Read Northern Rengma Naga ESTHER 7 Bible Online

ESTHER 7 - Northern Rengma Naga bible

ESTHER 7

¹Tsalina kadimiwa nu Haman manyi na Esther gweghe dsajjü le wa,

²ha keni tughuwa sadha. Kisengtssü jjü keben wi kadimiwa na Esther wi keü neng, “Kadijja Esther, no mangwa yamvu ben nu? Hi kizalo, hi tsüpi no cüaben. Hi kadiyyi gishü pahan lela pi no cüaben.”

³Kadijja Esther na luneng, “Keujüla Njenkebenwa na hi kekhie sapi cü mvu lethu, hi kenmvuwa na hi nu inyithu yala hangya thsülo.

⁴Hi nu inyithu pi pathiale kesa pi jeüdha. Keujüla tsüna pi nssümagha kesa ketan ghena jeüchi lethu, hi ceen ben wa nu gho tsü ghena nlikesaghang sa nkesa le; isala ithu yasa nu nmila thsüale sabendha.”

⁵Kadimi Xerxes na Kadijja Esther keü, “Thowa na pala hati ha sa nmessila ben nu? Anyi tsüwa khiewi ben nu?”

⁶Esther na luneng, “Ithu ghinyiwa, ithu nankemeghüwa tsüna gheshighenawa Haman hale!” Haman na qhethiketen kadimiwa nu kadijjawa manyi ghang wa.

⁷Kadimiwa na aghepvü ntsa shagha ajjen-keshondhiwa tsü teshi nu akhemi wi kadi sanku wi shhua. Haman na kadimiwa na ha ghena ma meten cüten kesa chüya, tsalina ma asengwi ngan nu Kadijja Esther wi ma kahangli hangsha cülo kesa ghena keshükene.

⁸Kadimiwa na asanku wina ajjen-keshondhiwa wi kedugho neng witsü, Haman na Esther we wi qancadu nu nanketizen ghena keshükene ben. Ha mukeya wi kadimiwa na magha nu khi, “Anyi hawa ha hi kadijjen wi itu wina kadijjawa messameshü le ben kwe?” Kadimiwa na ha khichi meyi kedithu na gho athsü pi Haman li mejuya.

⁹Tsaseng wi mathu jawi meshu kesü Harbona na khi, “Haman na ma jjen wi kehanthipen kesü kemisi meter ngwe nu keni sapi Njenkebenwa kahangli hangsha kecüwa Mordekai pi hanthi thsüale kesa ghena sapi theng le!” Kadimiwa na “Haman pi ciwi hanthilo!” ahza khuchia.

¹⁰Tsalina Haman pi ma Mordekai ghena kehanthipen sa ketheng witsü hanthia. Tsaseng wi kadimiwa na ma leben ketsu tsü gha