Read Northern Rengma Naga BVÜKESHHU 17 Bible Online

BVÜKESHHU 17 - Northern Rengma Naga bible

BVÜKESHHU 17

¹ Israel nyi mabenla Sin yyikeshü tsü teshi nu wa Apvüwa kekhi kenie wi apen kesü wina apen kesü wi keqoedeja wa. Mathu Rifidim wi kemnanpen saben, isala ciwi kejjü tssü nmi.

²Mathu na wa Mosa wi leben-nkaghajüh khi, “Atssü pi ikhang jjü thsülo.” Mosa na khineng, “Nthu mangkesa na hi kesami bhaten nu? Nthu mangkesa na Apvüwa ghan-nan le saten nu?”

³Isala anyithu na dighe ntsa sa kesalina wa Mosa wi leben-nkaghajüh khineng, “No mangkesa na Ejipt wi ikhang ssi shhugho nu? Ikhang, ikhang tsangathu, nu asahangthu yala dighethi shü thsüa ten kwe?”

⁴Mosa na ma leben ntsa sa Apvüwa wi khie nu khi, “Hi anyi hathu ghena mangwa saya nu? Mathu alon pi hi kecenthia le bendha.”

⁵Apvüwa na Mosa wi khi, “Israel nyi ccülikesathu pahan ssiya nu anyithu tuwi walo. No akhhatssü pi Nil Ghaku kihhe kechiwa tsü la khuya.

⁶Hi ntuwi wa Sinai Yikha wi alon miwi ngan benlaben. Alon tsü kihhechithu anyithu ya jjüya thsüle kesalina atssü na shhughoaben.” Mosa na Israel nyi ccülikesathu tuwi na tsüti sachi.

⁷Apen tsüwa nyan pi Massa nu Meriba [10] ci, kepaghenanye Israel nyithu na leben-nkaghajüh khi nu “Apvüwa na ntsakhiwa ithu ssitenla nu?” isa ma ghan-nan.

⁸Amalek nyithu na Refidim wi gho Israel nyithu ssikaghashen.

⁹Mosa na Joshua kiza, “Anyi pahan ssiya nu wa ghanen wi Amalek nyithu ssisalo. Anyiza na hi kekiza ti hi wa ayikha miwi ikhhatssü ghansen nu ngan benden.”

¹⁰Joshua na Mosa ma kekiza ti wa Amalek nyithu ssinu aghisa, tsü tsüwi Mosa, Aaron, nu Hur ma kecheng na ayikha miwi kia.

¹¹Mosa na ma kwen zanki keben chu Israel nyithu na khangya, isala ma kwen zanshaya lethu Amalek nyithu na khang shagha.

¹²Mosa na ma hacü mnanya kesa wi Aaron nu Hur manyi na alon kesü sengho nu Mosa ya ma miwi donki thsü, nu manyi ma kete wi kesü ajewa nu kesü na tavüwa ngan nu ma hacü tsü zükeqhe ghan sen wa aghani kedu cu.

¹³Hatinu Joshua na Amalek nyithu miwi khangya.

¹⁴ Tsaseng wi Apvüwa na Mosa wi kiza, “Meshenben ten le kesalina khangkeya cüki ha zhüyalo. Hi Amalek nyithu tsü yasatha sa tenle kesa Joshua kizalo.”

¹⁵Mosa na kekinyipen kesü saya nu tsü nyan pi “Apvüwa na ithsükizankiwa” isa ci.

¹⁶Ma khi, “Apvüwa thsükezankiwa tsü misikhhali zanki chilo! Apvüwa na anuphanla Amalek nyithu ssisa benden.”