Read Northern Rengma Naga BVÜKESHHU 33 Bible Online

BVÜKESHHU 33 - Northern Rengma Naga bible

BVÜKESHHU 33

¹ Apvüwa na Mosa kiza, “No nu no Ejipt wina ssi keshhugho anyithu apen ha teshilo, nu hi ayyi pi Abraham, Isak, Jakob, nu mathu shicübvüghathu cüle khishi ketheng witsü walo.

²Hi tangnyilo kesü kesun pi nlentsütson thsüben, nu hi Kanaan, Amor, Hitti, Periz, Hivi, nu Jebus nyithu jügüshiaben.

³Nthu na ayyi kemehai nu kinyan pen witsü wa tendha. Isala hi nthu gweghe wa nten, kepaghenanye nthu na leben kedhu nyithu nu hi alenca wi nthu yasathu meshü.”

⁴Anyithu na ha zakeya wi mathu nongü nu mathu alon menkedhu tsanqai npvü la.

⁵Kepaghenanye hati mathu kizalo Apvüwa na ahza pi Mosa cü theng, “Nthu na leben kedhu nyithu. Hi matsü keujü nthu gweghe wa lethu hi nthu yasatha sa cüben. Khili nthu gwo wi alon menkedhu tsanqai tsü khushi pilo, isathu hi nthu ssinu mangwa saten khe chüyaben.”

⁶Tsalina mathu Sinai Yikha keteshi seng wi Israel nyithu na alon menkedhu tsanqai tsü npvü neng la.

⁷Israel nyithu na khathansha wi kemnanpen sa khe Mosa na kemetha Nithsüjjen tsü sengwa kemnanpen na ameiwa temeja wi sa. Tsü pila Apvüwa na ketenpen Nithsüjjen isa ci, nu anyi kesüle kesü lela Apvüwa ssinu ccüneng mvu lethu ciwi wa.

⁸Mosa na khathansha ciwi wa khe anyithu na mathu nithsüjjen jenka wi ben nu Mosa na ciwi npi kedu chu hie.

⁹Mosa na ma non wi kedu seng wi akulukeshü cü na dugho Nithsüjjen jenka wi benya, nu Apvüwa na akulukeshü wina Mosa ccüneng.

¹⁰Akulukeshü cü na dugho Nithsüjjen jenka wi keben muya meyi anyithu na nkhwencadu.

¹¹Apvüwa na ghangti nu anyi kesü na ma pvüshang ccüneng keben ti Mosa ccüneng. Tsaseng wi Mosa na kemnanpen wi ghoneng lela anyi pvünyi kesü ma kiqa keten Nun tsawa Joshua na Nithsüjjen wi ben wa.

¹²Mosa na Apvüwa wi khi, “Ntsakhiwa no hi anyi hathu ssinu ayyi ciwi walo kizadha, isala no anyi thowa kesun pi hi gweghe wa thsüten khe hi nkizale. No mehaitsü hi chüben nu hi nen benle kesa la kizadha.

¹³Tsalina keujüla no tsüti lethu khili, no kemeshen pi hi kizalo, isathu hi no kekuli sa nu no kenen saki benden. No pi nji sale mizzatenti hawa ha kessiya kesa tsü la meshen chilo.”

¹⁴Apvüwa na khi, “Hi no gweghe waden, nu khangkeya pi no cüden.”

¹⁵Mosa na khineng, “Keujüla no ithu gweghe nwa lethu ithu ya apen ha nteshi thsü lalo.

¹⁶No ithu gweghe nwa lethu nyu khati nu no hi nu n-nyithu nen benle chüya mehai nu? No ithu gweghe keten tsüna ithu na ayyi nyi kepathu jawi makepa kesale chüyaben.”

¹⁷Apvüwa na Mosa kiza, “Hi no kekhie tsüdi saben, kepaghenanye hi no mehaitsü chüben nu no nen kesalina.”

¹⁸Tsaseng wi Mosa na khie, “Nchala, hi ya no keten kewegüwa tsü muya thsülo.”

¹⁹ Apvüwa na luneng, “Hi kemehai kewegü tsüdila ntuwi wa thsüben, nu no keben wi inyan kemethawa tsü khishi chiben. Hi Apvüwa, hi ketizen pi ccüca nu nanketizen pi hi kessiya kesathu cüden.

²⁰Hi no ya immi muya thsü nten, kepaghenanye anyi thola hi mu nu hangya nben,

²¹isala he ikete wi apen kesü ben no alon ha miwi nganya mehai.

²²Khathansha wi hi keten kewegü tsüna pvüdhi wa khe hi no pi alon miwi chi nu hi npi kewa chu ikwen pi no shanbhon yaben.

²³Isanu hi ikwen khuya lethu no isengwa muyaben, isala immi muya nben.”