Read Northern Rengma Naga ESTHER 4 Bible Online

ESTHER 4 - Northern Rengma Naga bible

ESTHER 4

¹Mordekai na hathu ha tsüdi zakeya wi ma hathakina wina ma thsümeni mezüqhe. Tsaseng wi ma aleshithsü mphiya, ajuwen pi ma li wi chiya, nu anyunutiwa tsü pvüdhila kohon nu qai ntsa sa,

²tsüti sa ghola kadijjen kedulen npi kecu chu sa. Ma nduku wi ndu, kepaghenanye aleshithsü mphi keten thola ciwi du thsü nten.

³Diyyi tsüdi wi khiewi kadimi na pi thangkechi tsü chüya khe, Judah nyithu jawi anonkegü di ntsa sa. Mathu na zi, qai, kohon, nu mathu kejon na aleshithsü mphi nu ajuwen wi kuweng.

⁴Khathansha wi Esther maghalethu nu kedithu na Mordekai na khati saben khe pi ma kekiza wi ma leben güccü ntsa sa wa. Ma Mordekai na aleshithsü mithon wi pvülo kesa athsümeni pahan kesun chicü lela ma tsü meya mvula.

⁵Tsaseng wi ma kadimiwa na kadijjen wi kediwa pi ma magha sa thsü kethengwa Hathak cichi, nu Mordekai wi wala mangwa sa nu khati kesa ghena khe chüyalo ma kiza.

⁶Hathak na anyunutiwa non wi kadijjen kedulen wi Mordekai wi wa.

⁷Mordekai na ma miwi mangwa sa khe tsüdi nu Haman na keujüla Judah nyi tsüdi pathi lethu, apisa khaju pi kadi keben wi chile khishidha khe tsüdi khipi ma kiza.

⁸Ma Judah nyithu yasalo kesa thangkechi Susa wina kekhushi lesü tsü kesü pi Hathak cüa. Hathak wi Mordekai na ha sen wa Esther cü, khati saben khe khimetha pi ma kiza, nu ma wa kadimiwa wi keshükenen nu ma nyithu nantizen chicülo khielo kiza.

⁹Hathakh na tsüti sa,

¹⁰nu Esther na ketsijüh ha sen wa Mordekai cü nenglo pi ma cüa:

¹¹“Keujüla anyi kesü nza le npvüza lela kadimiwa na ci nkechi tsü accühha nduku wi ma metule wathu, anyi tsüpi shü thsüaben. Hawa ha ayen; diyyi tsüdi wi kadimi sansichüthu na wala anyithu kecu tsüdila tsü chüben. Ayen hawa miwi alen kesütan saya mehai: keujüla kadimiwa na ma suna khhatssü pi anyi kesü wi changchi cü lethu, anyi tsüwa kahangli heisha yaben. Isala kadimiwa na hi cikechi asha kesü wadha.”

¹²Mordekai na Esther ketsijüh tsü mukeya wi,

¹³ma kekitsan ha pi ma wi kesun chia: “No kadijjen wi keben ghena no Judah nyi kepa miwi yazishu benle nmeshen lalo.

¹⁴Keujüla no hati kesa tsü wi ha ceen ben wa lethu, tang wi Judah nyithu ghena kekiqa dugho mathu hangsha yaben, isala no shü nu nba theghi ghena asakhen sa ben. Isala matsü hati kesa wi ha ghena no pi kadijja sa thsü thengla nchü le!”

¹⁵Esther na keluneng ha pi Mordekai wi kesun chia:

¹⁶“wala Susa wi Judah nyi tsüdi saghuyalo; kezi kesü sa nu ighena kekhie salo. Aghaja ghanan kecheng mangla ndsa njjüla. Imaghalethu nu hi la tsü makesü sa den. Tsaseng wi ccüna ayenwa kenie wi nye lela hi kadimiwa wi waden. Keujüla hi ha kesa ghena nshüthu yishü lethu hi shüaben.”

¹⁷Tsaseng wi Mordekai na wala Esther na ma salo kekiza tsüdi sa.