Read Northern Rengma Naga ESTHER 2 Bible Online

ESTHER 2 - Northern Rengma Naga bible

ESTHER 2

¹Ashiseng wi kadimiwa na ma ghekepvü kagha seng wi ma Vashti na khati sa nu lesüzhü pi ma shunla thangchi khe tsü cüki meshenki ben.

²Kadimi sansichüthu pahan ma tetsaki ketenthu na ma wi khi, “Mangkesa na no ghena ghala pvünyimetha atsikemehai kesü nbha nan thsü nu?

³No kadiyyi kekhu wi diyyi tsüdi wi kedithu yala ghala pvünyimetha atsikemehaithu tsüdi ssinu he ghazen nyunutiwa Susa wi nji nzajjen witsü gho thsülo. Mathu pi n-nyi nzathu noncca ketenwa kediwa Hegai kekhu wi chi nu mathu ya atsikemehai ghena kidenya thsü.

⁴Isanu no ghala no kenen ntsawa tsüpi Vashti mithon wi kadijja sayalo.” Kadimiwa na ha kesansi jüh kemehai le meshen, tsalina ma tsü nie.

⁵Ciwi Susa wi Judah nyi kesü Jair tsa ma nyan Mordekai na hangben, ma Benjamin mizza wina kegho nu Kish nu Shimei shicübvügha nyi kesü.

⁶Babilon Kadimi Nebukhadnezzar na Jerusalem wina Judah Kadimi Jehoiakim nu anyi akhang kesü ghansen kushiyyi wi atssüzü sa kewa witsü Mordekai la mathu jawi ben.

⁷Ma ma cünyuwa nga kesü, Esther, Ibri nyan wina Hadassa ikesa ben; ma ghala atsikemehai kesü, nu agwo la mehaitsü. Ma bajja keshü seng wi Mordekai na ma nonccaya, nu ma noncca pi ma nga kesü ti saya.

⁸Kadimiwa na thangkechi ketheü kesü khuchi nu ghalathu kejon ssinu Susa wi gho, Esther la mathu jawi ben. Ma la pi kadijjen wi nzajjen kenonccawa Hegai kekhu wi chia.

⁹Hegai na Esther nen, ma wan Hegai kaghali pvüya. Ma wan nu Esther ya atsikesa ghena kidenya thsü nu kedsakejjü kemehai ntsa pi ma cü. Ma nzajjen wi apen kemehai ntsawa pi ma cü nu kadijjen wi ghala meshu tagü kessi pi ma ketsikinathu sa thsüa.

¹⁰Mordekai na sansi cü ketheng ti Esther na ma Judah nyi kesa tsüpi nyu kuthi.

¹¹Mordekai na atsathangla wa nzajjen tuwi tsü ha wa, Esther na khati saben nu ma miwi mangwa saten khe chüyale kesalina.

¹²Nza atsikesa ghena kenoncca tsüna amapi kesü — asha tugho mirr deli pi ghayeng nu pala asha tugho balsam deli pi ghayeng den. Tsaseng wi ghala kesüsü na ssinu Kadimi Xerxes tuwi wa.

¹³Khathansha wi nzawa na nzajjen wina kadijjen wi wa khe ma thsümeni ma kepvü mvuwa pvüden.

¹⁴Ma minulen wi ciwi waden, nu ghanenwa wi ma ssisen wa nzajjen kepawa wi kadimi meshibvüthu kenonccawa Shashgaz kediwa kekhu wi chiden. Kadimiwa na nzawa tsü nen nu ma nyan ci nkechi tsü ma kadimiwa tuwi wa neng nbendha.

¹⁵Esther na Kadimiwa tuwi kewa tsü na gho. Esther na Mordekai cünyuwa Abihail nga, ma Esther noncca pi ma nga ti saya; anyi Esther kemuthu tsüdila ma nen yaden. Matsü na gho Esther kecu wi ma Hegai kediwa nzajjen kenonccawa na ma athsümeni mangwa pvülo kiza khe ma tsü pvüya.

¹⁶Tsalina Xerxes na kadimi kesa mapi tagüwa wi asha taghawa, Tebeth sha wi Esther ssinu Kadimi Xerxes kadijjen wi gho.

¹⁷Kadimiwa na ghala kepa miwi Esther nen, nu ghala kepathu miwi Esther na ma kenen nu kaghali pvüya. Kadimiwa na kadiliwen pi ma li wen cü nu ma pi Vashti mithon wi kadijja saya .

¹⁸Tsaseng wi kadimiwa na Esther kenyuwakü wina kemishu keti kesü sa, nu ma kekhu wi kedithu nu ayenkesenthu tsüdi cichia. Ma kadiyyi tsüdi wi kemnan pi cü, nu kadimi juthu la pi gishü chi cü.

¹⁹Tsü tsüwi kadimiwa na Mordekai pi ayenkesen pen wi ben thsü theng.

²⁰Esther na ma khilila ma Judah nyile kesa pi nyu npi chü thsü. Mordekai na ma tsüpi thola nkiza lalo khitheng, nu ma kheni ghanyi tsüwi ma jühkekina ti hawa ha kina.

²¹Mordekai na kadijjenwa wi kekuli kesa tsüwi Bigthana nu Teresh, kadijjen wi kedithu kadimiwa jjenkeshondhithu wi kedulen kehiewa keni na Kadimi Xerxes nanmeghü shagha nu acho sapi ma pathiale sa.

²²Mordekai na tsü chüya nu pi Kadijja Esther kiza, nu ma Mordekai na chükeya tsü khipi kadimiwa kiza.

²³Ciwi kepiliwa nu tsüna ntsakhiwa le kesa chüya, tsalina manyi qho pi aca wi hanthia. Kadimiwa na ha cüki pi kadiyyiwa kadi zhüketheng witsü zhüyalo ahza khuchia.