alon kemecang qan pi abhon sa ketheng tsüpi alonjjen saya mehai kwe?”

³Tobiya na ciwi ma kete wi ngan nu khi, “Mathu na akhweti khati kesa saya mehai nu? Whewhe kesü lela tsü shunshaya mehai le!”

⁴Hi kekhie sa, “O Anyiza! Mathu na khatila ithu nankeqhe ben khe kina chilo. Mathu nankeqhe kebenwa tsü ya mathu miwi keghowa salo. Nyu ya mathu keben tsüdi tengya, nu mathu ghan sen asang yyiwi atssüzüthu sa wa kesawa salo.

⁵Mathu na nkemehai kesa nu mathu kesamithu teshi pi ncüla, kepaghenanye mathu na ha sa kebenthu ithu kimenni theng.”

⁶Tsalina ithu na akhwetiwa tsü sa wa nu wan tsü kemisi gishü pahan saya, kepaghenanye anyithu na nong ntsa kuli.

⁷Sanballat, Tobiya, nu Arabia, Ammon, nu Ashdod nyithu na ithu na Jerusalem khwetiwa tsü kesa neng wi mehai kayi nu akhweti kukebithu tsü khenyadha le kesa zakeya wi mathu lebenminu ntsa sa.

⁸Tsalina mathu gweghe ghola Jerusalem ssikaghashen nu tsü khen cüle acho sa,

⁹isala ithu na Anyiza wi kekhie saki nu anyithu pi aghaja ghanan tsü hie thsüa.

¹⁰Judah nyithu na akhwi kesü sa: “Ithu na akhhi kepvü ghena nchaladha; Ciwi alon kepakhhi sha ntsawa khupi nsathu yishü ben. Ithu na khatinu nansü akhwetiwa ha sa nengya nu?”

¹¹Ithu ghinyithu kemeshen na ithu na mathu mu nben nyelela mathu na ithu miwi gho ithu pathi nu ithu kekuli tsüpi asakhen npi kesa thsü chu ithu na mangla chü nben le sa.

¹²Isala matsü tsü wi Judah nyithu ithu ghinyithu jawi hang kebenthu na gho ithu ghinyithu na khati ithu shun le kiden ben khe pi ithu kitsan chichi sa.

¹³Tsalina hi anyithu ya njünnu, apie, alathu pvü nu agei gei sala khiewa akhwetiwa tsü npi sacen khe tsü sengwi ben thsüa.

¹⁴Hi anyithu na ccükwenshü keben mu, tsalina hi mathu nu mathu ccülikesathu nu kedithu wi khi, “Ithu ghinyithu tsü nmessi lalo. Meshenchilo, Apvüwa na khatila di nu qhethiketen kesa khe, ma nthu diyyi nyithu, nthu tsangathu, nthu wubvüthu, nu nthu jjenthu ghena ssikesali den.”

¹⁵Ithu ghinyithu na ithu na mathu acho kiden keben tsü chüyadha le kesa zayadha, nu Anyiza na mathu cho tsü chayadha le kesa mathu na chüyadha. Tsaseng wi ithu tsüdila ithu kekuli wi wa akhwetiwa tsü sa neng wa.

¹⁶Tsü nten na inyithu gishü pahan na kulithu gishü pahan na aghighe gwomejuwa pvü, nu apie, atsonhi, nu alathu, sen nu aghihie. Nu ithu ccülikesathu na anyithu kiqa

¹⁷nu mathu na akhwetiwa tsü sa neng. Anyi ajjenkesa tsanqai pvü kebenthu lela ma kwen kesü pi kuli nu kepawa pi aghighe khusen,

¹⁸nu kuli kebenthu tsüdila njünnu pi alicen wi chi pvü shan. Anyi thowa na kemessi benle kesa tutuwa khouchi ten khe ma hi gweghe ben.

¹⁹Hi anyithu nu mathu ccülikesathu nu kedithu wi kiza, “Kekuli ghena alen kesiesie wi bvüzighe nu ithu khokho temejala akhweti miwi ben.

²⁰Keujüla nthu na tutuwa kekhou hhai zaya lethu, gho hi vüla saghu yalo. Ithu Nyiza na ithu ghena ssikesali ben.”

²¹Tsalina ghanan kaghapengla, atsantheghi na wa aghaja wi ghotsithu npi keshhugho chu ithu gishü pahan na akhweti miwi kulithu, gishü pahan na apiethu sen nu ithu ghihie isa.

²²Ha tsüwi ha hi anyithu kizala mathu nu mathu kekiqathu tsüdila aghaja Jerusalem wi ben walo, isanu ithu na aghaja wi anyunutiwa hieya nu aghanan wi kekuli la hieya le kesalina.

²³Hi, nyelela hi kegweghethu, imaghathu, nyelela ighikehiethu la aghaja wi lela athsümeni nkhushi. Nu ithu tsüdila akwen wi aghighethu khusen.