Read Northern Rengma Naga BVÜKESHHU 2 Bible Online

BVÜKESHHU 2 - Northern Rengma Naga bible

BVÜKESHHU 2

¹Tsü tsü wi Levi mizza wi anyi kesü ma ketanla ma mizza wi nza kesü yaya,

² nu nzawa na atsa kesü pvügha pi ma cü. Nzawa na meme tsüna atsimehaitsü mukeya wi ma asha kecheng ma pi kuthi.

³Isala ma atsawa pi kuthi meyala kesa wi ashijü kesü khuya nu atssü ya ndu thsüle kesalina anie pi zenbhonya. Nu ma memewa pi tsü non wi chiya nu pie wa aghaku katen wi ahuphon jawi chia.

⁴Memewa tssüggüwa na alen kesie wi ben nu memewa tsüna khati saaten nu kesa ghangben.

⁵Kadingawa na aghaku wi atssükizü le dugho nu ma maghalethu na aghüsa wi keqoe den. Ma ashijü kesü na ahuphon jawi keben muya, nu ma maghale kesü kesun pi wa tsü sengho thsü.

⁶Kadingawa na tsü lishi wa nan meme npvüza kesü muya. Memewa na qai keben ghena kadingawa na ma tizenya nu khi, “Ha Ibri nyi meme kesüdha.”

⁷Memewa tssüggüwa na wala kadingawa wi keü, “Hi wa Ibri nza kesü cichi nu memewa ha ghanja pi no cü thsüla?”

⁸Ma khineng, “Anlo.” Tsalina ghalawa na wa memewa jja tsü ci sengho.

⁹Kadingawa na nzawa wi kiza, “Meme ha ssi wa ghanja pi hi cülo, hi nkutimen sapi no cüben.” Tsalina nzawa na memewa tsü pie wa noncca wa.

¹⁰ Ghanyiwa na zügü keshagha seng wi nzawa na ma ssinu kadingawa wi wa, nu ma kadinga tsa sa wa. Kadingawa na ma ketanla ma wi khi, “Hi atssü wina ma zanshikeya ghena ma nyan pi Mosa[1] ciden.”

¹¹ Mosa na qhai keshagha seng wi ma nyi Ibri nyithu hhainan wa nan mathu meten pi kekuli kekhang sa thsü keben muya. Ejipt nyi kesü na Ibri nyi kesü, tsüna Mosa nyi, pathi keben la muya.

¹²Mosa na ghang kevüli chi nan anyi kesütanla ciwi keben nmu, tsalina ma Ejipt nyi tsü pathi nu ma kamang pi ahachan non wi kuthia.

¹³Ma dhitsüwa wi ciwi wa nan Ibri nyi keni na kesali keben muya. Ma meshu kesü sazzi kebenwa wi tsü khi, “Mangkesa na no ketanla no Ibri nyi kiccü ben nu?”

¹⁴Anyi tsüwa na khineng, “Thowa na no pi ishinyi miwi kediwa nu kaghanwa sa thsü nu? No Ejipt nyiwa pathi kesa tsüti hi la pathia le ben kwe?” Tsaseng wi Mosa na messi nu ma ketanla ma wi khi, “Hi kekuli tsü nyu na chüyadha.”

¹⁵Kadimiwa na mangwa khati sadha khe chükeya wi ma Mosa pathiale sa, isala Mosa na bvü wa Midia yyi wi hang wa. Ghanan kesü Mosa na atssükhang kete wi donki keben Midia wi keqhaikediwa Jethro nga tagü na atssü de pi mathu ba khaghaneni nu anenithu khu wi chile gho.

¹⁷Isala anenikehiethu pahan na gho Jethro ngathu tsü jügü zighe. Mosa na wa mathu sheipiya nu atssü pi mathu sahangthu la jjüya thsüa.

¹⁸Mathu kheneng mathu ba wi gho nu ma mathu wi keü, “Nthu mangkesa na nansü shishi ghodha nu?”

¹⁹Mathu luneng, “Ejipt nyi kesü na anenikehiethu kwen wina ikhang bisha cü nu atssü de pi ikhang cü nu pi ikhang sahangthu la jjüya thsüle.”

²⁰Ma ma ngathu wi keü, “Ma khiewa ben nu? Nthu mangkesa na ciwi ma teshi nu? Wa ma ci sengho ikhang gweghe anün dsa thsülo.”

²¹Tsalina Mosa na ciwi hangle cenya, nu Jethro na ma nga Zippora pi ma wubvü sa thsü,

²²nzawa na atsa kesü pvügha pi ma cü. Mosa na ma ketanla ma wi khi, “Hi ayyi hewi asang saben, tsalina ma nyan pi Gershon [2] ciden.”

²³Amapi pahan seng wi Ejipt kadimiwa na shüa, isala Israel nyithu na mathu nssümagha kesa wi ghadhi nu kekiqa ghena qaiben. Mathu kiqai hhai na wa Anyiza cuya.

²⁴ Anyiza na mathu kiqai hhai tsü zakeya wi ma Abraham, Isak, nu Jakob ssinu cenkethenjüh tsü meshenya.

²⁵Anyiza na Israel nyithu nssümagha sa keben tsü mu nu mathu cüki meshenben.