Read Northern Rengma Naga BVÜKESHHU 29 Bible Online

BVÜKESHHU 29 - Northern Rengma Naga bible

BVÜKESHHU 29

¹No hati nu Aaron nu ma tsathu satemetha pi keqhaikedithu sa hi kekuli sa thsüden. Nyu ghojünkeya mangla nkemi amesü süpon zza kesü nu aneni süpon keni khuya.

²Awhengsu wheng kemehai ntsa khuya nu azimi pi nchila oliv deli pi kechi pahan, nu pahan adeli pi nchila nu amesa güya, nu ghapasi güya nu deli pi nyenya.

³Tsüthu pi ashijü kesü wi chiya nu amesü süpon nu aneni süpon keni pi ahhansha kesa wi tsüthu pi hi cülo.

⁴“Aaron nu ma tsathu ssinu hi ketenpen Nithsüjjen jenka wi gho nu mathu ya keccüna tssükizü yathsü.

⁵Tsaseng wi keqhaikedi thsümeni pi Aaron pvü thsü— agwomejuwa, adepfü-kewhengthsü, tsü miwi agwomejuwa kaghazu, adeshi nu ageshi-keqhanthu.

⁶Alikemejuthsü pi ma li wi chi nu kemetha zensu ‘Satemetha pi Apvüwa cüdha’ ikesa zhüki ketheng tsüpi ma miwi misükiya.

⁷Tsaseng wi adeli khuya nu pi ma li wi keshu chi nu pi ma nyen cülo.

⁸“Ma tsathu ssigho nu agwomejuwa pi mathu pvü thsü;

⁹alaweng-keqhan pi mathu pvü thsü nu aliwen pi mathu li wen cülo. Hati nu no Aaron nu ma tsathu khuthi pi satemetha chiben. Mathu nu mathu shicüthu na anuphanla keqhaikedi sa hi kekuli saben.

¹⁰“Amesü süponwa tsü ssinu hi ketenpen Nithsüjjen tuwi tsü gho, Aaron nu ma tsathu na mathu kwen chang pi tsü li miwi chilo kiza.

¹¹Ciwi hi ketenpen Nithsüjjen jenka wi amesü süponwa tsü pathi.

¹²Amesü jjü tsü pahan khuya nu pi nkwenzza wina kekinyipen ghacü wi tsü chi, nu ajjü kepa wi tsüpi kekinyipen ccü wi tsü keshu chilo.

¹³Tsashi ma kethu ma pvüsheng meju keben tsüdi, ma mechen kemehai ntsa, nu ma megen keni pi ma kethu tsü meju keben tsüthu khuya nu pi kekinyipen miwi mecang nu kekinyi sapi hi cülo.

¹⁴Isala amesü süpon sa, ma hyu, nu ma kughungthu tsüpi kemnanpen na ameiwa mecang. Hawa ha keqhaikedithu kesami sen bvüale kesa kekinyi kesü.

¹⁵“Aneni süpon kesü khuya nu Aaron nu ma tsathu na mathu kwen chang pi ma li miwi chilo kiza.

¹⁶Tsü pathi nu ma jjü tsü khuya nu senwa kekinyipen ccügwen mejü qho keghü chi.

¹⁷Aneni süpon tsü hazighe; ma kughung pvüsheng nu ma ccüthu tsü bhuya, nu pi ma sa hazighe ketheng tsü nu ma li gweghe chi.

¹⁸ Aneni süpon tsü maben pi kekinyipen miwi mecang nu atsse pi kekinyi sachi. Hi kekinyi tsü han tsü nenden.

¹⁹“Aneni süpon kepa wi la kesü khuya—tsüna satemetha kesa wi kesen — nu Aaron nu ma tsathu na mathu kwen chang pi tsü li miwi chilo kiza.

²⁰Tsü pathi nu ma jjü tsü pahan khuya nu sen wa Aaron nu ma tsathu khuna laca ajewa, mathu kwen ajewa kwenshenpfü, nu mathu ccü ajewa ccüshenpfü miwi chi, ajjü kepa wi gilli tsü pi kekinyipen ccügwen mejü qho keghü chi.

²¹Kekinyipen miwi tsü ajjü pahan, adeli pahan khuya nu sen wa Aaron nu ma tsathu thsümeni miwi keghü chi. Ma, ma tsathu, nu mathu thsümenithu satemetha pi hi wi chiben.

²²“Aneni süpon ma kethu, ma ghanu kethu, ma pvüsheng meju keben kethu, ma mechen kemehai ntsa, ma megen keni meju keben kethu, nu ma pedhi ajewa tsüdi khuya.

²³Amesa chi ketheng shijü pi hi cü kesa wi tsü amesa len kepapa kesa kesüsü: oliv deli pi kechi kesü nu tsüpi nkechi kesü nu ghapasi gü ketheng kesü khuya.

²⁴Atsse hathu ha tsüdi pi Aaron nu ma tsathu kwen wi chi nu mathu ya tsüpi aju kemehai ntsa sala satemetha pi hi cü thsü.

²⁵Tsaseng wi mathu kwen wi tsü khuya nu mecang pi kekinyi miwi atsse pi kekinyi sapi hi wi chi. Hi kekinyi tsü han nenden.

²⁶“Aneni süpon ha nnukhu-kisü khuya nu pi aju kemehai ntsa sala satemetha pi hi cü; nu asa hawa ha nshei saben.

²⁷“Keqhaikedi kesü khuthi pi satemetha lethu ciwi senketen aneni süpon ma nnukhu-kisü nu ma pedhi sa tsü satemetha pi aju kemehai ntsa sala hi cü nu khupi keqhaikedi ghena thengya.

²⁸Hawa ha hi kemili nkeya cen ketheng kesü, inyithu na mathu kecca ghena kekinyi kesa wi asa ma nnukhu-kisü nu ma pedhi tsüna keqhaikedithu ji. Hawa ha anyithu na aju pi hi, Apvüwa kecü.

²⁹“Aaron keshü seng wi ma keqhaikedi thsümeni tsüpi ma tsathu cü, nu mathu khuthi pi satekemetha wi tsü pvü thsüle kesalina.

³⁰Aaron tsa thowa na ma kuti sala keqhaikedi sa khe hi ketenpen Nithsüjjen wi du nu Kemetha Pen wi kekuli kesa wi ghanan tagü athsümeni hathu ha pvüben.

³¹“Aaron nu ma tsathu khuthi pi satemetha kesa wi kesen sa tsü khuya nu pi Kemetha Pen wi shvuya.

³²Hi ketenpen Nithsüjjen jenka wi mathu na tsüpi ashijü wi amesa keben tsü medsaben.

³³Mathu na khuthi pi satekemetha wi kesami keteshi keccüna wi kesenthu tsü dsaben. Keqhaikedithu ketan kedsakejjü tsü dsaya mehai, kepaghenanye tsüna metha.

³⁴Keujüla asa nu amesa pahan dsatu lethu ghanenwa wi tsü ndsala nu pi mecang; tsü ndsala kepaghenanye tsüna metha.

³⁵“Hi no kekiza ti ghanan tagü Aaron nu ma tsathu khuthi pi satekemetha keccüna tsü salo.

³⁶Kesami teshi thsüale kesalina nthu ghanan kaghapenla amesü süpon kesüsü pi ahhansha nsathu yishü. Hana kekinyipen satemetha cüben. Tsaseng wi oliv deli pi nyen nu tsü satemetha cü.

³⁷Ghanan tagü ghena ghanan kaghapen hati salo. Tsaseng wi kekinyipen tsüna methatha sa nu atsanqaile anyi lela tsü kekidhenwa ma kemetha kekhang[17] ghena ketizen saben.

³⁸“Matsü ghaketen tsüdi wi ghanan kaghapenla khaghaneni zza amapi kesü ji kenini pi kekinyipen miwi tsü ahhansha salo.

³⁹Khaghaneni zza kesü pi aghanen nu kesü pi minulen tsüti ahhansha salo.

⁴⁰Awhengsu kemehai wheng kilogram kesü pi oliv deli liter kesü saghuya nu tsüpi khaghaneni zza atuwa tsü saghu pi kinyi. Kisengtssü liter kesü pi keshu chi nu kinyi.

⁴¹Khaghaneni zza keniwa tsüpi minulen kekinyi sa, nu awheng, oliv deli, nu kisengtssü tsüdila aghanen kesen tsü meceqe pi kinyilo. Hawa ha atsse pi hi Apvüwa, hi kekinyi ma han tsü nenden.

⁴²Kepaghenanye matsü gha keten tsüdi wi mecang pi kekinyi ha pi hi ketenpen Nithsüjjen jenka wi kinyiden. Hi ciwi inyithu metu nu mathu ccüneng den.

⁴³Ciwi hi Israel nyithu metu den, nu hi tenle kesa kewegüwa na apenwa tsü sapi metha cüben.

⁴⁴Hi Nithsüjjen nu kekinyipen tsü sapi metha cüden, nu hi Aaron nu ma tsathu khuthi pi keqhaikedithu sala hi kekuli sa thsüden.

⁴⁵Hi Israel nyithu jawi hang, nu hi mathu Nyiza saden.

⁴⁶Hi Apvüwa, mathu Nyiza, Ejipt wina mathu ssi shhughole kesa mathu na chüyaben, isanu hi mathu jawi hang. Hi Apvüwa mathu Nyiza.”