Read Northern Rengma Naga ESTHER 6 Bible Online

ESTHER 6 - Northern Rengma Naga bible

ESTHER 6

¹Tsü ghaja kadimiwa na jen meya, tsalina ma kadiyyiwa kadi zhükethengthu tsü sengho ma wi sichi thsü.

² Mathu na sikeben pahan witsü kadijjen wi kadimiwa jjen keshondhithu kehie kedi keni Bigthana nu Teresh manyi na acho sapi kadimiwa pathiale keben wi tsü Mordekai na khatinu kelishi chi cü khe tsü cüki kezhü na ben.

³Kadimiwa na keü, “Ithu na ha ghena khati Mordekai nyuwakü nu akutimen sapi cü nu?” Ma maghathu na khineng, “Ma ghena mangla nsachi.”

⁴Kadimiwa na keü, “Kadijjen wi hi kedi kesüla benla nu?” Haman na khili accühha wi ghoben; ma kadimiwa wi Mordekai pi kehanthipen kiden pi ketheng witsü hanthilo khie gho.

⁵Tsalina amaghathu na luneng, “Haman na hewi no metule hieben.” Kadimiwa na khi, “Ma ya dugho thsülo.”

⁶Tsalina Haman na dugho, nu kadimiwa na ma wi khi, “Ciwi anyi kesü hi kenyuwakü pi ma cü mvu ntsa kesa na ben. Hi anyi hawa ghena mangwa sachi nu?” Haman na ma ketanla meshen, “Kadimiwa na kenyuwakü pi thowa cü mvu ntsa ben nu? Tsüna hi sabenla metsiben.”

⁷Tsalina ma kadimiwa luneng, “Anyi hawa ghena kadimi gwomejuwa kaghazu no pvü keten tsü sengho. Kadimi ghethu tsüpi no goru miwi chi.

⁹Tsaseng wi nkekhu wi kedi ntsa anyi kesü ya agwomejuwa kaghazu tsüpi anyi tsüwa pvü thsü, pi goru miwi donki thsü, nu ma zansen anyunutiwa pvüdhi wa thsü. Manyi wa keten wi kediwa na hati jisha thsülo; ‘Ghangchilo, kadimiwa akutimen sapi anyi kesü nyuwakü kecüwa ha!’ ”

¹⁰Tsaseng wi kadimiwa na Haman wi khi, “Shishi wala agwomejuwa kaghazu tsü khuya nu goru ssiyalo, nu Judah nyiwa Mordekai ghena kenyuwakü hathu kiden-kesha cülo. Ma miwi no khi kechithu tsü tsüdi sachi cülo. No ma kadijjen kedulen wi donki keben muyaben na.”

¹¹Tsalina Haman na agwomejuwa kaghazu khuya nu goru ssiya, nu ma agwomejuwa kaghazu tsüpi Mordekai pvü thsü. Mordekai na goru miwi donki nu Haman na ma zan sen nu anyunutiwa pvüdhi wa, manyi wa keten wi ma anyithu wi hati jisha: “Ghangchilo, kadimiwa na akutimen sapi anyi kesü nyuwakü kecüwa ha.”

¹²Tsaseng wi Mordekai na kadijjen kedulen wi whaneng nu Haman na kejüghe wina ma mmi shang pvü nu kaghajila ajjen wi wha.

¹³Ma miwi mangwa khati sa lakhe tsüdila khipi ma wubvü nu ma pvüshangthu kiza. Ma wubvü nu ma pvüshang kemetsathu na ma kiza, “No Mordekai kekhu wi no kekhang nmila wa tendha. Ma Judah nyi kesü, nu no ma miwi khangya nben. Ma no chaya metsi ben.”

¹⁴Mathu na keccünenglitu keben wi kadijjen wi kedithu na Haman ssinu Esther kemishu wi wale kaghaji gho.