Read Northern Rengma Naga BVÜKESHHU 27 Bible Online

BVÜKESHHU 27 - Northern Rengma Naga bible

BVÜKESHHU 27

¹“Akakia chan pi kekinyipen kesü sayalo. Tsüna ketikesie meceqe nu kesie meter 2.2, kemeza meter 2.2, nu kemisi meter 1.3 saya.

²Accügwen mejü shoni witsü aghacüthu saya. Tsüthu pi kekinyipen gwo wi zhüghu pi kesü sa, nu lezza pi maben la mejuya.

³Kemecang khala kechi ghena akhuthu, nu kekhwiji, akhuzza, adhasü, nu anikhu hathu saya. Atsanqai hathu tsüdila lezza pi mejuya.

⁴Lezza pi anyagha kesü saya, nu kepieji aqae mejü sapi ma ccügwenthu wi chiya.

⁵Anyagha tsüpi kekinyipen füghancü kesa cakhu wi chi nu tsü yala kekinyipen kegishü pahan cuya thsü.

⁶Akakia chan pi tsü kepiechanthu sa, lezza pi mejuya,

⁷nu kekinyipen tsü piele kesa wi tsüthu pi ma qei kesüsü witsü ghe chiya.

⁸Hi ayikha wi pi no keccüca kekiden tsü nie nu kaha chan pi kekinyipenwa tsü sa nu ma non wi kaghacang saya.

⁹“Hi ketenpen Nithsüjjenwa tsü ghena linen kemehai pi kevüdhi kesü saya. Acülawa keshondhithsü tsüna kesie meter 44

¹⁰rükatssü pi adhasü nu zenza kebhenji sa ketheng tsüpi lezza pi kesa donbvü ngwe nu lezza pi kesa zenza ngwe sapi tsü tsükiya.

¹¹Aghawa kevüdhi wi la tsü makesü sayalo.

¹²Niduwa adonbvü tagha nu azenza tagha pi keshonthsü kesie meter 22, sapi shonya.

¹³Nishuwa kedulen tsü kevüdhi la kemeza na meter 22, saben.

¹⁴Kedulen ghapeli qho wi adonbvü kecheng nu azenza kecheng nu keshonthsü meter 6.6, saben.

¹⁶Kedunlenwa ghena keshonthsü kesü kesie meter 9, linen kemehai atsena, nmiepheü kesa nu ssenthsü kenmie, nu ayakhu pi ma tsikesa pi degüghu. Tsüna adonbvü mejü nu azenza mejü pi tsükiya.

¹⁷Kevüdhiwa tsü adonbvü nu lezza zenzathu tsüdila rükatssü pi kesa adhasü nu kebhenji pi zanghu.

¹⁸Kevüdhiwa tsüna kesie meter 44, kemeza meter 22, nu kemisi meter 2.2 saaben. Keshonthsüthu na linen kemehai nu azenzathu na lezza pi saaben.

¹⁹Nithsüjjen wi atsanqai kesenjithu, Nithsüjjen kejetenjithu, nu kevüdhiwa ghena tsüdila lezza pi saben.”

²⁰“Ghaja kaghapenla cankiben thsüle kesalina Israel nyithu wi oliv deli kemehai ntsa sen nu no wi gholo kizalo.

²¹Aaron nu ma tsathu na hi ketenpen Nithsüjjen wi keshonthsü na ameiwa Cenkethenjüh Khitson tuwi ahula pi chiben. Ciwi hi ketenpen tsüna aghaja na wala ghanenwa kecu wi qheben ben. Israel nyithu nu mathu shicübvüghathu na anuphanla ahza ha nieben.”