Read Northern Rengma Naga ESTHER 8 Bible Online

ESTHER 8 - Northern Rengma Naga bible

ESTHER 8

¹Tsü ghanan Kadimi Xerxes na Judah nyi ghinyiwa Haman keben-keyeng tsüdi pi Kadijja Esther cüa. Esther na Mordekai na ma theghile kesa pi kadimiwa kiza, nu tsü nten na Mordekai yala kadimiwa tuwi gho thsü wa.

²Kadimiwa na mechantsi ma miwi keben ma gwenzakeqhanwa “ma Haman wi khunengya kesawa” tsü khushiya nu pi Mordekai cüa. Esther na Mordekai pi Haman keben-keyeng tsü kaghangwa sa thsüa.

³Tsaseng wi Esther na wa kadimiwa ccü wi qancadu magha nu khineng. Nzawa na ma wi Agag[3] shicübvüghawa Haman na Judah nyithu keshun ghena acho nkemehai kekidenwa tsü khen cülo khie,

⁴Kadimiwa na suna khhatssü tsüpi ma wi changchi cüa, tsalina nzawa na whala ma tuwi ngan nu khi,

⁵“Keujüla ha Njenkebenwa kenen, nu hi na kaghali pvüya nu ntuwi ha meshon pen lethu, thangkechi kesü khushi pi Agag shicübvügha Hammedatha tsa Haman na kadiyyiwa wi Judah nyithu tsüdi yasalo kesa ahza khukechi tsü nsa thsü lalo.

⁶Hi khatinu agükeccüwa hana inyithu miwi kegho wi nu ishilithu kepathi witsü ghang pvü benya mehai nu?”

⁷Kadimi Xerxes na Kadijja Esther nu Judah nyiwa Mordekai manyi wi khi, “Ghangchilo, hi Haman na acho sapi Judah nyithu keshun ghena ma pi hanthidha, nu ma keben-keyeng tsüpi Esther cüdha.

⁸Isala kadimi mechantsi pi jeng nu ma nyan wina khushi pi thangchi kesawa tsü khunengya nbendha. Isalela, nshinyi na mangwa sa mvu ben khe inyan wina lesüzhü nu kadimi mechantsi tsüpi jengya nu pi Judah nyithu cüya mehai.”

⁹Hawa ha asha kechengwa, Sivan sha ngwe nu kecheng ghanan wi sa. Mordekai na kadimi ghena kezhüthu cichi nu khi nu zhü pi Judah nyithu wi nu India wina wa Sudan kecu wi diyyithu 127 tsüdi wi ahngthu, ayenkesenthu nu kedithu wi chi. Zhükechithu tsüna diyyi kesüsü jühjja nu kezhüyen wina nu Judah nyi jühjja nu kezhüyen wina zhü.

¹⁰Mordekai na Kadimi Xerxes nyan wina lesüzhü nu kadimi mechantsi pi jengya. Tsüthu tsüpi kadi goruthu miwi na kaghajila pvü wa cü thsüa.

¹¹Zhükechi hathu wi kadimi na anyunuti tsüdi wi Judah nyithu na kaghaninengya kemehai khukechi khimetha theng. Keujüla diyyi kahe wi lela mizatentithu na Judah nyithu, mathu tsangathu, nyelela nzathu, ssikaghashen lethu, Judah nyithu na kaghanineng nu mathu yasa cüya mehai: mathu na tsüthu tsüdila pathi nu mathu keben-keyeng la khuya mehai.

¹²Hawa hana Persia nyi kadiyyi tsüdi wi ghanan kesü jü ketan Judah nyithu kepathi ghena ssan ketheng asha tagha keniwa Adar sha tagha kecheng ghanan witsü saben.

¹³Tsüpi ayen ti sala thangchia nu diyyi tsüdi wi anyi tsüdila chüya thsüa, isanu tsü tsathang kegho wi Judah nyithu na mathu ghinyithu miwi ajukhikeya kidenya thsüle kesalina.

¹⁴Kadimiwa na ahza khukechi wina lesükepvüthu na goruthu miwi benya nu mbhi ntsa wa. Zhükechiwa tsüpi ghazen nyunutiwa Susa wi anyithu la chü thsüa.

¹⁵Mordekai na kadi gwomejuwa kaghazu atsena nu kemiki linen kemehai ntsa nmiepheü pi kesa agwomejuwa meiwa kesü tsü nu kadi suna liwen tsü pvü nu kadijjenwa teshia. Isanu Susa lentontithu wi anyi nonkeghe ghena kemagha nu kejisha na pong.

¹⁶Judah nyithu ghena anonkeghe, lebenkecca, nu khangkeya kesü sa.

¹⁷Diyyi tsüdi nu anyunuti tsüdi wi khiewi kadimi pi thangkechi ha sichi khe Judah nyithu na kenong sala mishu nu anonkeghe sa. Anyi kepathu kejon na Judah nyi saya, kepaghenanye mathu na khilitsü Judah nyithu messi.