Read Northern Rengma Naga BVÜKESHHU 13 Bible Online

BVÜKESHHU 13 - Northern Rengma Naga bible

BVÜKESHHU 13

¹Apvüwa na Mosa kiza,

² “Npvüza tssütsewa tsüdila sametha pi hi cülo, kepaghenanye Israel npvüza tssütsewa nu asahang zza tssütsewa asüpon tsüdila iji le.”

³Mosa na anyithu wi khi, “Nansü tsathang ha meshenyalo— nthu na nyu magha kesa benwa Ejipt keteshi tsathang ha. Nansü tsathang ha Apvüwa na ma kekhang wina nthu khushiya. Azimi kechi mesa ndsala.

⁴Nthu na nansü tsathang asha atuwa Abib sha wi ha Ejipt teshidha.

⁵Apvüwa na nthu baqhaithu wi kishen nu Kanaan, Hitti, Amor, Hivi nu Jebus nyithu yyi tsüpi nthu cüle khitheng. Ma nthu ssi wa ayyi kecca nu kinyan wi chicü lethu nthu na amapi kaghapengla asha atuwa wi akho hawa ha salo.

⁶Ghanan tagü nthu na azimi nkechi mesa dsa nu tagü ghanan wi Apvüwa kekinyikü wina kemishu kesü nsathu yishü.

⁷Ghanan tagü nthu na azimi kechi mesa ndsala; nthu yyi wi khie wila azimi nyelela azimi kechi mesa tsü nmu thsüla.

⁸Akhowa tsü sa lethu nthu tsathu wi nthu na Ejipt keteshi wi Apvüwa na nthu ghena mangwa sachi khe tsü ghena hawa ha satenle kesa khimetha pi kizalo.

⁹Kekuli ha pala kesü pila nthu kwen wi bhenki nyelela nthu tie wi taki ketheng ti meshen neng keya zensu kesü saden; tsüna nthu yala Apvüwa yenwa tsü si thsüben, kepaghenanye Apvüwa na ma kekhang wina Ejipt wi nthu ssishhu.

¹⁰Amapi kaghapengla matsü wi akho ha satenlo.

¹¹“Apvüwa na nthu nu nthu baqhaithu tuwi kishen ketheng ti ma nthu ssi wa Kanaan nyithu yyi wi chi cüben. Ma tsüpi nthu kecü wi

¹² nthu na npvüza tssütsewa tsüdila pi Apvüwa cülo. Nthu sahang zza asüpon tssütsewa tsüdila Apvüwa ji,

¹³isala nthu na khaghaneni zza pi gada zza süpon tsüdila kedonliya nu pi tsü mithon sa kinyilo. Keujüla nthu na gada tsü kedonli nsa mvuthu tsü sun taghandhilo. Nthu na nthu tsa tssütsewa tsüdila hangshaya nsathu yishü.

¹⁴Haseng wi nthu tsathu na kekuli ha ma jjügi mangwa nu keü lethu, nthu na hati mathu luneng ben, ‘Apvüwa na ma kekhang sen nu ithu nyu nssümagha kesapen Ejipt wina ithu ssi shhugho.

¹⁵Ejipt kadimiwa na leben dhu nu ithu yala nbvü thsüle kahhaghe wi Apvüwa na Ejipt yyi wi anyi tsa tssütsewa nu ma sahang zza asüpon tssütsewa tsüdila pathile. Tsalina ithu asahang zza asüpon tssütsewa tsüdi pi ahhansha sapi Apvüwa wi chiden, isala ithu tsa tssütsewa tsü shü neng yaden.

¹⁶Kekuli ha pala kesü pi ithu kwen wi bhenki nyelela ithu tie wi taki ketheng meshenkeya zensu kesü ti saden; tsüna ithu yala Apvüwa na ma kekhang wina Ejipt wi ithu ssi shhugho le kesa meshenya thsüden.’ ”

¹⁷Ejipt kadimiwa na anyithu ya bvü thsü kesa wi Anyiza na mathu ssinu alen kemilu ntsawa Filistia wi tsü nwa. Anyiza na khi, “Hi anyithu ya mathu na aghikesa kemu wi mathu kemeshen kemili nu Ejipt wi nwha neng thsü mvu.”

¹⁸Tsüti kesawa nye ma mathu ssinu alen kevüli lenwa na ayyikeshü pvüdhi sen Kenmie Tssükedone [7] wiwa wa. Israel nyithu na aghisale kesalina aghighe” pvüya.

¹⁹ Josef na khitheng, “Anyiza na nthu khushikeya wi nthu apen he wina ikamang pvü nu nthu gweghe shhulo.” Ma tsüti khi nu Israel nyithu ya kishen thsü ketheng ti Mosa na Josef kamang pvü nu ma gweghe shhua.

²⁰Israel nyithu na Sukkoth teshi nu wa ayyikeshü katen Etham wi kemnanpen sa.

²¹Apvüwa na aghanan lethu akulukeshü cü wina mathu tuwi wa nu mathu lentsütson, nu aghaja lethu annikeqhe cü wina mathu tuwi wa nu kewegü pi mathu cü, isanu mathu na aghaja le aghanan lela alentsen wa.

²²Aghaja wi lethu annikeqhe cü nu aghanan wi lethu akulukeshü cü na keshüthangla anyithu tuwi ben.