Read Northern Rengma Naga BVÜKESHHU 10 Bible Online

BVÜKESHHU 10 - Northern Rengma Naga bible

BVÜKESHHU 10

¹Tsaseng wi Apvüwa na Mosa kiza, “Wala kadimiwa ghangchilo. Hi mathu jawi amankesa hathu ha sa chile kesalina kadimiwa nu ma kekhu wi kedithu sapi leben dhu thsüdha,

²nu hi amankesa hathu sa kechi wi khatila Ejipt nyithu sapi kejüphon sa cü khe no tsü khipi ntsathu nu ntsa tsathu kizaya thsüle kesalina. Nthu tsüdila hi Apvüwa le kesa chüyaden.”

³Tsalina Mosa nu Aaron manyi kadimiwa wi wa ma wi khi, “Ibri nyithu Apvüwa Anyiza na khiben le, ‘No matsü khathu ijüh nkina mvula hhaghe benten nu? Inyithu ya bvü thsülo, isanu mathu ya hi kinyi thsülo.

⁴Keujüla no hhagheben lethu dhitsü wi hi ashiqathu sengho no diyyiwa wi chi cüaden.

⁵Tsüthu na ji ntsa pi ayyi pong shaben. Tsüthu na pala tsüdi dsa nu aghayi na keyasatu achantonthu lela dsa shaben.

⁶Tsüthu tsüna no kadijjen, nkekhu wi kedithu, nu n-nyithu jjen tsüdila pong shaben. Tsüthu na nmehai pi nthu bamyi tsü wina gho nansü kecu tsüti npi kemu saben.’” Tsaseng wi Mosa na khapeghe nu ma teshi bvüa.

⁷Kadimiwa kekhu wi kedithu na ma kiza, “Anyi hawa ha khathula agükeccü pi ikhang cü benten nu? Israel nyithu ya bvü thsü yilo, isanu mathu wa mathu Nyiza Apvüwa kinyiya thsülo. Ejipt na yasatha sadha kesa no ha nchü kwe?”

⁸Tsalina Mosa nu Aaron manyi ssinu kadimiwa wi kheneng gho nu ma manyi kiza, “Nthu wa nu nthu Pvüwa Anyiza kinyiya mehai. Isala thothu na waten nu?”

⁹Mosa na luneng, “Ikhang na ghanyi le keqhai lela tsüdi ssi waden. Ikhang na atsangathu, khaghaneni nu anenithu, nu amesüsithu ssi wa ben, kepaghenanye ikhang na akho kesü sapi Apvüwa nkinyithu yishüben.”

¹⁰Kadimiwa na khi, “Hi Apvüwa nyan wina kishenben, hi khiela nthu ya nza nu ghanyithu ssi bvü thsü nben! Nthu na kematang cho kiden ben kesa mutiben.

¹¹Nyele, nthu wa mvuben lethu npvüza ketan wa Apvüwa kinyi yalo.” Isakhi nu kadimiwa na Mosa nu Aaron manyi jügü pi bvü thsüa.

¹²Tsaseng wi Apvüwa na Mosa kiza, “Nkwen chang pi Ejipt yyi miwi chi nu ashiqathu ya gho thsülo. Tsüthu gho pala shigü keshhugho nu aghayi na keyasatu tsüdila dsa shaben.”

¹³Tsalina Mosa na ma khhatssü zanki chi, nu Apvüwa na ameghü pila nishuwa wina tsü ghanan nu tsü ghaja thangthang ayyi ciwi sho thsü. Ghanenwa wi ameghü na ashiqathu mo pie gho.

¹⁴Tsüthu na abhibhi sa gho diyyi maben wi ben wa. Ashiqa tenti keti tsüti kesa na kheni la npi mu nu haseng wi la mu neng nben.

¹⁵Tsüthu na ayyi pongbhon pi nimugho sa, tsüthu na aghayi na keyasatu pala tsüdila nu kedsau bi ma ton wi keben tsüdila dsakhia. Ejipt yyi tsüdi wi achan nu aghanglani kemejjü kesütanla nmi la.

¹⁶Tsaseng wi kadimiwa na kaghajila Mosa nu Aaron manyi cichi nu khi, “Hi nshinyi Nyiza Apvüwa nu nshinyi tuwi samidha.

¹⁷Khili ha ketan hi kesami teshi cülo nu nshinyi Nyiza Apvüwa wi kekhie sa nu hi wi keshü kemeten ha sen bvü thsülo.”

¹⁸Mosa na kadimiwa teshitheng wala Apvüwa wi kekhie sa.

¹⁹Apvüwa na nishuwa meghü tsü sapi niduwa meghü kekhang sa thsüa, tsüna ashiqathu tsü mo pi wa Kenmie Tssükedone [6] wi khalachia. Ejipt yyi tsüdi wi ashiqa kesüla nmi la.

²⁰Isala Apvüwa na kadimiwa sapi leben dhu, nu ma Israel nyithu ya nbvü thsüla.

²¹Apvüwa na tsaseng wi Mosa kiza, “Nkwen zanki pi atssan wi chi, nu atsanjang ntsa kesa na Ejipt yyi shanbhonya thsülo.”

²² Mosa na ma kwen zanki pi atssan wi chi nu Ejipt yyi tsüdi wi ghanan kecheng atsanjang ntsa sa.

²³Ejipt nyithu na khokho nkemulila kesalina tsü tsüwi thola ajjen nteshila ben wa. Isala Israel nyithu tsü mathu keben pen wi kewegü na ben.

²⁴Kadimiwa na Mosa cichi nu khi, “Nthu na bvü nu wa Apvüwa kinyiya mehai; nzathu le ghanyithu lela nthu gweghe waya mehai. Isala nthu khaghaneni, anenithu, nu amesüsi pi hewi nthenglathu yishü.”

²⁵Mosa na luneng, “Isathu no asahang pi ikhang cü nu pi ahhansha sa nu mecang pi kekinyi sapi Apvüwa cü thsülo.

²⁶Nyele, ikhang na asahang kesüla nteshila ssinu ikhang gweghe waden. Ikhang ketanla asahang khawa pi ithu Nyiza Apvüwa nkinyithu yishü khe kessiyaben. Nu ikhang na wa apen tsü npi kecu chu asahang mangwa pi ma kinyiten khe nchü.”

²⁷Apvüwa na kadimiwa sapi leben dhu thsüa, nu ma mathu ya nbvü thsüla.

²⁸Kadimiwa na Mosa kiza, “Ituwi na bvülo! Hi ya no nmu neng thsüla yilo! Hi no kemu ghanan wi no shüaben!”

²⁹Mosa na khineng, “No kekhi ti no hi nmu nengdha.”