Read Northern Rengma Naga BVÜKESHHU 22 Bible Online

BVÜKESHHU 22 - Northern Rengma Naga bible

BVÜKESHHU 22

¹Keujüla anyi kesü na amesü nyelela khaghaneni ghanfü pi pathi nyelela pi jeü lethu, ma amesü kesü ghena amesü manga nu khaghaneni kesü ghena khaghaneni manga tsüti pi dhineng nsathu yishü.

²Ma ghanfüya kesa kutimen tsü ndhithu yishü. Keujüla ma mangla nmi lethu, ma ghan pi nssümagha ti jeü pi ma kaghanfü men dhilo. Keujüla asahang ghanfüya kesawa tsü amesü, gada, nyelela khaghaneni sa lela ma kwen wi kahang muyathu, ma kesü ghena keni pi dhineng ben. “Keujüla kaghanfü nyi kesü na aghaja wi nyu jjen bhidu nu nyu ma pathi lethu, nyu ma kepathiwa tsüna kepathi ghena kesazzi nmi. Isala keujüla tsüna aghanan wi sa lethu ma kepathi ghena sazzi ben.

⁵“Keujüla anyi kesü na ma sahangthu teshi pi alli nyelela kemeshentsse lli wi atsse yathsü, nu tsüthu deja wa nyu lli wi pala shigü kebenthu dsa lethu, ma lli nyelela kemeshentsse lli wi dedi kesa men tsüpi dhineng nsathu yishü.

⁶“Keujüla anyi kesü na ma lli wi anni sa nu aghe mughu wa nyu lli nu nyu su shigü keben nyelela saghu ketheng mecang lethu, anni sa tegü kechiwa na keyasa men tsü dhilo.

⁷“Keujüla anyi kesü na nyu kepa pisa nyelela atsanqai menkedhu pi theng nu nyu ma jjen wina ghanfüya, nu kaghanfüwa tsü ghanya lethu, ma tsü keni ju pi cü nenglo.

⁸Isala keujüla kaghanfüwa tsü ghan meyala lethu, anyi nyu ji atsanqai menkedhu pi ma jjen wi kethengwa tsü ssinu kekinyipen wi gho nu ciwi ma anyi kepawa keben tsü n-ghanfüle khila nkishen thsüthu yishü.”

⁹Tsanqaitsana ghena kicennali katsüha wi lela amesüsi, gadathu, khaghaneni, athsümeni nyelela atsanqai kebhatagha ghena kaghazan keben meshu keni keben tsü ssinu kekinyipen wi walo. Anyiza na anyi kesü sazzidha le kesa khi chithu anyi tsüwa na tsü keni ju pi anyi kepawa dhilo.

¹⁰“Keujüla anyi kesü na nyu kepa wi gada, amesü, khaghaneni, nyelela asahang kepa wi pi ma ghena theng, nu asahang tsüna shü, mesa-mena, nyelela ssibvü nu thola tsü nmu lethu,

¹¹anyi tsüwa na kekinyipen wi wa nu ma anyi kepawa sahang nghanfü le khi nkishen thsüthu yishü. Asahangwa tsü nyu na ghanfüya nsa lethu ma pvüwa na kededi tsü pvüben, nu anyi kepawa na ma ndhila mehai;

¹²isala keujüla asahangwa tsü nyu na ghanfüya lethu, anyi tsüwa na ma pvüwa ndhithu yishü.

¹³Keujüla aghangsa na asahangwa tsü ghan lethu, anyi tsüwa ya ma sa pahan sengho thsülo; aghangsa na tsü ghan kesalina ma ndhinengla mehai.

¹⁴“Keujüla anyi kesü na nyu sahang nna sengho ma pvüwa nkemi wi mesa-mena nyelela shü lethu, ma tsü dhinenglo.

¹⁵Isala keujüla ma pvüwa keben wi tsüti sa lethu, ma tsü ndhinengla mehai. Keujüla tsüna melli keten sahang lethu, kededi tsüna mellikeya kutimen wi pi saya.”

¹⁶ Keujüla anyi kesü na pvünyimethawa n-nuwale ajüh npi kekhuchi tsü ssibvü lethu, ma nzawa men pi cü nu yapi ma wubvü saya nsathu yishü.

¹⁷Isala nzawa ba na ma ya ma nga tsü meya thsü mvu hhaghe lethu, ma nzawa pvünyimetha men apisa pi ma ba ndhithu yishü.

¹⁸ “Nza thowa na dema ten khe pi shü thsülo.

¹⁹ “Npvüza thowa na aghangsa ssimehai khe pi shü thsülo.

²⁰ “Anyi thowa na ahhansha sapi Apvüwa hi, ncüla acenpvü kepa wi cü khe meshensa pi shü thsülo.

²¹“Asang tsü metenmesha nyelela pasha nsala, kepaghenanye nthu la Ejipt wi asang sale.

²²Denyile nyelela magha-maghang metenmesha nsala.

²³Keujüla nthu tsüti sa lethu, mathu hi wi kekiqa khie kechi wi hi mathu luneng chi metsiden,

²⁴nu hi nthu miwi aghepvü nu aghi wi nthu pathiaben. Nthu wubvüthu na denyile nu nthu tsangathu na aba nmila thsüaben.

²⁵ “Keujüla nthu na apisa pi inyi ketha-u nna thsü lethu, apisa pi nyu nna thsü keten ti sa nu ma wi kekiyi meyala.

²⁶ Keujüla nyu nthu kedhabi sa nyu thsümeni khuya lethu, nthu na aghani npi kedu jüwi na tsüpi cü neng nsathu yishü,

²⁷kepaghenanye ma tsü ketan mphi nu yengkewhe benden. Ma mangwa mphi nu jen nu? Ma hi wi kekiqa khie chi lethu hi ma nanketizen ghena ma luneng chi metsiden.

²⁸“Anyiza kethenjüh nkhila, n-nyi ccülikesawa nkishencüla.

²⁹Matsü wina nthu asu, kisengtssü, nu oliv deli pi hi kinyilo. “Nthu tsa tssütsewa tsüpi hi cülo.”

³⁰Nthu mesüsi nu khaghaneni zza tssütsewa pi hi cü. Ma zza süpon tssütsewa tsü yala ghanan tagü ma bvü gweghe benla thsü nu tazen ghanan wi tsüpi hi kinyilo.

³¹ “Nthu na inyi, tsalina nthu na khiewila mesengmaghang tsü dsa yishü, tsü pila affüthu cülo.”