Read Northern Rengma Naga BVÜKESHHU 23 Bible Online

BVÜKESHHU 23 - Northern Rengma Naga bible

BVÜKESHHU 23

¹ Milikemesa jühjügha nkhila, nu milikemesa wina kesazzi shei npila.

²Anyi kejiwa na sazzi nyelela kemeshonwa yasa ketenthu sheikepi tsü n-niela.

³ Ketha-u jühkekaghaten wi nankepapa nsala.

⁴“Keujüla nthu ghinyi mesü nyelela gada na ma le pvüdhi bvü keten muya lethu, ssi wa ma pvüwa cü nenglo.

⁵Keujüla ma gada na akhhi pvünu khuli keben mu lethu, teshi nu bvü nsala; gada tsü kiqa pi shagha alentsen nengwa thsülo.

⁶“Ketha-u jühkekaghaten wi ma kemeshonwa tsü nkinala nsala.

⁷Milikemesa wi nyu nkeminnila, nu kesazzi nkemiwa pi nshü thsüla, kepaghenanye hi thowa na nkemehai kekuli hati sa khe meshensa ben.

⁸Alaa tsü meyala, kepaghenanye alaa tsüna anyi nyon sapi kemeshonwa tsü nmu thsüla, nu kesazzi nkemiwa yasa den.

⁹ “Asang tsü metenmesha nsala; asang kemeshen tsüna khati kesa khe nthu na chüben, kepaghenanye nthu la Ejipt wi asang sa nandha.

¹⁰ “Amapi tugho nthu yyi tsü cah nu ciwi mangwa muya khe saghu yalo.

¹¹Isala amapi tagüwa wi tsü ncala nu ciwi shigü keshaghathu tsü nwwila. Ketha-uthu ya tsü wwiya thsü, nu aghangsathu ya amaseng tsü dsa thsülo. Ha makesü nthu kemeshentsse lli nu oliv sanku la tsüti sa ben.

¹² “Ghanan tugho jüwi kekuli saya, isala tagü ghanan wi kekuli nsala, isanu nthu nssümaghathu, asang nthu kekuli sa ketenthu, nu nthu sahangthu lela mnanya mehai.

¹³“Hi Apvüwa, nthu kekiza ha tsüdila kinayalo. Nthu acenpvü kepa wi kekhie nsala; mathu nyan tsü lela ntengla.

¹⁴“Amapi kesü wi Akho keti kecheng sapi hi kinyilo.

¹⁵ Nthu na Ejipt keteshi Abib sha wi hi nthu kekiza ti Azimi nkechi Mesa pi kemishu Kho tsü salo. Akho ha ghanan tagü jü tsü azimi pi kechi mesa ndsala. Mangla nsenla kemissü gho hi nkinyi lalo.

¹⁶“Nthu na alli wwi wa keten wi Matheükedhi Kho tsü salo.” Vvüthimeyi wi nthu na alli wi asu wwi pvügho saghuya lethu Kelishu Kho tsü salo.

¹⁷Amapi kaghapen wila akho kecheng ha kesa wi npvüzathu na gho nthu Pvüwa Anyiza hi, nkinyithu yishü.

¹⁸“Nthu na asahang kesü pi ahhansha kesa wi azimi kechi mesa pi hi ncüla. Akho hathu wi ahhansha sapi hi kecü asakethu tsü pi ghanenwa kecu nthengla.

¹⁹ “Amapi kaghapenla nthu alli kewwi atuwa tsü sen nu nthu Pvüwa Anyiza jjen wi gholo. “Khaghaneni nyelela aneni zza nitu keten tsü npathi dsala.

²⁰“Nthu na kijünyi wa keten wi hi nyilo kesü kesun pi nthu khweya, nu nthu ssigho hi apen kiden ketheng witsü chi cüden.

²¹Leben chi nu ma jüh kekhi kinalo. Ma nshunla, kepaghenanye hi ma kesun chi, nu ma shun ketenwa teshi pi cü nben.

²²Isala keujüla nthu na ma jühkina nu ma kekhi tsüdila sa lethu, hi nthu ghinyithu ssisa ben.

²³Hi nyilowa na nthu tuwi wa nu nthu ssi wa Amor, Hitti, Periz, Kanaan, Hivi, nu Jebus nyithu yyi wi chicü, nu mathu yasa cüben.

²⁴Mathu cenpvü tuwi kukedu nyelela tsüthu nkinyila, nu mathu keccüna kekuli tsü nsala. Mathu cenpvüthu tsü yasa nu mathu ducükezhü kemethathu tsü pakhhilo.

²⁵Keujüla nthu na nthu Pvüwa Anyiza hi, kinyi lethu, hi kedsakejjü nu atssü sawegü pi nthu cü nu nthu wi kesakinaa tsüdila sen bvüaben.

²⁶Nthu yyi wi nza kesüla atsa yasa nyelela atsanga nmila sa nben. Hi kesie kahang pi nthu cüben.

²⁷“Hi anyi nthu shun ketenthu ya hi messi thsüaben; hi chükivvü sengho anyi nthu ssinu kesali ketenthu jawi chicü nu nthu ghinyithu sapi nthu wina khapeghe bvü thsüaben.

²⁸Hi amejü nikhothu kesun pi nthu tuwi na nthu ghinyi Hivi, Kanaan, nu Hitti nyithu jügüshiaden.

²⁹Hi amapi kesü jüwi tsü mathu jügüshi nben, keujüla hi tsüti sa lethu ayyi tsüna yisha nu aghangsa na nthu ghena ji mtsü shaben.

³⁰Tsüti kesawa nye nthu na ji pfüpfü pi ayyi tsü npi nkakeya chu hi ashisa tsüthu jügüshiaben.

³¹Hi nthu yyi ggü tsü Kenmie Tssükedone na wa Filistin Tssükedone kecu nu ayyikeshü na wa Eufrat Ghaku kecu sapi tisie kayi cüden. Hi ayyi ciwi hang kebenthu miwi kekhang pi nthu cü, nu nthu na mathu jügüshiaben.

³²Nthu na mathu gweghe nyelela mathu cenpvü ghena ajüh ncenla,

³³anyi hathu ha yala nthu diyyiwa wi nhang thsüla, isalethu mathu na nthu sapi sami nu hi shun thsüaben. Keujüla nthu na mathu cenpvüthu kinyi lethu tsüna nthu ghena keshü ca kesü saben.”