Read Northern Rengma Naga BVÜKESHHU 24 Bible Online

BVÜKESHHU 24 - Northern Rengma Naga bible

BVÜKESHHU 24

¹Apvüwa na Mosa wi khi, “No, Aaron, Nadab, Abihu, nu Israel nyi accülikesathu achentagü na ayikha wi shhugho hi wi kegholo; nu nthu na alen kesie wi ben nu kukedu kinyilo.

²No ketan khe kepa wi ikete wi nghola. Anyithu ya ayikha wi lela nshhugho thsüla.”

³Mosa na wa Apvüwa na ahza khukechi nu ayenkhukechi tsüdi khipi anyithu kiza, nu anyithu tsüdila gweghe khineng, “Ikhang na Apvüwa kekhi tsüdila saden.”

⁴Mosa na Apvüwa yenkhukechithu tsüdila zhüya. Ma tsü ghanenwa wi mitu na shagha ayikha ccü wi kekinyipen kesü saya, nu alon taghakeni pi Israel mizza taghakeni ghena shengya.

⁵Tsaseng wi ma anyi kepvünyi pahan kesun chi nu mathu na mecang pi kekinyi sa nu amesü süpon pi ahhansha sa nu kecca ghena kekinyi sapi Apvüwa cü.

⁶Mosa na ajjü tsü pahan khupi akhu wi chiya, nu pahan pi kekinyipen wi keghü chi.

⁷Tsaseng wi Apvüwa na khi kechi nie nu zhüketheng Cenkethenjüh Lesüshen tsü khuya nu tsü misikhhali si pi anyithu kizachi. Mathu khi, “Ikhang na Apvüwa jühkina den nu ma salo kekhi tsüdila saden.”

⁸Tsaseng wi Mosa na ajjü pi akhu wi chiya nu tsüpi anyithu miwi keghü. Ma khi, “Hawa ha Apvüwa na ayenthu ha khukechi wi nthu ssinu cenkethenjüh jjüwa tsüle.”

⁹Mosa, Aaron, Nadab, Abihu, nu Israel nyi ccülikesathu achentagü na ayikha wi ki,

¹⁰nu mathu na Israel Nyizawa tsü mu. Ma ccü mpha kekhu tsüna safir lon pi zhüketheng atsena sapi akulu kemetha ti kesa.

¹¹Anyiza na Israel nyi ccülikesathu ha patena nsa; mathu na Anyiza muya nu tsaseng wi wa dsa nu jjüya.

¹²Apvüwa na Mosa kiza, “Ayikha wi shhughola hewi hi hieben lalo; hi alonpha keni miwi Israel nyithu ghena kecükegwe yenthu zhüketheng tsüpi no cüden.”

¹³Mosa nu ma kekiqawa Joshua manyi kidenya, nu Mosa [13] na kemetha yikha wi tsü ki.

¹⁴Mosa na accülikesathu wi kiza, “Ishinyi na kemnanpen hewi npi kegho neng chu ishinyi hieben lalo. Aaron nu Hur manyi na nthu gweghe ben, keujüla nthu jawi kicennali ben lethu manyi wi wa südheya mehai.”

¹⁵Mosa na Sinai Yikha wi ki nu akulukeshü na tsü kejibhon ya.

¹⁶Apvüwa tenle kesa kewegü na gho ayikha miwi ben wa. Irsael nyithu tuwi kewegü tsüna anni na ayikha miwi mecang keben ti mu. Akulukeshü na ghanan tugho ayikha tsü kejibhon, nu tagü ghanan wi Apvüwa na akulukeshü wina Mosa cichi.

¹⁸ Mosa na ayikha wi ki akulukeshü non wi dula ghanan nu ghaja jügha ben wa.