Read Northern Rengma Naga BVÜKESHHU 36 Bible Online

BVÜKESHHU 36 - Northern Rengma Naga bible

BVÜKESHHU 36

¹“Bezalel, Oholiab, nu sapichü kepathu Apvüwa na saya kemehai, chüshikeya pi cü kethengthu, Nithsüjjen kemethawa kesa wi nsenthu keyishü tsüdila chü kebenthu na Apvüwa khi kechi tsüdi nieti nu saden.”

²Bezalel, Oholiab, nu sapichü kepathu Apvüwa na saya kemehai pi cü nu nyu kiqa mvu ketenthu tsüdi cichi nu mathu kekuli sa shhu yilo kizachi.

³Mathu na Mosa wi Israel nyithu na Nithsüjjen kemethawa kesa ghena khukechi kekinyi tsanqaithu tsüdila muya. Isala Israel nyithu na ghanan kaghapengla mathu kekinyi tsanqaithu sen nu Mosa wi ghoben.

⁴Tsaseng wi sapichü kekuli sa kebenthu na

⁵Mosa kiza, “Anyithu na Apvüwa na salo khi kechi kekuliwa tsü sa keminni sengho bendhale.”

⁶Tsalina Mosa na anyi thola Nithsüjjen kemethawa kesa ghena atsanqai nkhuchila yilo kesa ahza kesun pi kemnanpen tsüdi wi chi, isanu anyithu na atsanqaithu nsengho la.

⁷Atsanqai saghu ketheng tsüna kekuli tsüdila sa keminni sadha.

⁸Kekuli sa kebenthu jawi sapichü ntsathu na Apvüwa ketenpen Nithsüjjen tsü sa. Mathu na linen kemehai atsena, nmiepheü, nu ssenthsü kenmie pi de ketheng abe tagha, cherubim tsikezhü ma miwi degüki pi tsü sa.

⁹Kesüsü ma ketikesie meceqe, kesie meter taghakeni nu kemeza meter keni salo.

¹⁰Mathu na tsüthu manga degüghu pi kesü sa nu kepa wi manga tsü la pi makesü saya.

¹¹Mathu na athsü keshen kesüsü wi atsena katen meiwa na tsü shenghu pi degüya.

¹²Mathu na kesüwa wi tsü athsü atuwa miwi keshenghu deni saya nu tsü makesü keniwa wi athsü asakhenwa miwi keshen deni saya.

¹³Mathu na suna pi adhasü deni saya nu tsüpi keni tsü ceghu pi kesütan sa thsü.

¹⁴Tsaseng wi mathu na aneni ssenthsü abe taghakhen pi Nithsüjjen tsü keshon ghena kesü saya.

¹⁵Mathu na tsüthu tsüdila ketikesie meceqe, kesie meter tagha kecheng nu kemeza meter keni saya.

¹⁶Mathu na tsüthu manga degüghu pi kesütan sa, nu kepawa tugho tsü la pi kesü saya.

¹⁷Mathu na kesüwa wi athsü asakhenwa katen miwi keshenghu deni saya, nu kepawa katen miwi la keshenghu deni saya.

¹⁸Mathu na lezza pi adhasü saya nu tsüthu pi athsü keni tsü ceghu pi keshonthsü kesü saya thsü.

¹⁹Mathu na keshanji keni, kesü na aneni süpon hyu ghang pi kenmie nu kepawa asahyu kemehai pi sa nu pi ameiwa keshan saya.

²⁰Mathu na akakia chan pi Nithsüjjen chan-güthu meshonqhe saya.

²¹Ajjen chan kesüsü kesie meter mejü nu kemeza senti- meter achentugho nu tugho saya.

²²Ajjen chanthu tsüdila zanghuyale kesalina akhuki kenini meceqe zankiya, ajjen chan-gü mabenla tsüti saya.

²³Mathu na acülawa ghena achan-gü ngwe saya,

²⁴nu rükatssü pi ma donbvü kesheng ghena jügha sapi tsüthu ccü wi chi, ma donbvü keni pi achan kesü wi ma khuki kewenphi kesüsü tsükiya.

²⁵Mathu na Nithsüjjen na aghawa ghena achan-gü ngwe saya,

²⁶nu rükatssü pi ma donbvü kesheng ghena jügha saya, achan kesü wi ma donbvü kenini.

²⁷Nithsüjjen sengwa niduwa ghena achan-gü tugho saya,

²⁸nu achan-gü keni na ma ccügwenthu ghena.

²⁹Accügwen chan-güthu ha ma ccü wi bhenghu nu tsüti sa senshu ma li cu. Ma ccügwen keni wi achan-gü keni tsü makesü sa.

³⁰Tsalina ciwi achan-gü tazen wi tsü rükatssü pi kesa ma donbvüthu tagha nu tugho na ben, ma donbvü keni na achan-gü kesü ghena.

³¹Mathu na akakia chan pi kenthsü ghena tagha manga saya, manga na Nithsüjjen katen wi achan-gü manga ghena,

³²manga na ma katen pahanwa ghena, nu manga na niduwa asengwa chan-gü ghena.

³³Kenthsüchan anonwa tsüna gishü pahan ketan pi achan wi chi, Nithsüjjen katen pahanwa na wa pahan kecu tsüti saya.

³⁴Mathu na suna pi achan-güthu tsü mejuya nu tsüthu pi suna qei wina suna pi meju ketheng kenthsüchan tsü gheya.

³⁵Mathu na linen kemehai atsena, nmiepheü, nu ssenthsü kenmie pi de ketheng pi keshonthsü kesü sa, nu cherubim tsikezhü pi tsü miwi degükiya.

³⁶Keshonthsü tsüpi hagile kesalina mathu akakia chan pi zenza mejü sa nu suna pi mejuya, nu suna dhasüthu la pi chiya. Tsaseng wi rükatssü pi ma donbvü mejü saya nu azenzathu zantenya.

³⁷Nithsüjjen wi kedulen ghena mathu na linen kemehai atsena, nmiepheü, ssenthsü kenmie pi de nu ayakhu ketheng pi keshonthsü kesü saya.

³⁸Keshonthsü ha ghena mathu na azenza manga sa nu adhasüthu pi chiya, nu suna pi tsüthu mabenla mejuya, nu lezza pi azenzathu ghena ma donbvü manga saya.