Read Northern Rengma Naga ESTHER 5 Bible Online

ESTHER 5 - Northern Rengma Naga bible

ESTHER 5

¹Ma kezi kesa kecheng ghanan wi Esther na ma kadi gwomejuwa kaghazu pvüya nu wa kadijjen ndukewa ccühha wi ngan nu kadipen keshondhi wiwa peghe ben. Kadimiwa na nduku wi ma kadipen wi donki nu kedulen wiwa peghe ben.

²Khathansha wi kadimiwa na Kadijja Esther na akhemi wi ngan keben muya khe ma nzawa nenya, nu ma suna khhatssü tsüpi ma wi chang chi cüa. Isanu nzawa na shhugho tsü pang tsü ghansenya.

³Kadimiwa na keü, “Kadijja Esther, mangwa nu? No mangwa yamvu ben khe hi kizalo, hi tsüpi no cüben — hi kadiyyi gishü pahan sa lela.”

⁴Esther na luneng, “Keujüla ha Njenkebenwa kenen lethu, hi no nu Haman nshinyi ya shita wi hi nshinyi ghena kiden keben kemishu witsü gho thsü mvu benle.”

⁵Kadimiwa na Haman wan gholo ahza khuchi, nu manyi wa Esther kejjen sale kesalina. Tsalina Kadimiwa nu Haman manyi na Esther na kemishu kiden keben witsü wa.

⁶Kisengtssü jjü keben wi kadimiwa na Esther wi keü, “No mangwa yamvu ben khe pi hi kizalo, no tsü muya ben na. Hi no kekhie tsü sapi no cüaben, keujüla no hi kadiyyi kegishü pahan khie lela.”

⁷Esther na luneng,

⁸“Keujüla Njenkebenwa na tizen nu hi kekhie sa cüben lethu, hi no nu Haman nshinyi dhitsü wi hi nshinyi ghena kemishu kepa wi la kiden keben witsü gho thsü mvu ben. Hi mangwa yamvu ben khe ciwi ccüna no kizaben.”

⁹Haman na ma leben non wi ma nongthi nu anonkeghe sala kemishu pen tsü teshi nu bvüa. Isala ma wa kadijjen kedulen wi Mordekai muya lela Mordekai na ma kenyuwakü zensu mangla sapi ma ncü, nu Haman na ma miwi aghepvü ntsa saya.

¹⁰Isala ma kekhenengya nu ajjen wi wha. Tsaseng wi ma pvüshangthu cipi ma jjen wi chi nu ma wubvü Zeresh la gho mathu gweghe benlo khi.

¹¹Ma mathu wi ma khatila keban saben, ma atsa khaju ben, kadimiwa na ma sapi apen kemisi ntsa wi chicü, nu ma kadimiwa kedi kepathu miwi khatila kemechanwa saben khe khipi kapvüwa.

¹²Haman na khi, “Ha miwi mangwa ben nu! Kadijja Esther na thola ncila kemishu kesü sapi kadimiwa ishinyi ketan cü, nu dhitsü wi la ishinyi ci neng ben.

¹³Isala ha tsüdi miwi hi Judah nyiwa Mordekai na kadijjen kedulen wi donki keben mu keben chu ighena kemehai nmi.”

¹⁴Tsalina ma wubvü nu ma pvüshangthu na khi, “No mangkesa na kahanthi pen kesü kemisi meter ngwe nu keni sa meya nu? Dhitsü ghanen wi no kadimiwa wi khie nu Mordekai pi ciwi hanthilo, isanu no n-nonghethi kemishuwa witsü waya mehai.” Haman kemeshen na ha acho kemehai kesü, tsalina ma kahanthi penwa tsü saya.