Read Northern Rengma Naga BVÜKESHHU 1 Bible Online

BVÜKESHHU 1 - Northern Rengma Naga bible

BVÜKESHHU 1

¹ Jakob tsathu nu mathu theghithu ma gweghe Ejipt wi kewathu na

²Reuben, Simeon, Levi, Judah,

³Issakhar, Zebulun, Benjamin,

⁴Dan, Naftali, Gad, nu Asher.

⁵Jakob gwo wina keshhugho anyi saghula achentagü. Ma tsa Josef na Ejipt wi bendha.

⁶Matsü pahan seng wi Josef, ma cünyuthu, nu shüsha tsüwa tsüdila shüa.

⁷ Isala mathu shicüthu, Israel nyithu, na atsangathu ji ntsa ben nu mathu sha ntsa shagha nu khang pi Ejipt yyi pong.

⁸ Tsaseng wi kadimi ketheü kesü Josef cüki nkechüwa na Ejipt wi kekhang sen shagha.

⁹Ma ma nyithu wi khi, “Israel nyi hathu ha sha ntsa nu khang pi mathu ghena ikhang kemessi bendha.

¹⁰ Keujüla aghisa lethu mathu na ikhang ghinyithu gweghenu ikhang ssi saden, nu diyyiwa wina bvüaben. Mathu ya shakayi nwa thsüle kesalina ikhang alen pahan bha meyathu yishüdha.”

¹¹Tsalina Ejipt nyithu na nssümagha ccülikesathu pi mathu miwi chi nu mathu ya kekuli khang kayi sapi ketizensa ntsa sa thsü. Israel nyithu ya kadimi tsanqai kethengpen ghena Pithom nu Ramese nyunutithu tsü sa thsü.

¹²Isala Ejipt nyithu na khati Israel nyithu pasha khe tsüti Israel nyithu na jikayi sen nu ayyi tsüdi wi bvüzighe wa. Ejipt nyithu na Israel nyithu messi wa,

¹³nu mathu meten pi nssümagha kekuli sa nu mathu kahang ketizensa ntsa sa thsü. Mathu meten pi mathu jjen sa thsü, mathu lli ca thsü, nu mathu nanketizen keula nmi.

¹⁵Tsaseng wi Ejipt kadimiwa na Ibri nzathu kepvügha noncca keten keni Shifra nu Pua manyi wi kiza,

¹⁶“Nshinyi Ibri nza kepvügha kenoncca wi keujüla tsüna npvüza lethu pathilo; isala nza lethu hangya thsülo.”

¹⁷Isala kepvügha noncca keten nza keni na Anyiza kemessi nyi ghena kadimiwa jüh nkinala npvüzathu ya hangya thsüa.

¹⁸Tsalina kadimiwa na kepvügha kenoncca nza keni cichi nu keü, “Nshinyi mangkesa na hati saben nu? Mangkesa npvüzathu ya hangya thsü nu?”

¹⁹Manyi luneng, “Ibri nzathu na Ejipt nzathu ti nyele; mathu na lekete pvügha yaden, nu ishinyi na wa npi kecu wina mathu na anga pvüghaya tenle.”

²⁰Kepaghenanye kepvügha kenoncca nza keni tsüna Anyiza kemessi nyi, Anyiza na tizen nu manyi theghithu pi manyi cü. Nu Israel nyithu na jikayi nu khang shagha.

²² Kadimiwa na ahza kesü pi ma nyithu tsüdila cüchi: “Ibri nyi npvüza pvüghakeya tsüdila sen wa Nil Ghaku wi khalalo, isala nza lethu hangya thsülo.”