Read Northern Rengma Naga BVÜKESHHU 18 Bible Online

BVÜKESHHU 18 - Northern Rengma Naga bible

BVÜKESHHU 18

¹Mosa myiwa Jethro, Midia nyi keqhaikediwa na Anyiza na Ejipt wina Israel nyithu ssinu keshhugho wi ma khati Mosa nu ma nyithu ghena kuli chi khe tsü cüki tsüdila zaya.

²Tsalina ma Mosa wubvü Zippora pi ma jjen wi teshi kethengwa tsü ssinu Mosa wi gho,

³ nu ma tsa keni Gershon nu Eliezer manyi. (Mosa na khi, “Hi he asang yyi wi asang kesü saben”; tsalina ma tsawa nyan pi Gershon [11] ci.

⁴Ma khineng, “Iba Anyiza na Ejipt kadimiwa kwen wina hi kiqa nu hangsha cü”; tsalina ma tsa kepawa nyan pi Eliezer [12] ci.

⁵Jethro na Mosa wubvü nu ma tsa keni ssisen Mosa na wa kemetha yikha wi kemnanpen sa keben yyikeshü wi tsü gho.

⁶Mathu na ghotenle kesa ajüh pi Mosa wi kesun chi,

⁷tsalina Mosa na shu ma metu nu ma tuwi kukedu ma kimang. Mathu na khokho cüki kekeüli nu gweghe Mosa nithsüjjen wi dua.

⁸Apvüwa na Israel nyithu khushiya le kesalina ma kadimiwa nu Ejipt nyithu miwi mangwa sachi khe Mosa na tsüdila khipi Jethro kiza. Anyithu na khatila ketizensa nu Apvüwa na mathu hangshaya khe tsü la khipi ma kiza.

⁹Jethro na ha cüki tsüdi zakeya wi ma nonghe ntsa sa,

¹⁰nu khi, “Apvüwa sengle, ma Ejipt kadimiwa kwen wina no nu n-nyithu hangshaya! Apvüwa sengle, ma nssümagha kesa wina ma nyithu hangsha yadha!

¹¹Hi khili Apvüwa na acenpvü tsüdi miwi diki kesa chüyadha, kepaghenanye Ejipt nyithu na Israel nyithu metenmesha keben wi hati sachi cüle.”

¹²Tsaseng wi Jethro na aju sengho maben pi mecang nu ahhansha kepa wi la sapi Anyiza cü; Aaron nu Israel nyi ccülikesathu ma gweghe wa kekinyi zensu wina kemetha nüntsse tsü dsa.

¹³Dhitsüwa wi Mosa na anyithu kicennali jühkaghakhi, nu ma tsü ghena aghanen na dhamang wa shitawa cu.

¹⁴Jethro na Mosa ma ketan pala tsüdila kuli keben muya nu ma wi keü, “No ketan anyithu ghena ha tsüdi sa keben ha khati nu? Mangkesa na anyithu na aghanen na wa shitawa kecu no vü sen nu no ha tsüdi saben nu?”

¹⁵Mosa na luneng, “Hi ha nsathu yishü, kepaghenanye anyithu na Anyiza kemeshen chüyale nu hi wi ghoden.

¹⁶Meshu keni na kicennali ben lethu hi wi ghoden, nu hi manyi thowa na meshon khe tsü südhe pi cüden, nu hi Anyiza yenkhukechithu tsü pi manyi kizaden.”

¹⁷Tsaseng wi Jethro na khi, “No hati kesa witsü nmeshon laben.

¹⁸No nu anyithu la nchala ben, no ketan hati kesa ha sha mtsü.

¹⁹Hi khili no kesansijüh pahan khi thsülo; nu Anyiza na no ssiben ketenwa sa. No anyithu kutisa Anyiza tuwi wa nu mathu kicennali tsü sen nu ma wi kewa tsüna meshon ben.

²⁰No Anyiza yenkhukechithu pi mathu sansi nu mathu khati hang nu mangwa nkulithu yishü khe khimetha pi mathu kizalo.

²¹Isala tsü miwi no kesa qo nyi pahan kessi pi anyi ccülikesathu nsa thsüthu yishü: tsüna hazar miwi, meza miwi, deni miwi, nu tagha miwi aliwa sa thsü. Mathu na Anyiza kemessi nyi, kenondi qo nu alaa pi leya nkesa nyi nsathu yishü.

²²Mathu yala anuphanla anyithu ghena accülikesathu sa thsü. Mathu ya ajjügi kedhudhu sen nu no wi gho thsü, isala ajjügi kizzakunu tsü mathu ketanla südheya thsülo, tsüti nu mathu no kiqa cü lethu nkhhi na mbhi kayi yaben.

²³Keujüla no ha sa lethu Anyiza na kekhi ti no nchala sa nben, nu anyithu tsüdila mathu kicennali südheya nu ajjen wi whaya mehai le!”

²⁴Mosa na Jethro kesansijüh tsü yaya,

²⁵nu Israel nyi tsüdi jawi kesa qo nyi pahan kessiya. Ma mathu pi hazar miwi, meza miwi, deni miwi, nu tagha miwi alithu sa thsüa.

²⁶Mathu yala anuphanla anyithu ghena accülikesathu sa thsü; ajjügi kedhudhu sen nu Mosa wi gho, isala ajjügi kizzakunuthu tsü mathu ketanla südheya thsüa.

²⁷Tsaseng wi Mosa na kemehaiwa sa whalo Jethro kiza nu ma ya ma jjen wi whaneng thsüa.