Read Northern Rengma Naga NEHEMIYA 6 Bible Online

NEHEMIYA 6 - Northern Rengma Naga bible

NEHEMIYA 6

¹Sanballat, Tobiya, Geshem, nu ithu ghinyi kepathu na ithu na akhwetiwa tsü sa cendha, nu ciwi akukebi nmiladha kesa zaya (ithu na ajjenkhen pi kaghapeng-jenkathu wi npi chiya lela).

²Tsalina Sanballat nu Geshem manyi na ketsijüh kesü kesun pi hi wi chi, hi wa Ono Deshentijü wi anyu kesü wi manyi metulo khi. Hawa ha manyi na hi patena cüle acho kesü sa.

³Hi nyilothu kesun pi manyi wi khi thsü, “Hi kekuli kedi saben nu ciwi cüya nben. Hi ciwi wa nshinyi kemetu ghena ketan kekuli tsü ngan thsüa nten.”

⁴Manyi na ketsijüh tsü makesü mejü tughu kesun chi, nu hi tsüdi wi la tsü makesü kesun neng chi cüa.

⁵Tsaseng wi Sanballat na ma maghathu kesü kesun pi hi wi ketsijüh mangawa sengho thsü, tsüna zhükechi nkekhen kesü. [5]

⁶Tsüna hati siya: “Geshem na ithu jenphon anyithu jawi ajühjüwa hati khi benle hi kiza, no Judah nyithu na kivvüle kesalina akhwetiwa tsü sa neng ben. Ma kekhi na no ketanla no sapi kadimi sa le saben,

⁷nu no atusenjüh-kechüthu pahan ya Jerusalem wi no Judah kadimiwa le kesa pi thangchi thsüle kiden pi thengdha le. Ma Jenkebenwa na ha jjügi zayadha, tsalina ishinyi kemetuli nu ha jjügi ghena keccünengli chilo khiben.”

⁸Hi keluneng kesü kesun pi ma wi chi, “No khi keben witsü atsentsa mangla nmi. Tsü tsüdila no ketanla meshenkeya ketan.”

⁹Mathu na ithu pateqhe nu kekuli ngan thsüa le sa. Hi kekhie sa, “Isala Anyiza khili hi sapi khang cülo!”

¹⁰Ha tsüwi ha hi Mehetabel tsa Delaiya tsawa Shemaiya, ma jjen teshi meyala kebenwa tsü hhainan wa. Ma hi kiza, “Ishinyi wa Kemetha Pen Kekinyijjen wi ajenka khenten pvü nu kuthi wa nsathu yishüben, kepaghenanye mathu na no pathiale ghoden. Aghaja hale ha lela mathu na ghola no pathiaben.”

¹¹Hi luneng, “Hi anyi tubvü wa kuthi wa kesa nyi nye. No hi wala Kekinyijjen wi kuthi nu hi kahangli hangshaya ben le meshen ben kwe? Hi tsüti sa nben.”

¹²Hi tsü meshen nan nan Anyiza na Shemaiya nccüneng kesa chüya, isala Tobiya nu Sanballat manyi na alaa pi ma jupila hi kitsan thsü.

¹³Manyi na ma melli pi hi pateqhe pi sami thsü nu manyi inyankemehai yasa nu hi kimenni cüle kesalina.

¹⁴Hi kekhie sa, “Anyiza, Tobiya nu Sanballat manyi na mangwa sa khe meshenchi nu manyi meten cülo. Tsüti atusenjüh-kechü nzawa Nodiya nu atusenjüh-kechü kepathu hi pateqhe kesathu tsüdila meshenchilo.”

¹⁵Ghanan deni nu keni kekuli sengwi Elul sha ngwe nu manga ghanan wi akhweti maben wi kekuli sacenya.

¹⁶Ithu ghinyi ithu kevü mizzatentithu wi kebenthu na ha zakeya wi mathu kejügheyadha kesa chüya, kepaghenanye anyi tsüdila Anyiza kekiqa sen nu kekuli ha sayale kesa chüben.

¹⁷Hati kesa chuli Judah nyi ccülikesathu na Tobiya wi lesü pi kecüli sagho.

¹⁸Ma myiwa Judah nyi Arah tsa Shekaniya ghena Judah wi anyi kejonla ma wiwa sa. Tsü miwi, ma tsa Jehohanan na Berekhiya tsa Meshullam ngawa yaya.

¹⁹Anyithu na ituwi Tobiya na kekuli kemehai sa kechi cüki tsüdi khi nu hi kekhi tsüdi pi ma kiza. Nu ma lesü kejon zhü pi hi pateqhe le sa.