Read Northern Rengma Naga ESTHER 3 Bible Online

ESTHER 3 - Northern Rengma Naga bible

ESTHER 3

¹Matsü pahan seng wi Kadimi Xerxes na anyi kesü ma nyan Haman pieki pi atokilanser sa thsüa. Haman na Agag[2] shicübvügha kesü Hammedatha tsa.

²Kadimiwa na ma kekuli sa keben kedithu tsüdila Haman kenyuwakü wina ma tuwi akhhutsüdu nu nkhwendulo kesa ahza khuchia. Mordekai ketan tsü nsa mvu kesa khe mathu tsüdila tsüti sa.

³Kadi kekuli kesa wi kedi kepathu na ma wi ma mangkesa na kadimiwa ahza khukechi tsü nkinanu kesa ma keü;

⁴mathu na atsathangla ma tsükhvu sa, isala ma mathu jüh nkina. Ma khimetha pi mathu kiza, “Hi Judah nyi kesü ghena hi Haman tuwi kukeduya nben.” Tsalina mathu ha khipi Haman kiza, nu ma Mordekai yencüki tsü ghang pvü benyala nye khe sa.

⁵Haman na Mordekai ma tuwi akhhutsüdu nu nkhwendu ntenle kesa zakeya wi ma aghepvü ntsa sa,

⁶nu ma Mordekai na Judah nyi kesüle kesa chükeya wi ma Mordekai ketan meten kecü miwila sale kesa südheya. Ma Persia nyi Kadiyyi maben wi Judah nyi tsüdi pathiale acho kidenya.

⁷Kadimi Xerxes na kadikesa tagha keni mapi asha atuwa, Nisan sha wi Haman na asha khawa nu atsathang khawa wi ma acho kiden kebenwa tsü sati sayaben khe akezen (mathu na pi “purim” le khiden) wwi nan nu salo kesa ahza khuchia. Asha tagha keniwa, Adar sha tagha kecheng ghanan wi sale südheya.

⁸Tsalina Haman na Kadimiwa kiza, “Ciwi anyi amizza kesü no kadiyyi tsüdi wi bvüzighe ben nu diyyi tsüdi wi muyaben. Mathu na anyi kepathu kesüla sa nketen kekuli yenthu saden. Tsümiwi la mathu na kadiyyi yenthu tsü nie nten, tsalina tsü ghang pvü benyale kesa tsüna no kemeshen nye.

⁹Keujüla ha Njenkebenwa kemeshen lethu, mathu pi shü thsüaben kesa ayen kesü khushi chilo. Keujüla no isa lethu, hi rükatssü kilogram 340,000 miwi pi kadiyyi wi ayenkesen ghena kadi keben wi chi cüaben kesa ijüh khuchiben.”

¹⁰Kadimiwa na ma kwenzza qhan khushi pi tsüthu jeng pi thangchilo kesa pila Judah nyithu ghinyiwa Agag shicübvügha Hammedatha tsawa Haman cüa.

¹¹Kadimiwa na ma kiza, “Anyithu nu mathu pisa tsüna nji; no mathu pi no kemeshen saya mehai.”

¹²Tsalina asha atuwa wi tagha kecheng ghanan wi Haman na kadimi kezhüthu cichi nu thangkechi kesü khi nu zhü pi kadiyyiwa wi senketen jühjja nu kezhüyen tsüdi wi khikemilichi thsüle kesalina pi kekhang kesenthu, ahngthu, nu kedithu tsüdi wi kesunchi. Tsüwa tsüna Kadimi Xerxes kwenzza qhan pi jeng nu ma nyan wina pi kesunshi chia.

¹³Lesükepvüthu na thangkechi tsü sen nu kadiyyiwa wi diyyiwa tsüdi wi wa. Tsüwa tsü non wi kecükegwethu hati kesa na ben, Adar sha tagha kecheng ghanan witsü ghanan kesü jü ketan na Judah nyi, acali nu keqhai, nza nu ghanyithu, tsüdi pathilo. Mathu nanketizen nmitha pathilo, nu mathu kebenthu khuyalo.

¹⁴Thangkechi lesü wi kebenthu tsüpi diyyi tsüdi wi anyi mabenla chüya thsüa, nu anyi tsüdila tsü ghanan kegho wi kidenya thsüle kesalina.

¹⁵Kadimiwa ahza khukechi wina ajühwa tsüpi ghazen nyunutiwa Susa wi anyi tsüdila chü thsüa, nu lesükepvüthu na jühtheü ha pvü nu diyyithu apen tsüdi wi wa thsüa. Anyunutiwa Susa wi chükivvü sa keben tsü witsü Kadimiwa nu Haman manyi na gweghe donki nu jjüben.