Read Northern Rengma Naga BVÜKESHHU 15 Bible Online

BVÜKESHHU 15 - Northern Rengma Naga bible

BVÜKESHHU 15

¹Tsaseng wi Mosa nu Israel nyithu na akhwi ha pi Apvüwa saki: “Hi akhwi pi Apvüwa sakiden, kepaghenanye ma anyankethang sa khangyadha; ma goruthu nu ma kessithu pi atssükedone wi cüchidha.

² Apvüwa na hi kekhwe kezüwa; ma hi hangsha kecüwa. Ma iNyiza, nu hi ma sengden, iba Nyiza, nu hi ma kadi cüki khipi akhwi saden.

³Apvüwa na aghikekhangwa, Apvüwa tsü ma nyan.

⁴“Ma Ejipt süpahizi nu gorugarithu pi atssükedone wi cüchia, kedi kemehai ntsathu na Kenmie Tssükedone wi meyanthia.

⁵Tssükedone kedhu na mathu meyanbhonya; mathu na alon ti atssü non wi dua.

⁶“Apvüwa, nkwen ajewa tsüna kemessi kekhang ntsa; tsüna aghinyi pacha-paghe den.

⁷No ajenkeben kekhang wina no nankemeghüthu pasha; nleben minu nu mathu pi amatsi ti mecang.

⁸No tssükedone mo neng pi misikhhali kaghashun thsü; tsüna ajjen-keshon ti meshonqhe ngan wa; tssükedone kedhu ntsawa tsüna ayyitsen sa.

⁹Aghinyiwa na khi, ‘Hi mathu jügü wa mathu ghan yaden; hi mathu keben gishü nu hi keyamvu tsüdi khuyaden; hi njünnu khushiya nu mathu keben tsüdi khuyaden.’

¹⁰Isala Apvüwa, nhathakissa kechi wi Ejipt nyi meyanthia; mathu na shisha ti atssü kedhu non wi dua.

¹¹“Apvüwa, acenpvü jawi thowa na no ti kesa ben nu? Thowa kemetha wi amankesa no ti ben nu? Thowa na no amankesa keti kekuli ti saya mehai nu?

¹²No nkwen ajewa chang chi nu ayyi na ithu nankemeghüthu meyia.

¹³Jühtsentsa sa nu no khishi kechi tsü nie, no khushiya kesa n-nyithu ssisen; no kezü wina mathu lentsütson sen nu no kemetha yyi wi wa.

¹⁴Mizatentithu na tsü zaya nu messi pi kedheggü; Hathakina na Filistinthu miwi gho.

¹⁵Edom wi alikesathu na qhethiketen sa; Moab nyi kekhangthu na kedheggü wa; Kanaan nyithu na mathu kempvüza nmila.

¹⁶Gükeccü nu kemessi na mathu miwi gho. O Apvüwa, mathu no kekhang mu, nu n-nyithu no nssümagha wi khushiya kesathu, tsüna npi kebvü chu mathu mangla sa meyala messi wa.

¹⁷No mathu ssi shhugho mathu pi n-yikha wi ben thsü, Apvüwa, no nghena kessi ketheng apenwa, no kekinyijjen sa kethengwa wi tsü.

¹⁸Apvüwa, no anuphanla kadimiwa saden.”

¹⁹Israel nyithu na ayyi keqha wina atssükedone wi shhuya. Isala Ejipt nyi gorugari, mathu goru nu kessithu na atssükedone non wi dukeya wi Apvüwa na atssükedone ssi neng gho mathu meyanbhon ya.

²⁰Atusenjüh-kechüwa Miriam, Aaron tssüggüwa na ma chünong khuya nu nza tsüdi ma sennie, achünong khou nu nashü.

²¹Miriam na mathu ghena akhwisa; “Akhwi pi Apvüwa sakilo, kepaghenanye ma anyankethang sa khangyadha; ma goru nu mathu kessithu pi atssü kedhu wi cüchia.”

²²Tsaseng wi Mosa na Kenmie Tssükedone wi Israel nyithu ssisen Shur yyikeshü wi wa. Mathu ghanan kecheng ayyikeshü pvüdhi lela ciwi atssü nmu.

²³Mathu na Mara[8] kesa apen kesü wi ghoya, isala ciwi atssü na kha ntsa kesalina mathu na tsü jjü meyala. Tsalina apen tsüpi Mara cia.

²⁴Anyithu na Mosa wi leben-nkaghajüh khi, “Ikhang na mangwa jjü ten nu?”

²⁵Mosa na ma leben chi ntsa nu Apvüwa wi khie, nu Apvüwa na achan kesü pi ma ccüca, ma tsüpi atssü wi cüchi; nu atssü na jjü mehai shhughoa. Ciwi Apvüwa na mathu nie nu hanglo kesa ayenthu pi cü, nu mathu kemehai keteshi la ghan-nan.

²⁶Ma khi, “Keujüla hi mangwa mehaile khi khe tsü kesa wi ijühkina, nu iyenkhukechithu tsü nie lethu hi kesakinaa sen nu Ejipt nyithu miwi kegho tsü kesüla pi nthu metenmesha nben. Hi Apvüwa, nthu sapi mehai kecüwa.”

²⁷Tsaseng wi mathu na Elim wi ghoya, ciwi atssü kepvüpen taghakeni nu palm ton achentagü na ben; mathu wa atssü kete wi kemnanpen sanu ben.