Read Northern Rengma Naga BVÜKESHHU 34 Bible Online

BVÜKESHHU 34 - Northern Rengma Naga bible

BVÜKESHHU 34

¹Apvüwa na Mosa kiza, “Hatuwa ji ti kesa alonpha keni hakhhi yalo, isathu hi no hatu wi pakhhi kesa lonpha keni miwi keben jühthu tsüpi tsü keni miwi zhü cüden.

²Dhitsü ghanen wi kidenya nu Sinai Yikha wi shhugho hi metulo.

³Thola no gweghe nshhugho la; anyi thola ayikha ciwi keten nmu thsüla, nu khaghaneni le amesüsi lela ciwi atsse meya thsüla.”

⁴Tsalina Mosa na kheneng alonpha keni hakhhiya, nu Apvüwa na ma kekiza ti ghanenwa wi mitu na tsü khusen nu Sinai Yikha wi ki.

⁵Apvüwa na akulukeshü wina dugho ma gweghe ciwi ngan, nu ma nyan kemethawa, Apvüwa, tsü khishi chi.

⁶ Tsaseng wi Apvüwa na ma tuwi wa nu ma cichi, “Hi, Apvüwa, Anyiza nyu ketizen nu nanketizen pi pong pvü ketenwa tsüle. Hi wan leben minu nten isala nanketizen nu atsentsawa tsüpi ccüca chiden.

⁷Hi abvüye hazar wi lela ijühkhishi ketheng tsü nieden nu nkemehai nu kesami teshi cüden; isala hi abvüye kecheng nu mejü wi lela mathu bajjathu kesami ghena atsanga tsangathu nmetenmeshala sa nben.”

⁸Mosa na wan ayyi wi nkhwendu nu kinyi.

⁹Ma khi, “Apvüwa, no ntsakhiwa hi nen lethu ithu ssinu walo, hi no wi khieben. Anyi hathu na leben kedhu nyi, isala ithu nkemehai nu kesami teshi cü nu pi n-nyi sayalo.”

¹⁰Apvüwa na Mosa kiza, “Hi khili Israel nyithu ssinu cenkethenjüh kesü saden. Hi mathu tuwi ayyi khie wila mizzatentithu jawi npi kesa ji kekuli keti sa chiden. Anyi tsüdila hi Apvüwa, kekuli keti sa kechi tsü muya mehai, kepaghenanye hi nthu ghena qhethiketen kesa kesü sa chiden.

¹¹Hi nansü Ayenthu pi nthu cü kebenwa ha nie yalo. Nthu na atujügü wathu hi nthu tuwi na Amor, Kanaan, Hitti, Periz, Hivi, nu Jebus nyithu jügüshiaben.

¹²Nthu na wa keten diyyiwa wi hang kebenthu kesüla ssinu nponghula, kepaghenanye tsüna nthu ghena keshü ca kesü saben.

¹³Tsüti kesawa nye, mathu kekinyipen tsü whengshi, mathu lon kesheng kemethathu tsü yasa, nu mathu cenpvü Asherah mechantsithu tsü pashü cülo.

¹⁴“Nthu na acenpvü kepa wi khiela nkinyila, kepaghenanye hi Apvüwa, anonkemeyenwa, anonkemeyen Nyiza.

¹⁵Nthu na diyyiwa wi anyithu ssinu nponghula, kepaghenanye mathu na ahhansha sapi mathu cenpvü cü nu tsü kekinyi wi nthu cichi nu nthu mechu pi mathu cenpvü kekinyi tsse tsü dsa thsüben.

¹⁶Nthu tsathu na asang nzathu ha yaya, nu tsüthu na mathu sapi hi wi leben tsentsawa nsa thsüla nu tsüthu cenpvü kinyi wa thsüaben.

¹⁷ “Amighe pi acenpvü zhü pi tsüthu nkinyila.”

¹⁸ “Azimi nkechi Mesa pi Kemishu Kho tsü nieya. Hi ahza khuchi pi no cü kesa ti Abib sha wi ghanan tagü azimi pi nkechi mesa dsa, kepaghenanye tsü sha wi nthu na Ejipt wina shhughoya.”

¹⁹ “Atsa tssütsewa nu asahang zza süpon tssütsewa tsüdila iji,

²⁰ isala nthu khaghaneni zza pi ma mithon sa kinyi nu gada zza süpon tsüdila kedonli yalo. Keujüla nthu na gada tsü kedonli nsa mvu lethu nthu na tsü sun taghandhilo. Nthu tsa tssütsewa tsüdila hangshayalo. “Anyi thola kekinyiju nkesen tsü ituwi nghola.

²¹ “Nthu na ghanan tugho jüwi nthu kekuli saya, isala tagü ghanan witsü kekuli nsala, tsüna alli kechhü tsüle alli kewwi tsüwi sa lela.

²²“Nthu na awhengsu kewwi atuwa wi tsü Matheükedhi Kho tsü salo, nu vvüthimeyi nthu na asu wwi pvügho saghuya lethu Kelishu Kho tsü salo.

²³“Amapi kesü wi nthu npvüza tsüdi kecheng tughu gho hi Apvüwa, Israel Nyizawa kinyilo.

²⁴Hi nthu tuwi na mizzatenti kepathu jügüshi nu nthu ggü sapi tisiekayi kecü seng wi anyi thola akho ha kecheng sa keben jüwi nthu diyyiwa nkaya thsü nben.

²⁵ “Nthu na asahang kesü pi ahhansha sapi hi kecü wi azimi pi amesa wi kechi saghu pi hi ncüla. Nthu na Shhukeya Kho wi kepathi asahang sa tsüpi dhitsüwa kecu wi nthengla.

²⁶ “Amapi kaghapengla nthu na alli wwi tegüwa asu tsü sen nu Apvüwa jjen wi gholo. “Khaghaneni nyelela aneni zza na ma bvü wi nitu keten tsü npathi dsala.”

²⁷Apvüwa na Mosa kiza, “Ajüh hathu ha zhüyalo, kepaghenanye hi ajüh hathu miwi na no nu Israel nyithu ssinu cenkethenjüh kesü saden.”

²⁸Mosa na mangla ndsa nu njjüla ghanan jügha nu aghaja jügha ciwi Apvüwa gweghe ben. Ma cenkethenjüh hathu ha pi alonpha keni miwi zhü — Ayenkhukechithu Tagha.

²⁹ Mosa na Sinai Yikha wina Ayenkhukechithu Tagha tsü pvünu dugho keten wi ma mmi na wegüthsü sa, kepaghenanye ma Apvüwa ssinu ccüneng kesalina; isala ma tsü nchü.

³⁰Aaron nu anyi tsüdi Mosa ghangchi nan ma mmi na wegüthsü nu mathu na ma kete wi wa messia.

³¹Isala Mosa na mathu ci, tsalina Aaron nu accülikesathu tsüdila ma wi wha nu Mosa na mathu ssinu ccüneng.

³²Tsaseng wi Israel nyithu tsüdila saghu nu ma vüya, nu Mosa na Apvüwa Sinai Yikha wi Ayenthu pi ma kecü tsüdila pi mathu cüa.

³³Mosa na khathansha wi ajühkhi pi mathu kiza cen khe ammi keshangthsü pi ma mmi shangya.

³⁴Khathansha wi Mosa na Apvüwa keten Nithsüjjen wi du Apvüwa ccüneng khe ma mmi keshangthsü tsü lishi den. Ma akhemi wi shhugho ma ya khilo kesa tsü tsüdila khipi Israel nyithu kiza,

³⁵nu mathu na ma mmi wegüthsü keben tsü mu. Tsaseng wi ma mmi keshangthsü pvüya nu kheneng wa Apvüwa npi keccüneng chu tsü pvüden.