Read Northern Rengma Naga ESTHER 9 Bible Online

ESTHER 9 - Northern Rengma Naga bible

ESTHER 9

¹Adar sha tagha kecheng ghanan, kadimi pi thangkechi tsü sa keten, aghinyithu na Judah nyithu pi mathu kekhang kekhu wi chiyale ghangkeben tsathang tsüna gho cuya. Isala tsüti kesawa nyela Judah nyithu na mathu miwi khangya.

²Kadiyyi wi Judah nyunuti tsüdi wi Judah nyithu na anyi kesü le kesü lela mathu patena le ghothu tsü ssikaghashen le kidenya. Apen tsüdi wi anyithu na mathu messi, nu thola shagha mathu nshunla.

³Diyyi tsüdi wi kedithu, ahngthu, ayenkesenthu, nu kadimi mithon kesathu na Judah nyithu kiqa, kepaghenanye mathu tsüdila Mordekai messi.

⁴Khili tsüwi ha kadiyyi maben wi Mordekai na kadijjen wi anyi kekhang kesü sadha nu ma khang pfüpfü sa waten kesa mehaitsü chüyadha.

⁵Tsalina Judah nyithu na mathu ghinyithu miwi mangwa sa mvu khe saya mehaidha. Mathu na njünnu sen wa mathu ghinyithu ssisa nu mathu pathikhia.

⁶Ghazen nyunutiwa Susa wi ketanla, Judah nyithu na anyi meza manga pathia.

⁷Tsüthu jawi tsü Judah nyi ghinyiwa Hammedatha tsa Haman tsathu tagha la ben: Parshandatha, Dalfen, Aspatha, Poratha, Adaliya, Aridatha, Parmashta, Arisai, Aridai, nu Vaizatha, isala ciwi tsanqai shukeya mangla nsa.

¹¹Tsü ghanan na Susa wi anyi khaju pathi khe khipi kadimiwa kiza.

¹²Isanu Kadimiwa na Kadijja Esther wi khi, “Ghazen nyunutiwa Susa wi ketanla, Judah nyithu na Haman tsathu tagha pi wwala anyi meza manga pathidha. Diyyi kepathu witsü mathu na khati sadha khalan! No khili mangwa yamvu ben nu? No tsü muya ben. No mangwa yamvu ben khe hi kizalo, no tsü muya ben na.”

¹³Esther na luneng, “Keujüla ha Njenkebenwa kenen pvüya lethu, Susa wi Judah nyithu yala mathu nansü kesa tsüti dhitsü wila sa neng thsülo. Isanu Haman tsathu tagha kamang tsüpi kehanthipen wi hagi thsülo.”

¹⁴Kadimiwa na tsüti salo ahza khuchia, nu Susa wi thangkechi tsü khushia. Haman tsathu tagha kamangthu tsüpi anyi tsüdi tuwi tügü.

¹⁵Adar sha tagha mejü ghanan wi Judah nyithu na kheneng Susa wi saghu nu anyunutiwa wi anyi meza kecheng pathia. Isala mathu na kheneng atsanqai shukeya mangla nsa.

¹⁶Diyyi kepathu wi la Judah nyithu na kekaghanineng ghena kidenya. Mathu na mathu nanmeghü keten nyithu hazar achentagü nu manga pathi nu mathu ghinyithu wina shhuya. Isala mathu na atsanqai mangla shukeya tsü nsa.

¹⁷Hawa ha Adar sha tagha kecheng ghanan sa. Nu dhitsüwa, tagha mejü ghanan wi nyu kepathi nsala nu mathu anonkeghe sala kemishu tsathang kesü sa.

¹⁸Isala Susa wi Judah nyithu tsü tagha kecheng nu tagha mejü ghanan wi mathu ghinyithu pathi nu tagha manga ghanan wi nyu npathila kemnan ghanan kesü sa.

¹⁹Ha ghena anyuti kizza wi kahang Judah nyithu na Adar sha tagha mejü ghanan tsüpi anonkeghe ghena kemnan, mishu nu atsse pi khokho kecüli kesa tsathang kesü saden.

²⁰Mordekai hathu cüki zhüya nu lesükezhü tsü kesun pi Persia nyi Kadiyyi maben wi Judah nyithu kahe wi tsüdi wi chi,

²¹nu mathu wi amapi kaghapenla Adar sha tagha mejü nu tagha manga ghanan tsüpi kemnan tsathang salo kiza.

²²Atsathang ha keni hawi Judah nyithu na mathu ghinyithu wina shhukeya; asha hawa wi ha ahathakina nu anonkegü tsü khapeghe pi anonkeghe nu lebenkecca sakeya tsü kesü. Mathu na atsathang ha keni wi ha azi sa nu mishu, atsse pi khokho kecüli nu pi ketha-u cülo kiza theng.

²³Tsalina Judah nyithu na Mordekai kecükegwe tsü nie nu amapi wi kemini hapi ayen sa wa.

²⁴ Agag shicübvüghawa Hammedatha tsa Haman nu Judah nyithu ghinyiwa na Judah nyithu tsü nmi thsülale sa keben ghena mathu na keyasa tsathang tsü kusi saten khe (mathu na khiketen “purim”) tsü ghena akezen wwi.

²⁵Isala Esther na kadimiwa wi wa, nu kadimiwa na ahza khushichi pi Haman na Judah nyithu ghena acho nkemehai kiden ketheng wi tsü ma ketizensa — ma nu ma tsathu pi kehanthipen wi hanthia.

²⁶Tsalina kemnan tsüpi “akezen” kewwi ghena Purim le khia. Mordekai zhükechi tsü ghena nu mathu miwi kekuli hathu tsüdi ghena

²⁷Judah nyithu na mathu, mathu shicübvüghathu, nu anyi kesü le kesü lela Judah nyi sa wa kesawa ghena ayen kesü sa, tsüna Mordekai kecükegwe kenie wina amapi kaghapenla mathu na ghanan keni ha kemini saki benden.

²⁸Ha cenya, ghaketen abvüye tsüdi wi diyyi nu anyunuti tsüdi wi Judah nyi theghi tsüdila Purim tsathang ha meshenben nu ghaketen tsüdi wi ha kemini saden.

²⁹Abihail ngawa Kadijja Esther na Mordekai manyi gweghe lesü kesü zhü, ma kekhang pi Mordekai na hatu wi Purim ghena kezhü miwi tsü chia.

³⁰Zhükechi tsüpi Persia nyi Kadiyyi wi diyyi 127 tsüdi wi Judah nyithu wi kesunchi cüa. Tsüna Judah nyithu na yazishu lebencca benlo kesa jüh

³¹nu mathu nu mathu shicübvüghathu na mathu kezi nu anonkegü tsü wi kenie ghena ayenthu sakeya tsüti matsü sati kesa wi Purim tsathang tsü salo kesa ahza khuchi. Hawa ha na Mordekai nu Kadijja Esther manyi na khichi.

³²Esther na khikechi Purim ghena ayenthu pi kezhüllu kesü miwi zhüya.