Read Northern Rengma Naga ESTHER 1 Bible Online

ESTHER 1 - Northern Rengma Naga bible

ESTHER 1

¹ Kadimi Xerxes na Persia ghazen nyunutiwa Susa wi ma kadipen wi ben nu India wina wa Sudan kecu diyyi 127 miwi kekhang sen.

³Ma kadikesa mapi kechengwa wi ma kekhu wi kedithu nu ayenkesenthu tsüdi ghena kemishu kesü sa. Persia nu Media süpahizithu wi kedithu, nu diyyithu wi ahngthu, nu anyi keban kemehaithu la ben.

⁴Ma asha tugho chuli kadi keben-keyeng tsikemehai nu jenkeben tsüdi pi nyu keccüca kesü sa.

⁵Tsaseng wi kadimiwa na ghazen nyunutiwa Susa wi kahang nyithu keban nu ketha-uthu tsüdi ghena kemishu kesü sa. Tsüna hapta kesü chuli kadijjen sanku wi sa.

⁶Ciwi kadi ccühhawa witsü linen kemehai nmiepheü pila marble pi kesa kedonbvüthu miwi rükatssü qeithu witsü misüki, nu khakhithsü atsena nu kemiki pi keshondhithsü sapi ma tsisa theng. Suna nu rükatssü pi kedonkipenthu sapi accühha witsü chi, marble kemiki, alon kemiki keben, mejüti wegüthsü kesa, nu alon menkedhu pi acükhaku zhütheng.

⁷Suna hyithu kenitanla makesü nkesathu wi chi pi nyu jjü thsü, nu kadimiwa na kisengtssü meshumena ntsa khuchia.

⁸Ciwi kisengtssü zan neng nsa, kepaghenanye kadimiwa na anyi tsüdila ma kejjü mvu chu[1] jjü thsülo kesa ahza pi kadijjen wi amaghathu cütheng.

⁹Tsü tsüwi Kadijja Vashti na kadijjen non wi kemishu kesü sapi nzathu cüben.

¹⁰Kemishu kesa tagü ghanan wi kadimiwa na jjü pi ma yeng ntsa saya, tsalina ma magha kedithu meshu tagü cichi; Mehuman, Biztha, Harbona, Bigtha, Abagtha, Zehthar, nu Karkas.

¹¹Ma mathu na wala Kadijja Vashti yala kadiliwen pvüya thsü nu ma ssigholo ahza khuchia. Kadijja na atsikemehai kesü, nu kadimiwa na ma wubvü tsikemehai tsüpi kedithu nu ma kejjenthu tsüdi ccüca mvu kesalina.

¹²Isala amaghathu na kadimiwa kekhi tsüpi Kadijja Vashti kekiza wi ma ngho mvula hhaghe. Tsüna kadimiwa sapi aghepvü ntsa sa thsüa.

¹³Kadimiwa na kemehai keteshü jjügi ghena ma sansichüthu kemeshen kekeü tsüpi ayen saden, tsalina ma ma sansichüthu na mangwa nsathu yishü khe chü kebenthu tsü cichi.

¹⁴Ma keshüthangla wa hathu wi kesansijüh keü den; Karshena, Shethar, Admatha, Tarshish, Mer, Marsena, nu Memukan; Persia nu Media kedithu meshu tagü hana kadiyyi wi kedi ntsathu.

¹⁵Ma anyi hathu wi khi, “Hi, Kadimi Xerxes, ahza kesü pi imaghathu cü nu kesun pi Kadijja Vashti wi chi, isala ma tsü nkina le: Ithu na ma pi khati nsathu yishü khe ayenwa na mangwa le khiben nu?”

¹⁶Tsaseng wi Memukan na kadimiwa nu ma kedithu wi khi, “Kadijja Vashti na kadimiwa ketan nyela ma kekhu wi kedithu la kimennidha, tsüna kadiyyi wi anyi tsüdi tuwi sadha le!

¹⁷Kadiyyi wi kinyibvüthu na kadijjawa na khati sa khe zaya meyi mathu tsüdila mathu wubathu nkhichila sa tendha. Mathu na khiben, ‘Kadimi Xerxes na Kadijja Vashti na ma wi gholo ahza khuchi, isala ma ngho mvula hhaghe le.’

¹⁸Persia nu Media kadi wubvüthu na kadijja yencüki tsü zakeya wi mathu nansü nten na tsü cüki khipi mathu wubathu kiza waben. Apen kahe wi tsüdila kinyibvüthu na mathu wubathu nkhichila nu awubathu na mathu wubvüthu miwi aghepvü ben.

¹⁹Keujüla Njenkebenwa kenen lethu, Vashti na kadimiwa tuwi gho neng nbendha kesa kadilesü kesü zhüpi thangchilo. Tsü zhüpi Persia nu Media yenthu wi chiya, isanu tsü nkemili thsüle kesalina. Isanu ma kadijja penwa tsüpi kepa wi nza kemehaiki pahan cülo.

²⁰No thangkechi hapi kadiyyi ha maben wi chü thsü lethu, kinyibvü tegüthu tsüdila mathu wubathu na keban le ketha-u lela ma kinyikü ben.”

²¹Kadimiwa nu ma kedithu na ajjügi ha nen, nu kadimiwa na Menukan kekhi tsüti sa.

²²Ma ketsijüh kesü pi kadiyyi kesüsü wi tsü jühjja nu kezhüyen kenie wina kesunchi nu khi, awuba tsüdila ma jjen wi ma apvüwa sa nu kekhang jüh kekhi sakhenwa sa ben.